燒嘢食
出自維基百科，自由嘅百科全書
燒嘢食（Barbecue），暱稱BBQ，係煮食方法一種，通常係指直接用火燒啲嘢食，令到啲嘢由生變成熟，中國大陸亦有人叫「烤肉」。呢個係好原始嘅煮食方法，可算係比生食飲血較為進化嘅飲食習慣。燒嘢食唔同煎、炒、炸等等方法，嘢食通常唔會放晌任何兜型器皿上面嚟煮，而係用好長嘅叉拮住啲嘢伸出去火上面直接燒，所以燒嘢食一定唔得無叉用。
隨住時代進步，加埋各地文化加鹽加醋，燒嘢食呢一門歷史悠久嘅玩意，喺各地開枝散葉，變出好多花臣。本質亦由幾億年前淨係應付日常所需，變成家吓嘅搵錢活動，交際應酬，朋友聚舊，具備多樣功能。
燒嘢食最麻煩同最要求技巧嘅步驟係透爐，而最擇洗就係落雨、無叉用同埋素食者嘅參與。不過隨住現代化同商業化嘅燒嘢食模式興起，加上燒啲嘢食越嚟越五花八門，呢四種問題已經基本得到解決。
燒好嘅嘢食最好自己食，同廣東人講「燒畀你架」好唔老黎。
目錄 |
[編輯] 古今分別
[編輯] 之前
當人類仲係晌捕獵同採摘野果充飢嘅時代，一切幾乎都係即食。士多啤梨蘋果橙係，飛禽走獸殺左返嚟都係生食，停留晌茹毛飲血嘅階段。當人類發現鑽木可以取火，就開始利用火嚟改善生活，好似照明、取暖以及煮食等等。由於冇任何裝嘢嘅砂煲罎罉，一切都係用手又或者用樹枝代手去做。搵啲柴同葉返嚟去起火，用樹枝木棍直接拮住啲啱啱打返嚟嘅豬牛羊等等肉類，直接同火接觸，燒到佢出煙變色熟晒，食得，就係古代嘅燒烤，其實同現代三五成群郊野燒嘢食好似，不過用具同玩法當然先進好多。
[編輯] 家陣
今時今日，燒嘢食唔再係醫肚咁簡單。燒嘢食成為飲食業中其中一門最撈得起嘅生意。世界各地發展出好多具備當地風格，各有所長嘅燒烤類型。韓燒、港式燒味、東南亞串燒等等都好受大眾歡迎。而且，古代燒烤通常一個人搞掂，為滿足生存必需充飢，食完就算。家陣啲人燒嘢食剛剛相反，一個人無論去郊外還是入餐廳燒嘢食都唔常見，因為除咗醫肚，好多時喺為咗聯誼，係人類社會一種人際交流活動。都市人會約埋去燒烤餐廳唰餐勁，鄉郊居民會叫埋鄰居老友嚟開個燒烤大會，邊食邊吹水，都見到燒嘢食呢件事晌現代嘅轉變同功能轉換。有得食有得玩有意義，確實一舉數得，抵玩！
[編輯] 燒嘢食用嘅嘢
火：燒嘢食梗係要起火。一般郊遊/沙灘，又或者街邊串燒檔，用燒烤爐燒嘢食都係用炭。起火過程叫透爐或者起爐，並唔簡單，好講透爐條友學藝精唔精。餐廳就方便得多，燒嘢食甚至唔再一定見到火。利用電或煤氣爐加熱鐵板，一樣可以整熟板上食物。呢種方法多見於韓燒。
架生：露天燒烤一般係用燒烤叉，晌燒嘢食之前用水洗或插沙，之後燒一燒，再用紙抹，作為清潔程序。坐地式燒烤爐則用長鐵夾，放嘢食晌烤架燒，之後直接分比食客。用嚟食嘅架生都係嗰堆木筷子膠刀叉同手，裝嘢食不外乎紙碟同膠碗。
各地燒嘢食用咗好多唔同嘅架生，港式燒乳豬用大鐵鈎，都係因應件嘢食大細而發展出嚟。
燒：直接叉住嚟燒。差唔多食得嗰陣，有人中意加蜜糖或者燒烤醬，帶出食物香味。有一門方法會用錫紙包住金菇牛肉，番薯粟米等等要耐啲先食得嘅嘢放晌炭執邊煨同烘，大概到中段開封就食得。不過由於火力大小好難控制，好多時拆開嗰陣啲嘢食都燶晒。錫紙包燒法一般會落較多料，好似豉油、蒜頭、BBQ醬等等以前唔會出現晌燒烤爐嘅醬。有另外一啲方法會將食物用半個人咁高嘅鐵叉拮起，然後晌啲火隔離係咁轉，都係要令每一部份嘅肉均勻變熟。
嘢食：香腸、牛/豬/魚/蝦等等種類嘅丸幾乎必定出現。其他生肉例如雞翼、牛/雞/豬/羊扒、魚蝦都係大眾選擇。一般街邊肉食店都有啲醃好晒，買嚟可以即燒嘅肉食。非肉食類嘢食通常有麵包、棉花糖、粟米、番薯、冬菇等等。菜少見啲。
餐廳以開放自助嘅形式任你揀任你攞，食物選擇都係大同小異。
水：有嘢食無嘢飲點得，想渴死咩。而食飽之後執嘢又可以來淋熄爐火。
[編輯] 燒嘢食地方
歐美嘅人經常會晌屋企個花園度搞燒嘢食，叫埋三五知己隔離鄰舍一齊嚟聯誼。由於地方大，十幾廿人邊食邊玩邊吹水，悠悠閒閒過個歡樂下晝，非常寫意。
好似香港呢啲太細嘅地方，搵個後園燒嘢食唔係咁容易。唔少私人樓個天台都比住客租嚟燒嘢食，而政府晌唔少沙灘同郊野公園都整咗好多石造嘅燒烤爐，比市民燒嘢食。市民拎齊架生，先到先得，等到個爐就有得你燒。大時大節，免費爐例必供不應求。有啲有公眾爐嘅地方會有私人營業嘅燒烤檔，齋提供鐵架爐租比人，不過收費幾揦脷，大節日更加會坐地起價，比閒日高一到兩倍不等，仲要限制時間。
近年有新興燒烤樂園湧現，晌一啲位置離市區幾遠，但係風景幾正嘅地方開設一大個燒烤場。裏面提供所有嘢食同架生，仲有玩嘅嘢，好似足球直播、麻雀耍樂等等，畀錢就有得玩有得食，成為好多家庭聚會或者集體活動嘅去處。
串燒好味抵食，晌各地嘅露天市集或食街都見到串燒檔開到成行成市。串燒流行令到市區任何一條街邊都變成燒嘢食嘅地方。
晌露天地方燒嘢食，好處係啲煙可以自然散走，唔會搞到一陣味。不過時下好多餐廳經營各國嘅燒烤菜，令到燒嘢食可以登堂入室。食客可以嘆住冷氣，自己一邊燒一燒食，又或者職員燒，顧客食。燒嘢食經已唔再一定搞到周身汗污糟邋遢，而係一年四季都可以舒舒服服。燒烤餐廳較常見係做韓燒，皆因佔地不多，一個場可以開多幾圍。而且晌鐵板中間放個爐做埋打甂爐更係越嚟越普遍，令食客有雙重嘅享受。
[編輯] 連結
- 短線遊：郊野公園BBQ唔使帶炭 壹蘋果網絡
- 港式燒烤(英文)
- 港式燒烤嘅樂趣(英文)
- 港台中秋小不同
[編輯] 資料
香港燒烤露營指南，李日陽，萬里機構 ISBN 9621423473
