無厘頭
出自維基百科，自由嘅百科全書
無厘頭，原本成句係「無厘頭尻」，曾經一度被誤認作粵語粗口嘅其中之一。「尻」字最最最原本係解屁股舊骨，『說文解字：尻，臀也。』，而「無厘頭尻」原意係指啲人頭尾不分，亂晒大籠，唔知做乜，後尾因為個「尻」字等同賓舟嘅粗口字，所以先畀人用嚟當粗口咁用，其實原本哩個詞語係相當文雅。
另一個來源係來自無來頭(來係白讀梨音)，即係唔知邊度來。
依家嘅「無厘頭」，意思同樣係鬧人講嘅嘢同埋做嘅事不知所謂，無聊到冇人有，又或者發生咗嘅嘢跟本搞唔清來龍去脈，令到人一頭霧水。後來「無厘頭」哩三個字喺香港嘅電影入面出現，於是乎廣泛咁傳揚開嚟，甚至成為一種電影風氣，繼而影響埋社會意識形態，有所謂「無厘頭文化」。
無厘頭文化嘅特色係經常將講嘢嘅字詞誇張咁演釋，或者講埋哂啲同主題風馬牛唔喇更（牛頭唔答馬咀）嘅嘢，有時講緊嗰陣仲要配合埋啲誇張嘅形體或者面部動作，目的係要令原本好簡單嘅說話或者訊息兜個大圈，搞到啲人唔知唔明一味得個估字。
香港著名電影藝人周星馳好擅長哩種誇張嘅演釋，佢將無厘頭哩種意識形態喺電影電視裡面大肆發揮，變成一種喜劇元素；睇返喺佢初期嘅電視或者電影作品裡頭，經常都會出現無厘頭嘅說話同埋形體動作嚟引人笑，於是就俾大眾公認為無厘頭文化嘅祖師爺。
時至今日，「無厘頭」哩三個字雖然都仲係一個貶義詞，但因為後面嗰個「尻」字慢慢咁俾人淡忘棄用，經過日子同埋社會形態嘅洗擦同打磨之後，基本上已經冇乜攻擊性，脫離咗粗俗語言嘅行列而成為一個普通嘅形容詞。但係為咗要用正解做大前提，所以都仲係有必要介紹出哩個詞語嘅本來面目。
