Muschea
Di Wikipedia, l'enciclopedìa lìbbira.
La muschea è lu locu di cultu pî fidili di l'Islam. La palora taliana diriva dirittamente dû spagnolu "mezquita", a sô vota urigginata dâ palora àrabba "masjid" ca ndica lu locu ‘n cui si còmpinu li sujùd, li prustirnazzioni ca fannu parti dî muvimenti ubbligatori c’havi a còmpiri lu fidili uranti.
Un tipu di masjid particulari è la masjid jàmi‘, la muschea "cuncricazziunali" unni è auspicàbbili pi l'Islam ca si radùnanu cullittivamenti li fidili p’adèmpiri a l'òbbricu dâ prijera ubbricatoria (salàt) dû menzujornu (zuhr) dû venniridìa.
‘N quantu locu di prijera la muschea nun havi elimenti ndispinzàbbili. È nfatti pussìbbuli prijari videmma a l'apertu, o dentru na casa quarsiasi, purchì lu tirrenu sia dilimitatu di quarchi uggettu (tappitu, mantellu, sassi) e sia puru. Chistu pirchì, pi tutti l’atti privisti dâ Liggi islàmica (sharì'a), è addumannatu lu statu di puritati ligali (tahàra), uttinìbbuli cu lavacri parziali o tutali dû corpu, mentri lu locu dâ prijera havi a èssiri esenti d’evidenti lurdaria ca putissi cuntaminari cu cû tirrenu havi a aviri cuntattu, comu appuntu succedi ntâ salàt.
La muschea nn’havi nu mihràb (sorta d’absidi o nicchia ca, ntê muschei cchiù umili, pò èssiri simpricimenti disignata) ca ndica la dirizzioni di Mecca (qibla) e dâ Ka‘ba ch’è cunziddirata lu primu santuariu musurmanu didicatu ô cultu di l'ùnicu veru Diu (Allàh).
Puru nun essinziali, na muschea nn’havi videmma un pulpitu (minbar) di l'àutu dû quali nu particulari Imàm ca si chiama khatīb, prununza la khutba, n'allucuzzioni zoè ca nun nicissariamenti pruponi l'esèggisi di brani dû Curanu.
Pirchì la prijera sia vàlida chidda havi a èssiri cumpiuta ‘n pricisi mumenti dâ jurnata, scannuti di l'annamentu apparenti dû suli. Pi chistu nu spiciali ncarricatu (muezzin, di l'àrabbu mu'adhdhin) arricorda di l'àutu di na custruzzioni a turri (minaretu, di l'àrabbu manār, "faru") midianti nu richiamu rituali sarmudiatu (adhān) ca di ddu mumentu ‘n appoi è ubbricatoriu prijari (‘n casa, a l'apertu, ‘n muschea). Pi cu s’attrova arrassu dû minaretu e nun pò pi quarsiasi mutivu ùdiri la vuci dû muezzìn - oi aiutata pi lu cchiù d’autuparranti - si sciurìnanu talora anchi panni janchi, bonu visìbbuli macari di luntanu.
Pî nicissitati dâ purificazzioni, sia ô nternu sia ntê mmidiati adiacenzi dâ muschea è spissu prisenti na funtana. Mpurtanti è nfini l'area dâ prijera (musalla), tinninziarmenti rittanculari pi cunzèntiri a l’uranti d’urdinàrisi ‘n fili e ranghi, ô cui nternu pò èssiri prisenti nu rulogghiu ca ‘n tanti accasioni è d’antica fattura, ùtili a assignalari lu tempu c’arresta pirchì è vàlida la prijera.
Carattirìstica d’ogni muschea è la mancanza di raffigurazzioni umani o armali, ‘n quantu ustiati di l'Islam. Li dicurazzioni sunnu pirciò di tipu fitoformi (ligati zoè ô munnu viggitali) e, quasi sempri, sunnu prisenti cu virseddi dû Curanu trazzati cu calligrafìi cunziddirati particularmenti "artìstichi" ca dèttiru a l'Uccidenti modu di parrari d’ arabbischi.
[cancia] Muschei in Sicilia
Ntâ Sicilia tra lu 831 e lu 1072, Palermu fu la capitali di n'emiratu. La riliggioni ufficiali fu l'islam, e secunnu la tistimunianza di Ibn Hawqal, c'èranu 300 moschei sulu a Palermu. Di lu piriudu àrabbu, restunu in Sicilia armenu li rùdiri di 3 moschei: una a Sperlinga, una a Segesta e una a Rumetta.
[cancia] Vuci currilati
- salàt
- mihràb
- minbar
- minaretu
