Madonna met Kind
From Wikipedia
- Dit artikel es geschreevn in 't Brugs, en da zoe best ozô bluuvn.
Up et altaar van de zudelik’n ziebeuke van d’Onze-Lieve-Vrouwekerke in Brugge stoat et beeld van de Madonna met Kind van den Italioanse kunstenoare Michelangelo Buonarotti (6 moarte 1475, Caprese - 18 februoari 1564, Rome). Et beeld is 128 cm oge en is gemakt van marmer van Carrara.
Michelangelo was 26 joar oed ost ie an ‘t beeld begost is. 't Was de periode van z'n David en een poar joar vodat ie z'n Piëta vo de Sint-Pietersbasiliek in Rome gekapt eet. De Madonna met Kind was ôorsproenkelik bestemd voar in den Duomo van Sienna moar et werd uutendelik verkocht in 1506 an de Brugse koapman Jan Mouscron die up da moment in Toscane zakens deed. Em liet et per boat noa Brugge kommen en je schoenk et in 1514 an de Onze-Lieve-Vrouwekerke.
Madonna met Kind is et ènigste beeld van Michelangelo da binst z'n leven uut Italië weggegoan is. Doarom zeggen de Bruggelingen soms da et et ènigste beeld van de kunstenoare is “an deze kant van de Alp'n”. Moa da is eigenlik nie woar: der zien nog 2 beeld'n in ’t Louvre in Paries en der is oak nog een beeld in de Hermitage in Sint-Petersburg da vermoedelik oak van em zoe kunnen zien.
Zowel de Franse os de Duutsers en 't beeld proberen mee te pakken, mo 't is oltyd no Brugge weregekèèrd. In 1877 is 't er oak nog een poginge gewist vo et beeld wa zediger te maken deur un 'sluiertje' vo ut pietje van Jezus te plakken, moar da en ze were weg moetn doen omda der te vele protest kwam.
’t Is ollesins un styf schoan beeld in Florentinse renaissance-stijl. De Madonna straalt kracht en èènvoud uut, de plôoien van eur klèèd zien hèèl gedetailleerd uutgewerkt. Jezus is an ’t dromen en eet d’and van ze moeder vaste. Michelangelo bedoelde mè z'n Madonna met Kind et vers uut den bybel uut te beeld'n ‘Maria bewaarde dit alles in haar hart en dacht hierover na’ (Lucas, 2, 19).
