Abdy van Zeevnkerkn
From Wikipedia
De Abdy van Zeevnkerkn, oftewel ôok de Sint-Andriesabdy genoemd is 't geejstelike centrum van Sint-Andries en van in feite de ganschen oemgevink roend Sint-Andries (Brugge).
't Adresse:
- Sint-Andriesabdij Zevenkerken
- Zevenkerken, 4
- 8200 Sint-Andries Brugge
Inoud |
[bewerk'n] Den oeden abdy
De stichtienk van d'abdy voend plaots in de vroeghe Middelêeuwen. 't Charter werd getêekend ip 22 februari 1100 en werd deure den Groaf van Vloanderen in juni van dazelfste joar oendertekend. Ze âan besloten vo under Abdy te stichten ip de platse van den ûdege parochiekerke van Sint-Andries en Sint-Anna. d'êerste monniken kwamen der ip 17 augustus 1117 weunen. In 1188 werd den abdy onafankelik van de moederabdy. In de 14e eeuw brak ter e periode van groten welvoart an vo den abdy, die groenden en inkomsten kreeg. In 1240 werd het kerkgebouw, achter e langen rûzze tusschen de paster van de paroche en d'abdy deur e meure in tweje verdild. In 1350 werd e stuk groend verkocht worip dat 't latere Sint-Anna-ter-Woestiene kartûzersklooster zoe komn.
In den twidden helfte van de 15e eeuwe ad den abdy grote schoade ipgelopen achter de bezettink deur de Dûutse landsknechten.
In 1521 brochten Kiezer Koarel en ze broere Ferdinand e bezoek an d'abdy en weundeghen ze de vespers bie, e recente meurschilderynk herinnert aan dien gebeurtenisse.
In de 16e eeuw beriekte d'abdy e diêptepunt. Achter de vortdeurende verwoestyngn en plunderingen blêeven ter uitendelik nog 4 monniken over.
In de 17e eeuw werd de abdy e bitje opgekalefoaterd, mo de constante oorlogen, en de liggienk van d'abdy bûten de meuren van Brugge lieten opnieuw under sporen achter, en d'abdy werd zwoar geschoenden.
Den abdy was echter gelik zovele abdyen verwoest ten tiede van de Fransche Revolûse, just de 16e eeuwsche toren bleeft over. Dêen stoat er, achter een groendige restauratiebeurt, nog alsan en is in de hûdige parochiekerke gintegreerd.
[bewerk'n] De nieuwn abdy
Hoenderd joar derachter (1898) waster e Benedictiender ût Maredsous die e nieuwen gemêenschap stichtige bie den oeden abdy. De neoromaansche-Byzantynsche abdiekerke ût 1899-1900 êet zeven kapelln in verschillende stielen, ze doen e bitje peisen an de zeven grôote basiliekn van Rome. Sins 1910 ister een abdyschole verboenden aan d'abdy. De joeners van de famille van de Keunink van België goan doar oender andere ol generoates langk nor 't schole.
[bewerk'n] De liggienk
Den abdy ligt in e gebied met vele busschen langsch de weg van Brugge nor Zillegem en Toeroet, 't gebied van Zeevnkerkn omsloat tegenweurdig 50 hectaren busch.
[bewerk'n] Abten
- Michel Coune o.s.b. (1976 - 1984)
- Paul Standaert o.s.b. (1984 - 2005)
- René Fobe o.s.b. (2005 - )
