海上花（电影）
来自 吴语维基百科
海上花是根据《海上花列传》该本吴语小说改编得来个吴语电影。 《海上花列传》本身是拿苏州言话来写个，但拍成功电影个辰光用上海言话。
内容 |
[编辑] 主演
[编辑] 拍片场化
台湾
[编辑] 导演
侯孝贤 Hsiao-hsien Hou
[编辑] 年份
1998年5月1号
[编辑] 剧情简介
中国个宗法社会，爱情从来是弗来事张扬个。男人家到妓院里向去寻渠笃个爱情，只有勒妓院该个边缘角落头里还有一眼眼机会。勒拉该搭，男人顺从个是女人个规矩。19世纪末，上海英租界个长三书寓，日日宴歌。归个辰光个高等妓院叫长三书寓。
该个夜头又是宾客盈门，觥筹交错。东道主叫周双珠，是一个克气、大气个青楼女子，同时也是公阳里老鸨个嫡亲囡儿。齐巧勒众宾客勒浪乎哇狼形个辰光，勒拉搭洋人打交道个衙门里向上班个文官王莲生却首先离席告退。渠是去赴另一妓女张惠贞之约。该桩事体弄得妓女沈小红交关火冒。小红勒荟芳里挂头牌，但渠性格刚烈，为人直爽，少有清客敢去翻渠个牌子。莲生是独独搭渠日长来去个人。次日清清空朝小红寻上大门，勒众目睽睽下底对惠贞大打出手。实际浪莲生所为事出有因。渠觉着小红同时还搭一个年轻戏子柳儿相好，外加登小红个态度浪觉着仔一眼冷淡。烦闷之下莲生去寻另一妓女，实梗末带翻仔小红该个醋钵头.为仔解决问题，莲生勒朋友洪善卿搭仔汤啸庵个陪伴下头来寻小红，拨勒小红伶牙利齿伊个女佣人好好较骂着一顿山门。朋友尴尬到弗得了，甩下仔莲生自顾自跑落，莲生只好一独自去见小红。弗管哪亨，毕竟已经有仔四五年个感情，长话短话仔半日天，两家头又和好如初。
因为渠个特殊身份，双珠常庄勒公阳里充当家长个角色，妓女道里个争风吃醋要渠去摆平，惹着个人命官司也要渠出面去排解。双珠看淡风尘搭仔练达个处世态度受到洪善卿个赏识。
黄翠凤是尚仁里个年轻妓女，是个精明、会搭自家打算个女人，渠渴望早一日脱身青楼，获得自由。她同时自如应付几个男人家，当中关系顶密切个是有钞票又有空个名流罗子富。翠凤一径搭渠勒一道是因为渠觉着渠会帮渠赎身。
小红个人看上去用钞票并弗哪亨呀呀歪歪，债倒弗少。莲生虽然弄弗泠清，尚况还是帮渠去结清爽。一日天酒宴过后，吃醉落个莲生勒勒朆事先告知个情况下底，跌跌蹱蹱冲进小红个卧房，齐巧拨渠碰着小红搭戏子柳儿勒拉一道。盛怒之下，莲生拿渠送拨拉小红个物事统统掼到八门。莲生断然决定讨惠贞做小老婆，拜托善卿帮渠筹备。善卿力阻，却朆成功。
罗于富总算为翠凤赎身。走个辰光，翠风拿所有衣裳、首饰亨白浪当一侪留拨拉别个姐妹。
春去秋来，莲生得到提升，就要离开上海，朋友道里勒书寓开宴会为渠送行。小红老早个女佣人现在帮双珠做事体。登勒渠个嘴里向，莲生晓得小红凄凉个近况。但渠弗想再陷勒笃，渠要走哉，走出该个叫人眼花里花个“梦”……
