Sopa coada
Da Wikipedia, ła ençiclopedia libara.
Ła sopa coada xe el piato "bandiera" de Trevixo, radici a parte. Ła riceta par 4 persone la vol: 4 colonbi sòvani, 400 g de pan bianco vecio tajà a fete, un litro e meso de brodo de carne, do séole grose, na costa de seèno, tre carote, un ciufo de parsémolo trità, tre cuciari de oio, 150 g de buro, 80 g de parmesan o graso de montagna gratà, un goto de vin bianco seco, pevare, sale. Netar ben i colonbi e tajarli par metà. Pareciar el desfrito con seèno, séole, carote, oio e buro. Quando che la séola ła taca a farse bionda, metare i colonbi in te ła tecia con un poco de vin bianco e lasarli cusinar a fogo lento. Zontar brodo, sale e pevare; metere el parsémolo e covèrsere, finchè i colonbi i xe ben coti. Tajar a fete alte un çentimetro el pan, cavarghe i osi ai colonbi coti, sensa spacarli masa. Zontar a tuto el conposto e ała carne dei colonbi el brodo, de bojo. Lasar cusinar pian pian a fogo lento par altri diexe minuti. Metare sul fondo de na pirofila granda le fete de pan, su ogni feta metarghe sora meso colonbo a toki, spanpanarghe sora el parmesan, metare le altre fete intorno e sora ancora parmesan. Covèrsere el tuto col brodo e metare in forno a "coare" pian pian par almanco 5 ore, finchè el brodo no xe quasi tuto evaporà. In caso, zontar ancora un poco de brodo de bojo e un toketo de buro. Servir caldo.
