Catania

Di Wikipedia, l'enciclopedìa lìbbira.

«Melior de cinere surgo»

«Megghiu di prima rinàsciu di li me cìnniri»

---

Catania è na cità di 307.774 abbitanti, capulocu di l'omònima pruvincia. Situata ntâ costa urientali a mitati ntra Missina e Sarausa, ê pedi di l'Etna, è la secunna cità dâ Sicilia pi dinzitati abbitativa.

Ìndici 1 Clima e Sucità 2 Storia 2.1 Èbbica pri-greca 2.2 Èbbica greca 2.3 Èbbica rumana 2.4 Tirrimoti e eruzzioni a Catania 2.5 1693 – La terra trema 2.6 Megghiu di prima rinàsciu 3 Econumìa 4 Cultura 5 Tradizzioni 6 La parrata catanisa 7 Cosi di Catania 8 Viditi puru

[cancia] Clima e Sucità

Catania ntô nvernu havi nu clima miti e di sòlitu havi picca brutti jurnati di ghioggia; la timpirutura di jornu si manteni ntornu a 14° C. e non è diffìcili ca arriva macari a 20° C.; nta la stati la timpiratura duranti lu jornu pò superari li 40° C, ma, pi furtuna, di sira l’aria arrifrisca.

Di stati si pò attruvari rifriggeriu cu li bagni a mari a la scugghera o a la plaja: la scugghera è di furmazzioni làvica e ncuminza di Catania cità nfinu a Ripostu, mentri la plaja è fatta di na vintina di chilòmitri di rina, ca parti di Catania e và versu Sarausa.

Ntô lungumari di Catania, furmatu di scugghera, lu cumuni ci misi tanti passarelli ca vannu nta piattafurmi, ditti “solarium ” (sunnu quarchi sei nta tuttu lu lungumari) unni un cristianu si pò mèttiri a pigghiari lu suli; c’è misa na scaletta ca di lu “sularium” porta rittu-rittu nta lu mari, a moddu a l’acqua. Nta un paisinu nicu-nicu, misu nta ssu lungomari, e ca si chiama San Giuvanni Li Cuti (ora, ê nostri tempi, è nziritu nta un quartieri di la cità, mentri na vota era nu paisinu di piscatura), lu cumuni ci fici na spiaggia cu la terra ca cascò nta la citatì quarchi annu fa di lu vurcanu. (Tutta la pruvinza fu jincuta di na pòlviri suttilìssima di terra nìura ca vinìa mannata nta l’àutu a ogni sprusioni di la vucca di l’Etna e li cristiani caminàvanu ntê strati, nta la stati, cu l’umbrella). Nunca, nta stu paisinu, ci fu misa tutta ssa terra e ci fìciru na bedda e suggistiva spiaggia di rina nìura.

Sempri a la scugghera, si pò jiri nta unu di li tantìssimi lidi (stabbilimenti barniari) ca jìnchinu tutta la costa, di Catania finu a lu Casteddu o a la Trizza.

Si non si sapi annatari bonu, oppuri si si voli jucari a tambureddu, a palla a volu, o nta n’àutru modu pi ngannari lu tempu ntra nu bagnu e l’àutru, allura si va a la plaja. Chista, ncuminzannu di Catania e finu a lu Simetu, è china-china pi quarchi deci chilòmitri di stabbilimenti barneari.

Di sira, Catania, arifrisca! Allura, ognunu nesci di casa e si va “a pigghiari lu friscu”:

Cu voli fari na cosa viloci, si nni va a lu lungumari, passìa, ncontra n’amicu e si fa quattru chiàcchiri, si pigghia nu gilatu nti Ernestu, o ntô Cafe De Paris, oppuru si l’accatta ntô gilataru cu carrittiu; si pò fari macari na passiata ‘n centru, a Via Etnea, a pigghiari na vippita o cioscu; oppuru si pò jiri a la arena (cìnima apertu) a vidiri nu firm;

Si ssi havi chiù tempu, si va cu la màchina o a parti di mari, agghiri ô Casteddu, â Trizza o a Jaci, unni ci sunnu na grannìssima quantità di pizzerìi, gilaterìi, risturanti, discutechi a l’apertu, oppuru si pò jiri versu li paisi etnei, a Gravina, Mascalucia, Niculosi, Pirara, a Zafirana, unni macari chisti sunnu chini di gilaterìi, pizzerìi, risturanti, e tantìssimi chiazzi pi stari ddà a “pigghiari friscu”.

Ntô restu di l’annu, Catania è arrusbigghiata macari di notti: lu centru stòricu è sempri chinu di genti ca affudda na grannìssima quantità di pizzerìi e pub, unni si esibbìscinu tantìssimi gruppi musicali, ca hannu fattu ri-battizzari Catania “la Seattle di l’Italia”.

Oltri a jiri a manciari quarchi cosa ntê pub e sèntiri nu pocu di mùsica, ci sunnu tantìssimi tiatri, unni, si esibbìscinu tutti li maggiuri cumpagnìi tiatrali taliani e tiatri unni dùnunu cummedi dialittali, o tiatru d’avanguardia, o avan-spittàculu, o cabaret; ci sunnu tantìssimi cìnima; ci sunnu dui booling; ci sunnu pisti di pattinaggiu; ci sunnu tantìssimi discutechi; ci sunnu assai pizzerìi e risturanti cu la pista pi l’abballu oppuru cu lu pianu-bar; ci sunnu cìrculi curturali; cineforum…..

A Catania, si pò nèsciri dâ casa e èssiri sicuri d’accuntrari quarchi amicu cu cui passari la sirata.

[cancia] Storia

[cancia] Èbbica pri-greca

2000 a.C. - Li Sicani / XI sec.a.C. - Li Siculi

La prima pupulazioni ca si stabbilìu nta vari punti di lu tirritoriu etneu fu chidda di li Sicani.

Versu lu XI sec. a.C. arrivaru macari li Sìculi, ca vinìanu di l'Italia cintrali, e scacciaru li Sicani.

[cancia] Èbbica greca

729/278 A.c. - Secunnu nzoccu scrissi lu stòricu grecu Tuciditi, Catania la funnaru nta lu VIII sèculu a.C. culoni greci ca vìnniru dâ Calcidia, nta l'Eubbea, guidati di Evarcu: chissi, doppu ca funnaru Naxos ntò 734 a.C., cuntinuaru la caminata agghiri sud e, battagghia dopu battagghia, sguminaru li Sìculi criannu li dui cità di Liontini e di Catania. Chiamaru sta cità "Catania" dô grecu "Ka Etnea" (zoè "suttu l'Etna") o, comu dici n'àutra vuci (secunnu lu stòricu grecu Plutarcu), "Katene" (ca 'n grecu anticu significava "grattarola" - zoè "grattuggia" 'n talianu - pirchì lu tirrenu unni idda fu custruita, pi causanza dâ sciara di l'Etna, è aspru e gratta propriu comu na grattarola): di st'èbbica ricurdamu Caronda, chi fu nu cèlibbri liggislaturi. Di lu 476 a.C. nfinu a lu 278 a.C., Katene è quasi sempri sutta lu duminiu di Sarausa, ca havi addivintatu nà putenza militari.

[cancia] Èbbica rumana

263 a.C. – 476 d.C. - Cu la cunquista rumana dò 263 a.C., a li nizzi di la prima guerra pùnica, ncuminzò pi Catania n’èbbica di quarchi setti sèculi unni idda pigghiò granni mpurtanza e pristiggiu, finu a lu puntu ca ntô IV sèculu d.C. lu pueta gàllicu Ausoniu, paragunànnula a Sarausa, la metti ntra li primi centri di lu mperu rumanu.

Catania diventa cità decumana, suggetta a pagari la dècima parti di li sò produzzioni; appoi, ntô 21 a.C., pi vuluntà di lu stissu mpiraturi Augustu, comu segnu di ricunuscenza pi l'ajutu ricivutu quannu chistu havìa luttatu contru Sistu Pumpeu, Catania divintò culonia Rumana.

Fu dutata di tiatru e di termi, di lu foru e di lu circu, di lu ginnasiu e di l´anfitiatru, e macari di nu granniusu acquiduttu; ntô mentri si abbissàvanu li difici di lu pirìudu grecu, ca avìanu statu danniggiati di tanti guerri e tanti dispatti avuti cu li sarausani.

[cancia] Tirrimoti e eruzzioni a Catania

Di sta funnazzioni la cità havi statu distrutta dâ lava pi setti voti ntâ storia, e sutta la cità di oi, s'attròvanu la cità Bizzantina, la cità Rumana chi la pricedi e chidda Greca, ancora prima.

Fu distrutta ntô 1169 e ntô 1693 dî tirrimoti e dî culati di lava ca hannu arrivatu nzinu ô mari Joniu. Di particulari mpurtanza fu l'eruzzioni dû 1669.

Oi, la punta cchiù àuta di li mmenzi anfiteatri Grecu e Rumanu si tròvanu ô liveddu dâ strata, e si pò macari scìnniri sutta, e caminari ntê tunnel ca nun hannu mai statu mappati. Lu pirìculu di esalazzioni di gas vilinusu o di ncuntrari genti malintinziunata è àutu, e si scunzigghia di avvinturàrisi nta sti labbirinti.

Ô cuntraru di chiddu chi si penza, Catania è bagnata di nu ciumi: l'Amenanu ca scurri suttuterra e ca si pò vìdiri scùrriri nta la "Funtana dell'Amenanu" ntâ "Piazza Duomo" accantu ô Liotru. Prima dô 1669 l'Amenanu scurrìa n menzu a la cità, ma quannu la muntagna spasciau Catania accuprìu macari lu ciumi e lu lagu di Nicitu ca era unni ora surgi la Piazza Santa Maria di Gesù.

[cancia] 1693 – La terra trema

• L'ùrtima distruzzioni di Catania

[cancia] Megghiu di prima rinàsciu

• Ricustruzzioni

[cancia] Econumìa

Catania havi nu portu cummirciali, n'ariuportu ntirnazziunali (saputu sèntiri comu Fontanarossa ca è lu nomi dû quarteri unni s'attrova), stazzioni firruviari statali (lìnia Missina-Sarausa, Catania-Gela, Catania-Palermu) e non, comu la Circumetnea, lìnia a scartamentu ridottu chi gira pi 110km tornu tornu a l'Etna agghicannu a 976 m s.l.m. pi poi scìnniri, e truvari la costa n'àutra vota a Giarri-Rispostu ô nord.

[cancia] Cultura

La prima universitati siciliana vinni funnata a Catania ntô 1434 grazzi a Alfonso V d'Aragona. Cammora è una di li cchiù granni e mpurtanti d'Italia: ci studìanu 66.000 carusi, chi vèninu di tutta la Sicilia.

A Catania nasceru Giuvanni Verga, Luiggi Capuana e Federico De Roberto, ntra li megghiu scrittura taliani dû sèculu XIX. Verga fu lu megghiu scritturi verista, cu lu rumanzu I Malavoglia. Ntra li pueti ca usaru lu sicilianu, ci sù Bartolomeo Asmundo, Domenico Tempio e Ninu Martoglio. N'àutru scritturi veru mpurtanti fu Vitalianu Brancati ca scrivìu macari lu libru "Il bell'Antonio"; ntô 1960 lu riggista Mauro Bolognini fici un film supra sta storia cu Marcello Mastroianni e Claudia Cardinale. Chissa fu a primu pillìcula girata tutta a Catania unni si pò vìdiri la città com'era nti l'anni sissanta.

Catania è macari la patria di Vicenzu Bellini, auturi di La Norma e àutri cumpunimenti musicali. Li cantanti Franco Battiato, Carmen Consoli, Gianni Bella, Marcella Bella, Mario Venuti, Vincenzu Spampinato, Mariu Biondi, Gerardina Trovato, Umbertu Balsamo e I Beans (Pier Paolo Cristaldi, Carmelo Morgia, Pippo Panascì, Tony Ranno e lu novu ca trasìvu Alex Magrì) sù tutti catanisi. N'àutru granni dâ mùsica catanisi è Brigantony, ca è lu patri dâ mùsica pupulari doppu l'anni '70/'80. Appressu a iddu arrivaru Giuseppe Castiglia, li Brigantini e àutri novi gruppi: Sugarfree, Lautari e Archinue'. Lu gruppu musicali Uzeda nascìu macari iddu a Catania e addivinìu lu gruppu europeu cchiù mpurtanti dâ scena nnipinnenti a Seattle duranti la mità di l'anni nuvanta, cammora dui di li membri origginali dô gruppu nni fìciru n'àutru ca si chiama Bellini, macari iddu veru famusu ntô cuntinenti e 'n Amèrica macari, pi fàrici omaggiu ô granni cumpusituri catanisi.

È la cità a cchiù àuta dinzitati tiatrali dâ Sicilia. Diversi cumpagnìi tiatrali òpiranu, travàgghianu e si fannu canùsciri ntô cuntinenti.

[cancia] Tradizzioni

Catania è puru la patria di Sant'Àita, vissuta ntô sèculu III, assicutata dî rumani prima di l'Edittu di Custantinu e oi patrona dâ cità. Ogni annu, a frivaru è festa granni cu cirimoni, prucissioni e manifistazzioni vari.

[cancia] La parrata catanisa

Ntâ parrata catanisa, tutti li palori ca cuntèninu na doppia "r" nni pèrdinu una:

- "guerra" veni prununzata "guera"

- "terra" veni prununzata "tera"

- "serra veni" prununzata "sera"

[cancia] Cosi di Catania

• Liggenni, pirsunaggi, stori e cunti e cosi di Catania.

[cancia] Viditi puru

• Cumuni dâ pruvincia di Catania
• Etna
• La squatra di palluni dû Catania

Nta Commons s'attròvanu àutri mmàggini rilativi a Catania.