Photographie
From Wikipedia
|
Ch't' articl'ye fut c'menchie en Jèrriais
 |
Des photographièrs
Des désinaeuxLa photographie est un mouoyen d'faithe un portrait atout d'la leunmiéthe. Un portrait fait atout la photographie est un photographe ( énne photographe, énne picture).
Nou fait sèrvi un caméra pouor faithe des photographes. Un caméra est eune manniéthe dé boête tch'a eune leunette tchi laîsse entrer assez d'leunmiéthe pouor faithe lé portrait. Achteu ch'est la photographie digitale tch'est pus populaithe, mais nou-s'a fait sèrvi des pliats d'méta, du vèrre et du papi pouor faithe des photographes sus.
[amendaer] Histouaithe
Lé caméra obscura est un appartément freunmé tch'avait un p'tit creux tchi laîssait entrer d'la leunmiéthe pouor mouontrer (à l'envèrs) sus la muthâle d'endrait chein tchi s'pâssait en d'houors. Ch'tait eune manniéthe dé projecteux prînmitif tch'înspithait les gens d'tâchi d'fidgi l'portrait.
En 1724 Johann Heinrich Schultz dêcouvrit qu'des composés d'argent lus nièrchithaient s'lon la lueu, mais i' n'avait pon d'mouoyen d'arrêter la nièrchithie. Joseph Nicéphore Niépce fit sèrvi chutte dêcouvèrte pouor faithe des portrait pouor la fîn du 18e siècl'ye et pouor 1824 il arrivit à fidgi des portraits faits par la lueu du solé pouor 8 à 20 heuthes. Louis-Jacques-Mandé Daguerre affinnyit la technologie pouor 1839 - san dadgèrrotype (daguerrotype) d'vînt populaithe pouor les portraits d'pèrsonnes, ouaithe qu'i' fallîsse rester sans r'muer bein longtemps pouor êt' photographié d'même, et qu'châque dadgèrrotype fûsse un portrait à san tout seu qu'nou n'pouvait pon copier.
En 1841 William Fox Talbot, tch'avait dêjà expéthînmenté dans la photographie sans faithe d'la publyicité pouor ses êfforts, întroduîsit l' calotype - eune manniéthe dé photographe sus du papi couvèrt d'composé d'argent tchi faîthait sèrvi un négatif. Ch'fut les preunmié photographes praticabl'yes qué nou pouvait r'produithe.
[amendaer] Gal'lie
 un dadgèrrotype |
 un négatif |
 un photographe à yi d'paîsson |
