Sintekloai

From Wikipedia

Sintekloai

Sinte(r)klaai, Sinte(r)kloai, Sinterkloas, Sent-Nikloai is nen illigen die zijn noamdag et op 6 december. Op die dag krygn de froaie kiendjes in Belgie sneukelienge, kloaispeirden, pikke-nikken, marseping, chokla, mandaryntjes e speelgoed. E dag idder komt ’n ôok noa Olland.

Sintekloai ku je verkenn an ze langn wittn board, ze rôo klêed, ze mieter (zien oed) e ze staf. E riedt up e wit peird over de doak'n. En ed ôok e grôotn boek woarin da olles stoat wuk dan de kiendjes vroagn. E hêeln oop zworte pietn elp'n nem mè ze werk en droagn de zakk'n me speelgoed en sneukelienge, jis veelal gespiêld deur nen opa van ne klêin.

[bewerk'n] Et oentstoan van Sinterkloai

Sintekloai is en istoriese figure. Zijn echte noame is Nicolaas van Myra (°270 – 6 december 345 of 352). Myra ligt in et teg'nwôordige Turkije.

De Turken (Seldsjoek'n) stonden in 1087 up’t punt vo Myra, da up da moment un onderdêel was van ’t Byzantynse ryk, te veroveren. In ’t kristelike Westen ontstoend er grôte consternoasie dat ’t gebêenderte van Sinterkloai in d’anden van d’oengelovigen gink vollen. Zêemann'n uut de Zuud-Italioanse stad Bari voarden in ’t geheim no Myra, groavd'n Sinterkloai up en erbgroavden em in under stad vo der un grôte kathedroale boven te bouwen woada Sinterkloai nog oltyd anbeed'n wordt.

Bari was van 1503 toe un stik van de 18st’ êeuwe van de Spanjoarden. Vando dat ‘er gezeid wordt da tie uut Spanje komt mè zun stôombôot.

[bewerk'n] Woarom ist ie zo populair ?

Der zien un oantal legenden rond em bekend die verkloaren vowuk dat’ie zo populair is:

Je ield drie meistjes uut de prostitusie deur un poar nachten achter mekoar goudstikk'n deur under venster te smietn zodoanig dan ze un bruudschat aan vo te kunn'n trouwn.
Je brocht drie kiendjes were toet leven achter dan ze geslacht woaren en ol in de pekel gedroaid deur un stoete erbergier.
Deur ne kê goed zun gedacht te zeggen tegen de wiend stildet ie un geweldigen storm bist da tie up weg was no ’t Illig Land, woadeur dat ie kost vôorkomm'n da den bôot me man en muus vergoenk.

Zun populariteit kunnen me zien an wo dat ie ollemolle den beschermer van is:

J’is de patroonilligen van Yper en Dinant, van d’advocoaten, de notoariessen, zêemannen, woafelbakkers, apothekers, koekebakkers, specerieandeloars, voerlied'n, kolendroagers, coiffeurs, van de Brugse pastei- en broodbakkers en van de mutualiteiten.

[bewerk'n] Sinterkloai en 't Kestmannetje

De Ollanders, die Sintekloai ôok kenn, èn da gebruuk meegepakt noa Amerika toen da New York nog e Nederlandse kolonie wos. Zinne noame es loater verbasterd gewist na Santa Claus die ols kerstman in de 20e êeuw were den grôten plas es overgestook'n en de latste joaren hêelsan ma populairder komt. In Belgje en Olland es Sintekloai dus eigentlyk in concurrentie met zin eign.