Metallica
From Wikipedia
Metallica is nen Amerikoansn meziekgroep die algemêen wordt anzien als êen van de grotste metalgroep'n oois.
Ze bestoan ol sedert 1981 (in en andere bezettienge dan nu, ollêne James Hetfield en Lars Ulrich zin derbie van 't begun) en zien voo vele groepn en gitarisn e grôot voorbeeld. Ze zien setoe ekend erocht achter danze in 1991 Metallica (beter ekend oender de noame The Black Album) uutbrochn, nunder vuufde ploate (me styve bekende nummers lyk Nothing Else Matters, The Unforgiven en Enter Sandman) woamei danze oek deurebrook'n en bie de geweune meziekliefebbers.
Inoud |
[bewerk'n] Geschiedenisse
[bewerk'n] 't Begun: de joarn '80
In 1981 zette Lars Ulrich (e drummer die eigentlyk voe te tennisn va Denemark'n nor Amerika egoan wos) e zoekertje in e metalmagazyne, woarup datn gitarist Hetfield reageerde.
Nunder êeste uptreen wos in 1982 me James Hetfield die zoeng en ritmegitaar speelde, Lars Ulrich die drumde, Ron McGovney die upn bas speelde en Dave Mustaine (die Lloyd Grant vervang at) die leadgitaar speelde. In da joar pakn ze nunder bint ganger legendoarischn demo No Life 'Til Leather up.
McGovney wos ol zêre vervang deur Clyff Burton en Dave Mustaine deur Kirk Hammett (die toene voen Exodus speelde, pertang oek e stivn beken' metalgroep), olletwêe kwaam ze derbie in 1983. McGovney is noois mi styf bekend erocht, mo Dave Mustaine beguste me Megadeth, e groep womei datn vele ploatn verkocht et.
In 83 naamn ze oek nunder êeste hêle ploate up: Kill 'Em All, e ploate womei danze rechtet e masse fans krêegn. 't Is ollemoale styf zêre espeeld (Speed Metal zeggn sommegte; de mêeste noemt Thrash Metal) en d'upnoamn zien nie ol te goed.
In 84 toene, pakk'n ze me Ride The Lightning e twide ploate up. In e kortn tyd isn groep e masse veraard. De nummers zien mêer deurdacht en Fade To Black is voe vele menschn nog ossan 't beste nummer dan z' emakt en, mo 't stoan nog e masse aar klassikers up (bevôorbeeld For Whom The Bell Tolls en Creeping Death).
In 1986 en ze me Master Of Puppets de ploate upepakt woavan da kweetnie oevele meziekliefebbers (oek buutn metal) zegn da 't e klassike ploate is, Metallica zeve speelt nog de mêeste van de nummers live. In 'n tour dan ze derachter speeldn, krêegn z'en aksedent in Denemark'n me nundern tourbus en Burton veroengelukte. Iderêen wos eschokkeerd. Ze dêen toch vors en Jason Newsted (van Flotsam en Jetsam) nam de plekke in van Burton. Me nem naam ze ...And Justice For All up, woavan da One 't bekenste nummer is. 't Stoad ider joar in d'êeste tiene van Tiedlôze Oendert van Studio Brussel. Ze krêegn voe One oek nundern êestn Grammy Award.
[bewerk'n] De grôte deurbroake: de joarn '90
De grôte deurbroake kwam achter dan ze Metallica (The Black Album) uutbrochn, e ploate die vele commerciëler wos dan olles van dervôorn. 't Album is wel setoe ekend oender de noame The Black Album omda 't doosje zwort is.
De noaste ploate kwam mor uut in 96 en noemde Load. Vele menschn woarn styf oentgoocheld omdanze e twin Black Album an verwacht. Load en zin upvolger Reload (in 97, mor up 't zeste moment upepakt lyk Load) woarn vele minder metal dan dervôorn (minder ard) en e masse fans wuldn van Metallica nie mir en weetn. Ze zein dat 'n groep ollêne nog an geld peisde en zeker toene danze roend 2000 e proces begusn teegn Napster (ze voen downloodn tjoep'n).
De noaste ploate wos Garage Inc (in 98), e dubbel-cd me covers (oendermêer van Motörhead, e grôot vôorbeeld voen Ulrich), woavan dat voe't grôte peblyk setoe Whiskey In The Jar en Turn The Page ekend zien omdander clips van emakt zin.
't Wos toene were en ende stille, en achter dan Hetfield en Newsted in kwiste ekomn woarn over een aarn groep van Newsted, smeetn ze 'n dien buutn in 2001. 't Wos nie d'ênegste ruuzje dan ze at en in dien tyd ('n DVD Some Kind Of Monster goat doarover).
Ze kwaamn derdeure, en in 2003 kwam Robert Trujillo (ekend van Ozzy Osbourne en Suicidal Tendencies) bien groep. In da joar kwamter oek e nieuwn cd uut: St. Anger, e ploate die were veel arter wos, mo woa dander gin solo's zaten (woavoorn da Metallica toch ekend wos). 't Wos gelyk oe e nieuw begun.
In 2007 zoe 't er e nieuwe ploate komn. Metallica ed ol twee nummers espeeld beistn nunder latsn tour en 't zittn were solo's in.
[bewerk'n] Bezettienge
[bewerk'n] Nu
- James Hetfield (zang en ritmegitaar, sedert 1981)
- Lars Ulrich (drum, sedert 1981)
- Kirk Hammett (leadgitaar, sedert 1983)
- Rob Trujillo (bas, sedert 2003)
[bewerk'n] Vroegerder joarn
- Lloyd Grant (leadgitaar, 1981)
- Ron McGovern (bas, 1981-1982)
- Dave Mustaine (leadgitaar, 1981-1983)
- Clyff Burton (bas, 1982-27/09/1986 (†))
- Jason Newsted (bas, 1986-2001)
[bewerk'n] Albums
| Studio-albums | |
|---|---|
| Kill 'Em All | 1983 |
| Ride The Lightning | 1984 |
| Master Of Puppets | 1986 |
| ...And Justice for All | 1988 |
| Metallica | 1991 |
| Load | 1996 |
| ReLoad | 1997 |
| Garage Inc. | 1998 |
| St. Anger | 2003 |
[bewerk'n] In West-Vloandern
Metallica et 2 kirs in West-Vloandern espeeld, twi kirs in Poperynge, up 12 februoari 1984 en in't zeste joar up 17 november.
[bewerk'n] Grôote vôorbeeln
- E masse groepn uit de NWOBHM (New Wave Of British Heavy Metal)
- Blitzkrieg
- Motörhead
- Diamond Head
[bewerk'n] Externe koppelienge
 |
Mêer ofbeeldiengn die ier by passn ku je vien ip Metallica ip Wikimedia Commons. |
