Île dé Man
From Wikipedia
|
Ch't' articl'ye est êcrite en Jèrriais
 |
L'Île dé Man est eune île dans la Mé Irlandaise entré l'Angliétèrre et l'Irlande.
L'île est chînquante-deux kilomètres (trente-trais milles) d'londgeu et vîngt-deux kilomètres (treize milles) dé laîze.
L'île entchiéthe est chîn chents septante-deux kilomètres cârrés (deux chents vîngt-sept milles cârrés).
Y'a des montangnes - la pus haute a nom Snaefell.
La capitale est la ville dé Douglas (en Manx: Doolish), et y'a d'aut's villes: Ramsey (Rhumsaa), Peel (Purt ny h'Inshey), Castletown (Balley Cashtal) et Port Erin (Purt Çhiarn). Mais la maintchi d'la populâtion d'meuthe à Douglas et dans l'vaîsinné.
Y'a dans les septante mille pèrsonnes tchi d'meuthent en l'Île dé Man.
[amendaer] Êconomie
L's îndustries d'l'île sont:
- l'tourisme - un tas d'touristes aiment bein v'nîn vaie les grèves et la natuthe - et châque année un tas d'gens veinnent èrgarder les grandes courses à motorbike tchi sont bein fanmeuses;
- les finnances sont hardi înmportantes pouor l'êconomie d'l'Île dé Man étout;
- l'agritchultuthe.
[amendaer] Politique
Lé Tynwald est l'parlément d'l'île tch'est l'pus vièr des parléments dans l'Commonwealth - il est dîvisé en deux chambres: lé Conseil Législatif et la Maîson des Cliés.
Lé Lord dé Man est la Reine Lîzabé II du Rouoyaume Unni. Lé chef du gouvèrnément est l'Chef Minnistre.
[amendaer] Tchultuthe
Les Manx pâlent l'Angliais, mais y'a tchiques gens tchi pâlent lé Manx étout et y'a des clâsses dé Manx dans l's êcoles et eune êcole dans tchi qu'l'ensîngnage est en Manx. Lé Manx est eune langue Celtique – ch'est d'la même fanmil'ye dé langues qu'l'Irlandais et l'Êcossais, et il est coumme lé Bréton, lé Gallouais et l'Cornouaillais étout.
Les cats dé l'Île dé Man sont fanmeurs - i' n'ont pon d'coue.
