Li Noû Lovén
Èn årtike di Wikipedia.
Li Noû Lovén est ene nouve vile rebanêye dins Ocgniye-Li Noû Lovén.
[candjî] Istwere
C' est e 1425 ki tot a cmincî, cwand li påpe Mårtén V a tuzé di fé ene nouve univiersité dins li Dutcheye do Braibant. C' est insi k' a skepyî li Catolike Univiersité di Lovén. Å cmince, tot esteut e latén, les prumires luçons e francès vegnnut e 1687 et e neyerlandès e 1911. Adon gn aveut a Lovén des djonnes di Flande et di Waloneye, tchaeke di si costé avou ses luçons.
Mins e 1976, les flaminds studiants dimandnut ki Lovén fouxhe tote flaminde, sins pupont di francès-dvizants. C' est çoula k' on lome e Waloneye li Walen buiten (les Walons a l' ouxh). Adon, on côpe l' univiersité e deus avou l' KUL à Lovén et l' UCL ôte pårt. On a bén tuzé di l' mete e Nameur, ewou gn aveut ddja ene pitite univiersité. Mins come c' est ene catolike univiersité riloyeye å diyoceze di Maline-Brussele, ele diveut dmorer e Braibant. Adon, on a fwait ene nouve vile å mitan des paxhis, dlé Ocgniye. C' est insi k' on a basti l' Noû Lovén.
Les prumirès lçons ont cmincî e 1972. Eyet totes les facultés estént å Noû Lovén e 1979.
[candjî] Li vile
Li Noû Lovén, ç' n' est nén djusse ene univiersité. C' est ene vraiye vile avou des botikes, des cinemas, des cåbarets, des restôrants,... Asteure, gn a d' pus di dmorants ki di studiants. Li cinte est basti so ene dale di béton avou des plaeces po les vweteures padzo. Å dzeu, on n' pout daler k' a pîs. Cwate coulots si stindnut so les boirds del valêye. On les lome d' aprés les vîs hamteas: Bierwåd, Hocaye, Låzele et Brouhire.
