Wikipedia:Ciacołe

Da Wikipedia, ła ençiclopedia libara.

Questo l'è el bar de Wikipedia. Maca qua pa' zontar un nóvo comento

Pa' vedar łe ciacołe vècie, varda in tel'archivio:

• Archivio Ciacołe fin al 30 Giugno 2006
• Archivio Ciacołe 1 Lujo - 31 Diçenbre 2006

Indice 1 Bisiacarìa - dialet bisiàc (o bixiac) 2 in generae - da na padovana de nasita 3 mitici!! 4 bar o hostaria? 5 Labiovełari 6 Par un bot 7 El Leon de San Marco 8 ciao bełi 9 Convenzsion 10 Vixentin a raporto 11 Belun 12 Raduno a Padova 13 ga da esser 14 wei tosi, so chì anca mì 15 La vosse Vicensa e altre astrusità 16 Triestin 17 Agiornamenti 18 Novo progeto 19 Cassegio 20 Admin 21 28 de marzso del 2007: data stòrica par ła łéngua vèneta 22 Varianse e... par condicio

[modifica] Bisiacarìa - dialet bisiàc (o bixiac)

Salve muli! Me presento, son Ricardo; son novo de ste parti (wiki). Me pare xe de Treviso ma mi son nato e vivo a Mòfalcon (Gorizsia). Come notarè no scrivo in veneto ver e propio, ma scrivo in bisiàc; el bisiàc al xe un dialèt par conto suo, sai viszin al triestin (che go vist che al xe riconosù in tale varianti del veneto). Qua ta stò link xe spiegà do robe su la Bisiacarìa. Paxina de Wiki par taliàn. Mi ve vorìa domandàr se podezsi zsontàr drent o viszin ale voxi "Venezsia Julia" ste do robe su la Bisiacarìa e sul dialèt bisiàc, vist che semo 'na realtà par conto suo; magari propio scrite in bisiàc de quel vero, un poc' più strent del mio (par far sta roba me pol iutàr qualchidun de quei "studiài" del bisiàc tradiszional, che i scrive xà su Bisiacaria.com, un nostro portàl. Bastarìe anca sol la traduzsion de la paxina che esiste par taliàn, giust par dir che ezsistèmo!

P.S. dès che penso a le regule de scritura, forse "bisiàc" e "Bisiacarìa" andassi "bixiàc" e "Bixiacarìa", anca se noi no lo vèmo mai doprà in sta maniera!

Grasie par l'atenzsion!!

Ricardo. --Sentàmbul 01:21, 6 Gen 2007 (UTC)

Ti poadrési farlo ti, e zà che ti ghe xe darne na man par tuto el resto! :) Maximillion Pegasus ^{>Vustu qûalcosa?} 17:58, 6 Gen 2007 (UTC)

Ciao Ricardo, e benvegnù in sta gàbia de mati! Se te vol scrivar sul bixiac, no ghè problema, anzsi, no ghè mia bisogno che te ne domandi el permesso! :) qua drento tuti i contributi iè ben accetti! LV~El me diga, sior 10:37, 7 Gen 2007 (UTC)

[modifica] in generae - da na padovana de nasita

ma varda che beo, trovarse co tute ste pasene de Wikipedia in diaeto veneto (anca se ghi né proprio tanti, quanti che xe i paesi e e province del Veneto. Mi so usa scrivere i me mail de famegia in dialeto nostro, ma so costreta bastansa speso a inventarme ea grafía sercando de ricordarme a pronuncia. E i dubi resta cio. Grasie comunque a tuti quei che se ga impegnà a fondo so ste pasene. go tanto caro. Lucia par deso in meso ai foresti de Surigo. Se sentimo sente!

[modifica] mitici!!

heila gente, so na butela de poco piú de vint'ani e son ná via dal me paese. casa mia no la me manca pi de tanto ma ogni tanto me godaria poder parlar en pochetin en dialeto parché chi no ghé nisuni che me capisi se proo a parlar ne la lengua che má ensegná me papá e me mama. son capitá chi par caso e so stá propri contenta de vedar che qualcheduno ghe tegni ancora al dialeto. vegnaró ancora a vedar come va avanti le robe, g'ho anca en libro de poesie en dialeto che parla del me paes, magari ve le faró lesar quande che le cato. brai brai, né ennansi cosí che fé propri ben.

[modifica] bar o hostaria?

Parché no ghe a mołemo de dir "bar" e tachemo dir "hostaria" come che fa a xente normałe?

Ciao a tuti.

Giordano da Treviso ('deso espatrià in Catałogna).

[modifica] Labiovełari

Mi no me piaze miga che vegna canbià tuto senzsa prima far na votazsion. Quindi, Achiłou, prima de 'ndar vanti a canbiar łengua in łengoa no se podaría domandàrghe a qûalchidun altro? Anca parché questa saría n'altra modifica a ła convenzsion de Brunelli, che invezse che sinplifegar cofà tute łe modífiche che gavémo fato fin 'deso conplica e robe. E po', no se pol modifegar soło che łengua, bexognaría canbiar tute łe labiovełari. Speto pareri. Maximillion Pegasus ^{>Vustu qûalcosa?} 18:32, 25 Gen 2007 (UTC)

So stà mi scuminzsiar canbiar "łéngoa" (e anca "łengoa") co "łéngua", te pol vardar ti steso ła cronołogìa. Gavéa scuminzsià cofà che ghe jera scrito qûi: Łéngua vèneta (el tìtoło ufizsiałe deła vóxe, no un redirect) par crear la Categoria:Łéngue e ficarghe drento qûeło che el ghe stava. Ma na łigadura ła tira n'altra łigadura e via cusì, mi pensava che łe fuse dó robéte ma co che so' rivà ała pàxena prinzsipal e gò descoverto che no łe jera dó robéte gò preferìo tornar indrìo cofà che ghe jera zà scrito prima.

No so' drìo canbiar tuto, so' drìo tornar indrìo, e par indeso gò anca finìo; gò canbià soło qûełe robe che gavéa creà o zontà mi e qûełe dó robe che gavéa canbià mi steso da "o" a "u". No gò canbià gnente de qûełe robe che jera zà "u" prima che rivése mi.

--Achiłou 22:47, 25 Gen 2007 (UTC)

[modifica] Par un bot

Vardando sta voxe noto che ghe xe na granda qunatità de £ ał posto de ł. Io no xe bastanzsa bravo par programà un bot che rimpiazsi tute łe £ come łe nostre convenzsiòn. Podarìa exer ùtiłe, no? Grazsie par ł'atezsion e me scuxo par mi vèneto. --Giovanni ^(dime) 21:38, 26 Gen 2007 (UTC)

Go vardà cossà ghe fà kaboot. --Giovanni ^(dime) 11:24, 30 Gen 2007 (UTC)

[modifica] El Leon de San Marco

Aeora ghe so ancha mi,me ciamo Giancorado e so nato a San Marco,el sestier "nobie" dea Serenissima Republica de Venesia. No ghe so più a Venesia dal 1968,ma go ncora ea casa dove so nato. Mi scivo come che parlo e no me piase ea "x".Me so pena segnà a stà bea compagnia de Veneti,orgogiosi de esser e de sentirse veneti dentro al cuor.Vegno daea Wiki italiana,dove gero segnà da pochi giorni,e dove go combinà qualche casin col copyrait,e so a scriverme che gavevo sbagià questo,che gavevo sbagià queo,i gaveva ragion,ma che... che ncora ancuo non go capio tanto ben,del resto a sinquantoto ani calcosa scampa,e no ti a ciapi più co tanta faciità.Se so rivà da vialtri el merito se de Nick1915,un bocia vaido e che no se trova par strada."spero di essere utile alla gentilissima combriccola. Voevo domandarve se i permesi per i copytigt,qua da nialtri,se i manda sempre a "permissions ecc.ecc". Ghe se qualche anima pia che pol dirmeo?

Un saeudo a tuta ea compagnia e che Dio ve daga del ben. --Ea spada del Leon 17:03, 1 feb 2007 (UTC)

[modifica] ciao bełi

ciao bełi, me racomando bon laòro che noaltri veneti semo forti!!! :-D Lorenso 02:49, 4 feb 2007 (UTC)

[modifica] Convenzsion

Go butà l'ocio su Categoria:Sritori latini... se scrivè così? Sritori? mi no lo gò mai sentio!--Nick1915 - dime quel che te vołi 19:44, 11 feb 2007 (UTC)

Categoria:Scritori łatini par mi xe pì giusto. --Giovanni ^(dime) 21:51, 12 feb 2007 (UTC)

Drío mi xe soło qûalchidun che ga sbałià. --Maximillion Pegasus ^{>Vustu qûalcosa?} 13:23, 13 feb 2007 (UTC)

[modifica] Vixentin a raporto

Vara ti sto bagolo, jera drio catar informassiòn pa' na presentassiòn a mi mighi de Croazsia ca i voe saver de do vegno, sta sità cancara pasua de meregani, e te soco su sta paxena... Grando e sgaio, speraria ghe fusse de pì. Mi sò naussuo a Marostega, ma me gà 'nparà el diaeto mi mighi dea canpagna co so stà ala università, ca me mare a xè siciliana, e mi no me gaà mai dito na paroa en Veneto pa' respetarla, donca se me lengoa a ve fa bao, almanco ghe proo. Bona fortuna.

[modifica] Belun

Mi avarie finì con la tradužion de Belun, elo posibile portar 'n te la wiki veneta le foto de l'articolo in talian? Elo chi l'anema bona? Sani se vedon! --Jacobus 14:26, 20 feb 2007 (UTC)

[modifica] Raduno a Padova

Ciao; semo drìo pensare a un raduno a Padova, bon par vedere la città ma anca par ciacołare e lavorare.
Se sìo interesai vardè ea paxena in it.wiki it:Wikipedia:Raduni/Padova - 2007, servarìa na man par organisare!

Ciao e grasie, piero tasso 16:34, 20 feb 2007 (UTC)

[modifica] ga da esser

ecome qua, saludo tuti, mi a sò un tipico prodoto del nordest: fiol de un gardesan e de una triestina, parenti trentini e furlani, nato a metà strada, nel padovan. la grafia la zè quel che zè: no me piase le x e doparo le z o altro come che casca. mejo sì ostaria che bar: el bar no zè veneto e gnanca inglese, chissà chi che gà inventà 'bar' pa ostaria.

gaveva da esser un fià mona :)

Xe ciàcołe, no bar ;) Se ciamava «bar» un mucio se tenpo fa sta pàzena. Ah, jero drío desmentegarme: benvegnúo. --Maximillion Pegasus ^{>Vustu qûalcosa?} 12:08, 21 feb 2007 (UTC)

bar xe scrito suła paxena prinsipałe! :) 208.168.227.238 03:46, 24 feb 2007 (UTC)

Ostrega, l'è vèra! Deso gò meso "Ciacołe" anca lì. Grazsie de vérneło dito! LV~El me diga, sior 13:31, 24 feb 2007 (UTC)

[modifica] wei tosi, so chì anca mì

xera ora che me notase, no ste ciaparme pai caveji se faso capee ma ghea meto tuta, sercarò de farve do tre paginete pa scumisiare, no conoso ben wichepedia ma no me spauro.. ghe meto na scianta a impararme tuto dopo faso fogo! :) :P :P

[modifica] La vosse Vicensa e altre astrusità

Ciao a tuti, gò canbià el linguagio dea vosse Vicenzsa, lo gò "vicentinixà": el parché lo gò fato lo rimando ala discussion dea pagina in merito. Premeto che non esiste la paroa "Vicenzsa" esiste invese "Vicensa" almanco pai vicentini (e non vixentini... i vicentini fra de lori no i se ciama serto vixentini, forse nel Setesento!). La pagina la xe scrita in un dialeto che no esiste più, sgramaticà, con la ł polaca (cuando invese in vicentin la xe a volte muta a volte marcà...), con invension ridicoe e arcaismi che non gà nesun valore storico e sientifico. Provemo a rendere sta wiki non nostalgica de 'na lingua che no parla pi' nessun, o pexo inventà de sana pianta o parché la sona ben (in vicentin a esenpio xe "ciacoare" e non "ciacolar"!). Alcune paroe poe aver la dopia, cuesto poe metarne al riparo da spiacevoj equivoci (Bisi e Bissi ad esenpio - par non parlare del'equivoco con bixi che xe 'naltra roba uncora). Dovemo prima de tuto farse capire! Le cosidete convension dea cosideta lingua veneta le xe svariate, questo dimostra, al de là dei nobili sforsi, che no esiste 'na lingua veneta uniforme: lo savemo (quasi) tuti! Esiste una richessa de varianti che xe stupido negare, oltre che danoso par chi voe farse un idea de queo che xe el Veneto uncò, dopo se volemo far folklore o gavemo la "sindrome de Adamo" che voe darghe par primo el nome ae robe, faxemo pure, ma gavemo falìo e tradio el letore. Serchemo invese de darse 'na regolada e de portare a emergere le varie peculiarità dei dialeti, l'unica lingua leteraria veneta, parché scrita, degna de sto nome xe el venesian, el resto xe dialetti NON SCRITI che se parla in microregioni al'interno del Veneto e cugini vari. Dopo ghe xe el veneto leterario, poetico in poche paroe, ma lì vige la licensa de poder sperimentare testualmente 'na lingua orae. Canbiemo la voce "Vicenzsa" in "Vicensa" cuesta la xe la me proposta, podaria esare l'inisio de un canbiamento de rota molto meno creativo e arbitrario e pi' vissin ala realtà... bon lavoro a tuti! Grassie. --Bacò 12:52, 8 mar 2007 (UTC)

Go capio, ma no podemo cambiar łe convenzsion ogni do minuti--Nick1915 - dime quel che te vołi 13:43, 8 mar 2007 (UTC)

(Méto anca qua queło che go zà scrito in Discussion:Vicenzsa)

Varda che no ti ghe xe miga soło che ti qua drento. E no ghe xe manco soło che vixentini (e scúsime, ma mi digo cusí, miga vicentini). Cosa pénsito, che no gavémo discuso ancóra di queło che ti dixi ti? Qua drento 'rmai squaxi tuti sa da dove che vien łe parołe che in itałian ga ła z sorda, tanto che ghe n'avémo parlà. E a ła fin vien fóra senpre che ła sołuzsion de scrívar cofà che se parla no va ben, parché no tuti capise, parché xe scoreto, parché se podaría łèzer mal...

'nsoma, qua drento ghe xe tuto el Vèneto, che xe una łéngua, canbia soło poca roba de pronunzsiazsion, e par darghe ła dovúa inportanzsa a tute łe varianzse se ga da scrívar cofà che tuti i vèneti pol capir e łezer cofà che i parla. --Maximillion Pegasus ^{>Vustu qûalcosa?} 18:06, 8 mar 2007 (UTC)

Caro Nick1915: la to risposta la mete in evidensa el limite de 'sta wiki veneta. No ghe xe una convension, 'na codifica unica, e non podemo farla nialtri salvo creare un frankestein che non esiste, se non cuà! El veneto, de solito, el vien identificà col venessian per forti raxon storiche, ma sopratuto leterarie. Mi cuà lexo acenti dapartuto, che inpedisse la letura, la rende dificoltosa, nonostante j intenti. Me dispiaxe fare un intervento a ganba tesa, ma sotostare a una decision tolta qua drento da persone che, con tuo el rispeto, non va al de là del so idioma e gh'in crea uno che non esiste pasandolo par "veneto" me senbra massa. Provocasion par provocasion, sto sistema non gà nesuna autorità, se ris'cia de rendere wiki un ricetacolo de monade pasà par lege. La parola Vicenzsa, no xe mai esistia e la esiste solo cuà. Scuseme, con amicisia sincera e amirasion pal lavoro fato! no ste rabiarve, ma le critiche a wiki le xe drio piovare da tute le parti (vedi Domenica del Sole 24 ore) e in molti casi no i gà torto, ognuno ris'cia de fare la so pissada, se j xe in bona fede, de riportare 'na roba restà in tea recia, sensa studi ae spae, e farla pasare par la Cultura. Na lingua veneta non esiste come che xe pal furlan, l'italian el francese, ala facia dee minime difarense. Xa tra Vicensa e Schio ghe xe dee difarense sostansiaj, con questo saria mejo avertire el letore che la vosse la xe scrita in vicentin, trevisan, venessian ecc... (come che xe xà sta proposto e previsto come gò visto: xe pronte dee categorie par dialeto e/o misto)così se rende un servissio al letore e se fa ciapare prestigio e autorevolessa al'articolo scrito, sbalio? --Bacò 19:15, 8 mar 2007 (UTC)

Caro Maximilian: la mia xe sta una provocasion, so ben che no ghe son solo che mi cuà. Acéto la critica, ma non me senbra che la to risposta vegna incontro ale mie de critiche. Che sia scoreto el modo de scrivare così xe pacifico, ma saria el manco: non esiste propio! Se pasa par na lingua i conpromesi dej utenti de Wiki, mi penso propio che no se possa ametere onestamente. Me pare el fruto de un ategiamento de chiusura che porta el progeto a falire soto bixantinismi come l'articolo su "Vicenzsa". Gò ciapà Vicenzsa par cognission de causa, ma lexate cueo che xe scrito in sto articolo cuà Indovineło Veronéxe, e dime se xe fruto de un studio o de un tentativo gofo de dare un'origine unitaria a una "lengua" unitaria, che po' no esiste. Me ripeto: el venessian xe una lingua, el vicentin no, romai xe un "dialeto vicentin del'italian", parlo dela sità, parché se te ve in provincia resta ancora peculiarità del un "dialeto veneto-vicentin". No par gnente la lingua dele lingue no xera un fantomatico veneto ma el "pavan" cioè una lingua comerciae padana, che ciapava el padovan come punto de partensa e incorporava altri dialeti afacià sul Po. Nel Sincuesento de Ruzante, parò. Cuindi? ripeto la me proprosta, la go fata nel me intervento precedente, el problema fonetico - che esiste - se poe superare in maniera più senplice ad esempio: "Vicensa" e fra parentesi cuadre la pronuncia fonetica: [Vicença] o se preferì [Vicenzsa], in uno spassio aposito o de fianco al titolo. Paxe. Ciao --Bacò 19:15, 8 mar 2007 (UTC)

Caro Bacò, no capiso el tó problema, o mejo, mi gò capìo sta roba qûi: ti te pensi che "Vicenzsa" la se gà da pronunzsiar propi /viˈʧenʦ.sa/, sbajo o gò capìo zusto? (Se gò capìo mal, lora scanzsea pur qûeło che so' drìo scrivar qûi de sota.)

No xe cusì; se gà da pronunzsiar /viˈʧen.sa/ o /viˈʧen.ʦa/ o anca /viˈʧen.θa/ parché ghè qûalcun che'l dixe asì. Xe propi par qûel che te dixi ti, che ghe xe tante varianzse deła nostra łengua, che par vegnerse incontra tra tuti noaltri che parlemo sta beła łengua.

Come che ghe jera scrito prima e come che ghe xe scrito deso da ti no ghe xe difarenzse inteła pronunzsia, ma ghe xe soło che difarenzse inteła scritura.

Qûeło che semo drìo zsercar xe propi de catar un mò nóvo da scrivar el vèneto vivo, parché, propi come che te dixi ti, el vèneto d'incò no'l xe pì el vèneto de Ruzante o el vèneto deła Serenìsima, e che no gà pì senso da scrivar con qûełe vecie convenzsion de na volta. E no gà gnanca senso da scrivar co łe convenzsion del tałian, che'l no ne da mò da scrivar [sʧ], o che no'l ne dà mò da distinguar [s] co [z] e [ʦ] co [ʣ].

--Achiłou 14:54, 12 mar 2007 (UTC)

Caro Achilou, grassie par averme risposto. Non son d'acordo col fato che Wikipedia deva asumarse un ruolo che ho ghe conpete, senò vien fora robe come "Vicenzsa": cioè, come gò xa scrito, un frankenstein che esiste solo in wikipedia. Difati no ghe xe nesun dissionario che pasa par scritura de un lemma el so fonema! un conto xe la pronuncia fonetica un conto xe el lemma coreto (par coreto intendo scrito da secoli che ghe giustifica la coretessa)! Vicenzsa xe una parola inventà de sana pianta, gò capio le bonissime intension, ma forse se dà un messagio sbaglià a chi che no xe veneto e capita qua e de conseguensa al de fora del vostro diabatito i pensa che Vicensa vaga scrita "Vicensza" in veneto. Pensa ala parola italiana "glicine" pur esendo na parola iregolare nesun se sognaria de scrivarla come che la se pronuncia, cioè gh'licine, mantenendo la g dura anca ne la so grafia! Questo xe un problema serio. No ghe xe una lingua veneta codificà leterariamente par motivi storici ben precisi e l'influensa de l'italian, volente o nolente, nel 2007 non la se poe scartare. Sopratuto se xe in nome de un rinovamento fato da un grupo de persone che lo condivide - legitimamente - ma che se autoghetiza faxendo così. La me proposta xe scrivare la vosse Vicensza, come la tradission insegna cioè Vicensa (l'è un esempio par tute le parole scrite in sto modo, letera ele barrà conpresa) e metare de fianco la letura fonetica (Vicença o Vicensza o viˈʧenʦ.sa). Questo xe cuanto, el mio, al de là del me linguagio colorito (del cuale me scuxo se gà ofeso cualche d'un), vojo portare in evidensa, mi scrivo in un dialeto vicentin de l'italian, parché questo parlo, e le codifiche, al de là dele particolarità, le deve rispetare - in linea generae - la lingua scrita magiore che i veneti del 2007 inpara e scrive come so "lingua mare-scrita": cioè l'italian (coxa che xe avegnù, par esempio, par el gaelico irlandese, o el croato, o el turco... che gà fato proprio l'alfabeto latino considerando regole fonetiche in uso in altre lingue europee che da più ani lo gaveva a propria volta adotà, ad esempio inglese e tedesco, o in riferimento ae lingue neolatine, romanxe...) e semplificarla - parlo dela forma scrita - , par mi, el pi' posibile come la insegna la recente riforma del tedesco scrito, eliminado orpej veci come el cucù, metendo le istrusion in nota o fra parentesi dove questo xe indispensabile, pur mantegnendo doverosamente le peculiarità dea forma linguistica. Dopotuto se uno voe scrivare come che el ghe pare, o come un grupo de persone gà deciso de comune acordo in barba a tuto el resto, el dovaria considerare el fato che, come minimo, el deve farse capire daj altri! Senò se và fora dae prerogative -sientifiche o parasientifiche- de wikipedia e se trasborda, o se ris'cia, de propore un progeto (pseudosientifico) che - idealmente - xe pi' vissin al'esperanto che al veneto in tute le so declinassion, parlà - uncò - nele varie realtà del Veneto. L'uniformasion del linguagio veneto xe pura utopia, la codifica secondo le regole del'italian scrito e avicinandose el pi' posibile ala pronuncia orae dele varie sfumature, la xe molto più interessante e pi' vissina ad un progeto enciclopedico e se informa j altri, veneti e non, dele difarense in uso, faxendo un servisio culturae. Me dispiaxe de esere l'unico a pensarla così. grassie par le ciacole A presto. --Bacò 11:47, 14 mar 2007 (UTC)

Caro Bacò. Se no te scrivi "zs" te gà da scrivar inte n'altro mò; na volta i gà adoparà "th", n'altra volta i gà adoparà "ss", n'altra volta i gà anca adoparà "ti"... xe senpre tute convenzsion (convenssion, conventhion, convention...), nisuna ła xe mejo, nisuna ła xe sbajà... nisuna ła ghe piaxe a tuti! Xe sto qûi el gran problema!

Xe vera mo na roba: ghe xe qûalchedun che in vèneto el dixe "Vicenza" o "Vicentha"? O ghe dixemo tuti "Vicensa"? No parché se nisun el dixe "Vicenza" o "Vicentha" el gà rajon Bacò! Se gà da scrivar "Vicensa"...

--Achiłou 09:48, 19 mar 2007 (UTC)

Caro Achilou, una "s" sola in sto caxo. Non son mi che lo digo che Vicensa gà da essere scrito "Vicensa", ma lo dixe documenti, testi, cartografie e l'uso comune de 600 ani a sta parte, schersemo? E proprio par questo la xe la più giusta proprio parché "veridica", al contrario dell'esercisio de stile "Vicenzsa", se no ve fidé produxo documenti in merito par amore de wikipedia. Se dopo volemo descrivare el fonema basta creare uno spassio aposito par la pronuncia, alora ghe sta tute le "zs, ç, th, ss" che se voe. Quindi la me proposta no la xe una convension che me son inventà mi... spero sia ciaro. Vicensa xe Vicensa almanco da quando ghe xe el dialeto vicentin. Spero che vegna considerà l'idea de cambiare la voxe definitivamente e de pore rimedio ad un tentativo de dixinformasion in tej confronti del'utente, che se fida par principio. a presto, e grassie par la disponibilità. --Bacò 12:44, 23 mar 2007 (UTC)

No me so' spiegà gnanca sta volta. Semo tuti d'acordo che inte ła łeteratura se gà senpre scrito "Vicensa". Ma inte ła łeteratura no se gà gnanca mai scrito inte ła convenzsion ciamà "grafìa vèneta unificà".

Donca gavémo da capìr come che se gà da scrìvar "Vicensa" inte ła "grafìa vèneta unificà".

--Achiłou 15:37, 23 mar 2007 (UTC)

Caro Achilou, te te sì spiegà benissimo, credame: el problema xe proprio sta "grafia veneta unificà" che non credo sia la risolusion del problema in sé. Forse, visti i risultati, xe proprio la grafia veneta unificà el problema da risolvere, primo fra tuti l'autorevolessa de sta grafia. Personalmente non credo sia questa a darne la risposta che serchemo. Ma questa discusion, interesante, come dimostra el riscontro dea toxa qua soto, la xe de interesse solo mio e tuo, purtropo. Ciao, --Bacò 05:39, 24 mar 2007 (UTC)

Salve a tuti. da brava pena rivà gò fato a prova sua sandbox prima de scrivar qua. Soeo che una volta salvà queo ghe gavevo scrito zè spario tuto:me despiase se gò creà qualche casin. Voevo soeo dire che sta conversassion su come se dize "Vicenza" la zè proprio bea e interesante. Mi sò dea provincia de Venessia e diria "Vicensa" sensa "th" o altro. Da na parte penso che ognun dovaria scrivar in base al diaeto del posto de dove el zè nato. e se scumisiemo a metter massa regoe grammaticai (lemmi e fonemi..ma cossa zè?) forse a gente se stufa anca de scrivar. Ma sensa regoe zè l'anarchia, chisà che riussimo a trovar na via de meso. Mi sò a prima a dir che sta vec.wiki sè na bombardada: scrivendo ste dò righe me so incorta de come l'italian ormai gà rovinà el diaeto, nel senso che de tante paroe no riusiria a scrivar a version in diaeto, me vien soeo quea in italian. Penso che perdar el uso del diaeto sia perder e nostre origini quindi ben vegna sta wiki in veneto! Se qualchedun gà qualche dritta da darme su come scomisiar a partecipare a sto progetto se el benvegnuo!Mentina --cossa ti vol? 09:40, 22 mar 2007 (UTC)

[modifica] Triestin

Xe qualche mulo triestin qua ?

[modifica] Agiornamenti

Ma parchè no ghe nisun che se ocupa del dialeto veronese, che l'è cussi tanto belo!!

Varda che nialtri qua scrivémo tuti 'nte ła nostra varianzsa...e cofà che tuti posa capir. --Maximillion Pegasus ^{>Vustu qûalcosa?} 22:03, 18 mar 2007 (UTC)

[modifica] Novo progeto

Podaria esare na bona idea fare un novo progeto: vec.wikitionary. Ghe se molte parole venete che non le deriva dall'itałian. Paolo ^{(el veneto wikipedian)}

Secondo mi se podaria far de manco visto che i sta proando de fare na specie de "wikizsionario totale" con tute łe łengoe. Se podaria scuminzsiarlo, ma coraresimo el rischio chel ne vegna sarà in poco tenpo--Nick1915 - dime quel che te vołi 19:42, 23 mar 2007 (UTC)

Nota molto inportante: no ghe xe nisuna paroła in vèneto che ła vien de l'itałian, parché el vèneto el vien direto dal latin!

Mi gò notà che el Brunelli isteso l'ha tirà fora www.dizsionario.it e no 'l xe un dizsionario "vèneto-vèneto" mo 'l xe un dizsionario "vèneto-itałian". Ghe xe altri siti fora che i gà fato isteso, ghe xe altri siti in Braxiłe che i gà fato isteso "vèneto-portoghexe". Donca ghe dago raxon a Nick, xe masa presto par un vec.wiktionary.

Parò xe zxusto par mi iscrivarse a it.wiktionary (es.wiktionary par i cipilegni e pt.wiktionary par i vèneti braxiłiani) e tirar sù pian pianeto łe nostre parołe (spiegà in itałian, spagnoło e portoghexe), e zxontarghe intełe traduzsion dełe parołe in itałian (spagnoło e portoghexe) anca ła traduzsion in vèneto. Mi so' zxà drio laorar cusì intel it.wiktionary, el me consejo xe che te fazsi cusì anca ti, parché no?

Mi me godo anca a zxontarghe l'etimologìa, cusì se vede cofà che łe nostre bełe parołete łe vien fora dal latin (ła xe stà inprestà dal todesco, dal franzsoxo o... va ben, qûalche parołeta ła xe stà inprestada anca da l'itałian).

--Achiłou 11:21, 24 mar 2007 (UTC)

PS: www.omegawiki.org el xe el "gran wikizsionario" che'l dixe Nick, e mi so drio laorar anca là; ma tegnì prexente che qûeło no 'l xe mìa un projeto cołegà a wikipedia o a wiktionary; donca ghe sirà senpre it.wiktionary es.wiktionary e via cusì, no i sirà mai sarà. Ghe sirà colaborazsion tra i projeti ma i sirà senpre separài.

No, da cuel che go sentio mi i gavea intenzsion de sararlo proprio e ragrupare tuto--Nick1915 - dime quel che te vołi 12:15, 24 mar 2007 (UTC)

(IT) Va lezxar qûi o (IT) domàndaghe a Sabine. Xe soło vóxe vegnù fora parché i se gà spiegà mal, par fortuna no i sararà gniente. Nè pur a scrivar, ve spetémo tuti! ;)

--Achiłou 21:21, 25 mar 2007 (UTC)

[modifica] Cassegio

Mi son un butel veronese, ma me son trasferito a Bulogna che non è che la me piasa più de tanto, ah. Mi preferiso più parlar en dialeto veneto ch'a l'è più se bel. Ora sto a scola e no gò na masa da far, quindi me parea na bela idea tornar a scrivere un poco en dialeto ch'a l'è divertente. Ciao a tutti, se vedemo in giro a

[modifica] Admin

Ghemo un novo admin congratulazsion Giovanni--Nick1915 - dime quel che te vołi 12:21, 24 mar 2007 (UTC)

[modifica] 28 de marzso del 2007: data stòrica par ła łéngua vèneta

(IT) El Conséjo Regionałe del Vèneto el riconóse ła łéngua vèneta.

--Achiłou 13:59, 29 mar 2007 (UTC)

Che beła notizsia! 'deso me piaxaría saver cosa che ghe ne vien fora... --Maximillion Pegasus ^{>Vustu qûalcosa?} 14:55, 29 mar 2007 (UTC)

[modifica] Varianse e... par condicio

Cari butei,

magari vegno fora tenpo mazsimo, ma gh'e qualche rodigin o belumat che no vol mìa el veneto ała venezsiana, provì a vedar 'sto intervento de eml.wiki. podarìa servir de ispirazsion. - εΔω 14:59, 3 apr 2007 (UTC)

Provite a imaginar cosa che vegnaría fóra se ti fa sta roba co un artícoło łóngo.. --Maximillion Pegasus ^{>Vustu qûalcosa?} 13:15, 4 apr 2007 (UTC)

Ła grafìa vèneta unifigà ła dovarìa servìr propi par queło, no? Cusì che si te scrivi int'un sol mo a te poi po' łèzxar in asè varianzse. A starghe drio el Brunelli a semo fortunai che co dó signi e na convenzsion a semo boni da intendarse ben tuti anca par iscrito. Deso vedaremo ben cosa che i ne tira fora qûei del Conséjo Regional par "tutelare la lingua veneta in tutte le sue varianti"... i dovarìa catar fora na grafìa unifigà che ła ghe someja a qûeła del Brunelli (sarìa ben ben).

Dovarìsino inparar tuti a starghe drìo sta grafìa unifigà, a scuminzsiar dal sito... no se scrive mìa "ençiclopedia libara" inte ła grafìa unifigà ma "enciclopedìa łìbara" (o magari "enzsiclopedìa" si propi propi)... si no che ciaschedun el scriva co ła convenzsion com che 'l vol e łóra tachémo far fora artìcołi in miari de version com qûeło che 'l ne gà fato lèzxar εΔω...

Ghémo vołésto o no starghe drìo sta grafìa unifigà? Doparémoła! Ma doparémoła ben!

--Achiłou 20:41, 5 apr 2007 (UTC)