新九龍
出自維基百科，自由嘅百科全書
新九龍係香港九龍嘅擴展部份，範圍由南面嘅界限街，到北面同東面嘅琵琶山、鷹巢山、煙墩山、獅子山、慈雲山、飛鵞山、大老山、大上托、五桂山等等山脈之間。新九龍原本係新界地方，即係英國1898年租借新界一部份。後尾九龍市區要擴大，咁就將呢九龍半島北面嘅山脈，同維多利亞港之間，劃做九龍市區。新九龍嘅地方有荔枝角、長沙灣、深水埗、九龍塘、九龍仔、九龍城、竹園（黃大仙）、新蒲崗、牛池灣、牛頭角、官塘、油塘等等。
目錄 |
[編輯] 歷史
響英國1860年得到九龍半島之前，九龍同新九龍當係個整一體。九龍成個半島大部份係九龍山，即係界限街以南，到尖沙嘴嘅山，而新九龍就係半島以北就到山脈之間，有唔少平地。因為九龍山唔係咁啱耕田，所以九龍唔係咁多人住，相反新九龍有平地，有河水，有唔少村開響呢度。而九龍灣一帶，亦都係華南主要鹽場，根據史書記載，起碼大宋時期已經有官兵守響度。不過，由於香港係天朝大國邊皮，記錄唔係咁多。
[編輯] 末代宋皇
到咗南宋末期，蒙古軍南下攻宋。宋軍無力抵抗，兩位走難皇帝仔，帝昰同帝昺，畀蒙古軍華南沿岸一路追到家下新九龍呢一帶。宋帝，同埋佢嘅官兵，就響家下九龍城、馬頭涌一帶落腳。村民見皇帝來梗係落力招呼。因為佢響舊時馬頭涌口個山仔抖過，所以座山自此起就叫聖山，山上面有個位叫宋皇臺。皇帝仔因為追兵到，最後經荃灣去到崖山，即係今日澳門一帶，畀陸秀夫帶住跳海自殺。大宋就係咁玩完。之後唔少宋軍官兵就留響新九龍一帶落地生根。
[編輯] 海患
大明國到咗後期，沿海有倭寇之禍。唐人同倭人勾結做海盜，走私打家劫舍乜都做。因為咁，大明就加強海防。九龍灣呢個產鹽要地，有官富巡司駐守。之後大清滅大明，雖然呢個時間無倭寇，但係好多大明子民唔順滿人大清統治，出海做海盜。所以海盜仍然都係咁猖狂，新九龍呢度係海邊，當然會當災。大清皇帝最後出招，實施海禁，唔畀人住響海邊，要啲人搬入內陸，斷海盜糧草。就係咁，新九龍變成無人住。雖然呢招係對付海盜，但係搬村都係傷民。廣東官員見到民間咁慘，就上奏畀居民返返海皮住。皇帝最後都收返海禁令，但係因為搬村太辛苦，死好多人，唔係好多人搬返返來。大清平定臺灣初時，海盜雖則無咗大靠山，但係仍然咁犀利。搬返九龍灣嘅居民，有幾條村試過畀海盜殺晒。所以呢度嘅人雖然有咁耐歷史，但係咁經過呢幾次劫難，家勢大為減弱，好多連族譜都無埋。
[編輯] 客家人搬入
大清國為咗填補呢度人口減少，就鼓勵客家人搬來海邊，自始香港全境，香港島、九龍、新九龍、新界都住咗唔少客家人，甚至比本地人多。客家人搬來香港一直都無停過。1841年英國響大清身上得到香港島，1860年英國永租九龍半島，呢段時間，香港市區發展得快，要好多石起嘢。刻苦耐勞見稱嘅客家人，把握呢個機會來香港島，九龍同新九龍各地打石。新九龍打石個嘅地方就集中響東面，客家就結集成村，開成四山，即係牛頭角、茜草灣（曬草灣）、茶果嶺同鯉魚門。呢四山村長，有半官方色彩，就好似代表大清九龍寨城管呢度開石生意同工人。就算英國統治新九龍，就一樣要畀面佢哋。
[編輯] 九龍寨城
而防務方面，大清見香港島落入英國手，就立即響九龍城一帶起九龍寨城，加強九龍防務。不過因為英法聯軍北上打天津、北京，最後九龍半島都落入英國手。英國人響九龍同新九龍邊界上面，即係今日界限街上面，起咗一條好長嘅竹籬，分隔開兩邊。而九龍寨城到海邊碼頭就慢慢變成市集。
到咗1898年，英國趁法國租到廣州灣，就要大清租埋新界，等佢可以加強防守。英國同大清討價還價，英國最後租到新界，但大清響唔影響英國防務，可以保留九龍寨城同碼頭。就咁樣，新九龍呢帶既然響條約之內，就交咗畀英國喇。英國接收新界，好多村民都未知乜事，所以就有好多人反抗。因為咁，英國就用話大清官員搞事，趁機趕走九龍寨城嘅大清官員。不過因為英國其實唔係咁名正言順，所以無辦法統治九龍寨城。
[編輯] 20世紀初期
英國得到新界之後，新九龍一帶仍然係鄉村地方。不過為咗統治新界，就由新九龍開始起路，有北向沙田嘅大埔道，西向葵涌嘅青山道，東向清水灣嘅清水灣道，上北便九龍山脈嘅沙田拗道，響東面山腰山脊行，去到鯉魚門嘅安達臣道。而因為九龍大角嘴有大同船塢，側邊嘅深水埗市集村落，政府就規劃做市區，等工人可以響度住。而新九龍山腰到山腳底，好多地方都劃做墳區。1910年代九廣鐵路英段由九龍芒角入新九龍，響九龍塘同九龍仔之間個山邊，去到煙墩山底，過煙墩山隧道到沙田。
1916年，何啟同區德開公司發展九龍灣海皮，響蒲崗南面填海，諗住起啟德濱呢個花園洋樓。填海分兩期，1920年同1927年各完成一期。不過好唔好彩，呢間公司執咗，塊地就畀返政府。而政府就私人同埋英軍搞機場。後尾呢度就成為啟德機場喇。
1937年，香港政府決定將新九龍變成市區。所以就立法將呢塊地劃做新九龍。
[編輯] 日治
響1941年到1945年之間，日本佔領香港期間，日軍拆九龍寨城埲城牆，連埋聖山，一齊拎去填海加大啟德機場。加大同時連蒲崗呢條村都拆埋。
[編輯] 20世紀後期
響1945年後，九龍寨城以東仍然有好多村，有九龍十三鄉之稱。十三鄉包括沙埔鄉、衙前圍鄉、竹園鄉、大磡鄉、元嶺鄉、沙地園鄉、坪頂鄉、牛池灣鄉、坪石鄉、牛頭角鄉、茜草灣鄉、茶果嶺鄉、鯉魚門鄉。不過由於國共內戰，好多難民來香港。新九龍各山頭都搭晒屋。由於山頭有好多原居民山地，起屋就會搞到人哋祖墳。所以有時重會同原居民有衝突添。
香港政府為咗安置居民，就開始起廉租屋，正式將新九龍東面呢帶當係衛星城市咁起，等佢自始自足。
[編輯] 濕碎
新九龍響香港法例上有寫明範圍。不過，一般來講，寫地址只係寫九龍人就唔白，唔使特別指明。
