Verri
Di Wikipedia, l'enciclopedìa lìbbira.
Verri dû sò nomu n latinu Gaius Verres (120– m. Marsigghia 43 a.C.), fu nu maggistratu rumanu, passatu â storia pi lu malucuvernu dâ Sicilia tra lu 74 e lu 70 e pû prucessu contra cui appi Ciciruni comu abbucatu dê cità siciliani.
Cu lu duminiu rumanu ncuminza pi la Sicilia l’èbbica nfinita di li duminazzioni straneri ca, cchiù ca amministrari l’Ìsula, l’hannu usata, mungiuta e disbuscata a propiu vantaggiu. Li Rumani nni fìciru la prima “pruvincia” di l’Imperu, palora ca tannu nnicava chidda ca oggi chiamàssumu “culonia”. Guvirnatura di li pruvinci èranu procònsuli o pro-pritura, zoè ex cònsuli o ex prutura ca vinìanu estratti pi surteggiu a la pruvincia d’amministrari. Verri arrivò nta Sicilia ntô 73 a.C., a l’etati di 42 anni, comu pro-prituri. Avissi duvutu guvirnari pi n’annu, ma lu mannatu vinni prurugatu pi àutri dui anni picchì lu succissuri era mpignatu a cummàttiri contra a Spartucu e la rivorta di li schiavi.
S’havi a diri ca li ex cònsuli e li ex pritura s’havìanu rifari di li costi di la carrera pulìtica ca li avìa purtati a li càrrichi cchiù àuti di lu statu, ma Verri avìa propiu n'ussessioni pi li cosi di l’àutri, spiciarmenti si beddi, prizziusi e artìstichi. Arrubbava a li pòviri comu a li ricchi. Cu li cuntatini usava lu sistema di lu prilevu fiscali, cangiatu di iddu nta na salata e sistimàtica estursioni; cu li ricchi avìa nu prucidimentu cchiù sufisticatu, ca facìa cu la cumpricità di li maggistraturi: facìa accusari, prucissari e cunnannari li pirsuni ca pussidìanu beni e ricchizzi e, appoi. cunfiscava o accattava a prezzi strazzati tràmiti li prestannoma
Mpussìbbili ca di Roma putissi arrivari lu sò licinziamentu: a Roma di sti pruvinci, comu di l'àutri, ci ntirissava sulu li tribbuti, la leva militari e lu granu. Ntô 70 a.C., nu annu doppu ca partìu di la Sicilia, li siciliani truvaru lu modu di minnicàrisi di Verre. Ci dèsiru lu ncàrricu a Ciciruni (ca avìa statu macari iddu ntâ Sicilia comu quisturi a Marsala ntô 76 a.C.) di arriccògghiri li provi e sustiniri l’accusa di cuncussioni nta lu giudizziu. Ciciruni fici nu travagghiu bonu: nun tantu picchì li urazzioni contru Verre (nta na bona parti scritti doppu lu prucessu) addivintannu nu cèlibbri saggiu littirariu, quantu pirchì èppiru la vittoria a primu corpu.
Lu 5 Austu di lu 70 a.C. ncuminzò lu prucessu cu l’urazzioni ntruduttiva di Ciciruni e li primi tistimunianzi ca cuntinuaru pi na simana.
Lu jornu 7 Verre si desi malatu e nun si prisintò chiù ntô prucessu. Lu 13 lu prucessu vinni spustatu a lu 20 di sittèmmiru, ma quarchi jornu prima Verri scappò di Roma e s’ammucciò nta l’esiliu vuluntariu.
Verri rapprisenta la virsioni littiraria di cuncussori, ma simmuleggia macari lu dramma veru di la Sicilia: chiddu di èssiri guvirnata di Suvrani ca vivìanu luntani e ca diligàvanu l’amministrazzioni di l’Ìsula a li sò Guvirnatura, Riggenti e Viciré.
