Aiuto:Guida esenzsiałe/Modificare

Da Wikipedia, ła ençiclopedia libara.

Modificar łe pajine

Scumizsion examinando ła carateristica pi importante de wiki: modificar el testo. Fora che pochisime pajine che no se pol tocar, ogni pajina de Wikipedia ła ga na łengueta pa sora co ła scrita "modifica". El xe un link che permete de far proprio quel ch'el disz, che saria modificar ła pajina che te si drio vardar. Siti internet come sto qua, dove che ognun pol modificar quałunque roba, i xe conoszui come wiki. Prova! Verxi sta pajina qua: Pagina delle prove, e fa clic sul link modifica. Te vedarè el testo contegnu suła pajina: scrivi calcozsa e dopo salvało: te podarè vedar subito el risultato. Te catarè altre spiegazsion su come modificar łe pajine lexendo Come se modifica na pajina: te pol verxarla su na finestra nova, e intanto 'ndar vanti co sto tutorial.

Ogni volta che te vorè far prove de quałunque sort, te podarè farlo sempre suła pajina fata aposta, cioè ła Pajina dełe prove.

Mostra l'anteprima

N'altra funzsion importante che te pol usar da subito ła xe Vixuałixa anteprima, che ła te fa vedar el risultato dełe modifiche che te ghè fat senzsa salvar ła pajina na volta par tute. Prova a modificar ła pajina dełe prove, e dopo fa clic sul boton Visualizza anteprima. Dato che se pol sbagliar tuti, sta funzsion qua ła permete de sistemar i sbagli subito senzsa che i sia riportai suła pajina vera e propria vixuałixada dai utenti, sparagnando cuzsì tempo e fadiga sia a ti che a cheł'altri wikipediani. Par de pi, l'anteprima ła te consente anca de cambiar ła formatazsion deła pajina prima de salvarla, finché no te par che ła sia giusta. Abituarse a usar l'anteprima xe importante specialmente co te pensi de far pi modifiche drio man, sopratuto de poco conto, parché sia pi ciara e consultabiłe ła cronologia deła pajina. Se invezse te modifichi parti grande de testo, zserca de farlo in pi paszi drio man (par esempio modificando e salvando na seszion par volta), de modo che cheł'altri i pozsa seguir pi faszilmente l'andamento dełe to modifiche. Salvar na sezsion par volta el xe anca un modo pa' evitar i confliti de edizsion, che i capita co do utenti i zserca de modificar ła stezsa pajina inte'l stezso tempo.

Modifiche minori

Se te ghè fat log-in come utente registrà, te pol indicar che łe modifiche che te si drio far łe xe minori sełezsionando ła caxeła aposita suła pajina de modifica prima de salvar. Sto fato qua el serve par mostrarghe a cheł'altri utenti che łe modifiche che te ghè fat no łe xe de sostanzsa. No ghe xe regołe precise par decidar se na modifica ła sia da considerarse minore o no; de seguro minori łe xe łe corezsion ortografiche e i ritochi de formatazsion (par esempio, xontar un wikilink o un spazsio). In poche parołe, cambiar l'aspeto visivo xe speszo na modifica minore, invezse cambiar el contenuto tendenzsialmente no: comunque, se te ghè dei dubi no sta sełezsionar el box. Par na spiegazsion pi precisa, te pol lexar Modifica minore.

Ogeto deła modifica

Prima de strucar Salva la pagina, sarìa na bona roba xontarghe un comento de riasunto dełe modifiche fate inte'l campo Oggetto, che te pol vedar tra ła finestra de modifica e i boton de visuałixazsion anteprima e salvatagio. El comento el pol ezsar anca curtisimo: par esempio, se te ghè solche trasformà na paroła in un wikilink, te pol scrivar "wikilink". El contenuto che te ghè mes dentro el iuta cheł'altri a capir se łe corezsion łe xe minime opure de sostanzsa.

Adesz se pol ndar vanti esaminando in breve ła formatazsion.