壽星仔 (漫畫)
出自維基百科，自由嘅百科全書
壽星仔係一本香港公仔書，由上官小強主編兼監制，1974年創刊，最初叫「壽星仔」，後來改名叫做《壽星仔週刊》、《壽星仔雙週刊》，之後又因為作者上官小強自立門戶，又再改名為《金裝壽星仔》。
壽星仔係喺1980年代香港暢銷公仔書之一，走搞笑路線，而家已經無出。
目錄 |
[編輯] 簡介
壽星仔其實係一本綜合漫畫，但以壽星仔故事做主打，再加上唔同嘅漫畫主筆所寫嘅專欄、四格漫畫、短篇漫畫內容，其中又以甘小文四格最受歡迎。
[編輯] 壽星仔故仔
壽星仔以故事主角「壽星仔」而命名，喺個故仔入面，「壽星仔」多數叫做「阿壽」，身高唔夠五呎、體重唔過一佰磅，而且永遠九歲半，長唔大，雖然人仔細細，但行為老積，而且仲粗口爛舌。
除咗「阿壽」之外，重有一個熱血青年叫做「強記」，強記其實係作者上官小強自己，另外重有一個辣手幹探「彭蛇」，三十幾勾，彭蛇其實係拎「彭 sir」偕音，做咗 CID 三年零八個月完全未升過職。「強記」、「彭蛇」加埋「阿壽」三條友合稱「神勇三膠龍」。
故事圍繞住，阿壽、強記、彭蛇三條友發展，每幾期或者一期完成一個故事，故事有時係原創，有時會改編電影，第一期故事叫做「神經六」，多數故仔同故仔之間都無關連。不過咁多個故仔之中，以改編自日本漫畫「七金剛」嘅「港產七金剛」最為經典，因為呢個係唯一有續集嘅故仔。
其他角色：
- 火蔴仁：一個鐘意搞搞震無幫櫬嘅死肥佬，唔著鞋，一日到黑著件空手道衫扮有型
- 和尚仔：另一個同「阿壽」一樣咁老積嘅細路，不過成日畀人搵笨
- 珠女：「阿壽」條女
[編輯] 文化影響
壽星仔嘅對白全部都係用廣東話口語寫，經常玩好多粗口偕音，好似：「利物浦」(離X譜)、「戴高樂」(大X鑊)，除此之外亦有好多市井風味嘅言詞，好似「屎忽撞棍」、「你老母湊大你」。喺周星馳重做緊兒童節目主持，軟硬天師重報緊交通之前，壽星仔已經用緊「無厘頭」呢個詞，當時喺壽星仔連載嘅甘小文漫畫，就以「無厘頭」風格見稱。
[編輯] 客串主筆
壽星仔除咗壽星仔故事之外，重有好多主筆客串短篇或者四格。活躍客串主筆好似有： 甘小文、大粒墨、好小子、四方菓、羅永康、何永享、許景琛、邱福龍、阿富汗、林雨才
[編輯] 壽星幫
壽星幫即係指壽星仔制作部成員。
壽星幫成員：
- 主編、監制：上官小強
- 封面：上官小強、曾憲璋、陸偉昌
- 助理：何永享、李振富、鄧耀輝、溫永聰、關烈文、何穎圖
[編輯] 參考
[編輯] 相關
- 小強漫畫集
