筷子
出自維基百科，自由嘅百科全書
筷子，或者淨係叫筷，係種食嘢嘅工具。一對筷子共有兩支，可用來嚟夾嘢食或者耙飯。亦有啲人中意用筷子來督嘢食。
喺古代嘅中國，筷子原本叫做箸，因為廣東話箸同住同音，即係停響度咁解，唔係咁吉利。所以改口叫快，即係停住嘅相反，後嚟直頭用筷字嚟做代表。
筷子係東亞四國：中日韓越嘅主要食具。泰國都有用，不過淨係用來飲湯同食麪。
[編輯] 揸法
筷子嘅標準揸法係：上支用姆、食、中三隻手指彎彎地咁鉗住，好似揸鉛筆咁；下支用姆指同食指之間嘅虎口夾住，再用無名指承住。夾食物時，下支基本上唔郁，靠鉗住上支嘅三隻手指用力嚟夾實嚿嘢。
由於力點嘅食指距離支點嘅姆指好近，而重點嘅嗰嚿嘢就遠好多，所以話筷子係一種嘥力既槓桿。
[編輯] 禮儀
中國人用筷子食飯夾餸係由遠古流傳落嚟嘅，上至皇室貴冑，下至平民百姓都會用，所以日常生活當中對筷子嘅運用有佢非常講究嘅一套。揸法固之然要正宗，以前仲指明要用右手嚟揸，而且筷子嘅兩端一定要對齊。喺食飯前，對筷子一定要整齊平排咁放喺飯碗嘅右邊，而食完飯之後就要將對筷子整齊咁擺喺正中。
而用筷子其實仲有好多禮儀要遵守，以下就列舉出「用筷子衰十一」嘅十一種禁忌，希望所有用筷嘅人都識做唔好喺人面前失禮。
[編輯] 用筷子衰十一
- 【三長兩短】：意思即係話喺用餐前或者用餐嘅過程入面，將筷子前後唔齊咁放喺檯度，認為係極之唔吉利。三長兩短代表死，有話係因為棺材喺未冚蓋之前，係由側邊底下三塊長木板同上下兩塊短木板組成，而人死先會入棺材，所以成為用筷禁忌之一。
- 【仙人指路】：哩種揸法係唔可以接受兼且極度失儀，佢意思係上支剩係用大姆指加中指嚟做力點，而食指就向著外面指。北方人叫哩啲做「鬧街」，而食飯時有隻手指伸咗出嚟指指貢，就好似喺度指鬧緊邊個咁，係好冇禮貌嘅做法。另外仲有一種仙人指路，就係一路同人講嘢一路用筷子指人，咁做一樣係好冇禮貌同乞人憎，切戒。
- 【品箸留聲】：哩一種做法亦係好討厭嘅，意思係將筷子嘅一端含喺嘴度，用個嘴來回咁啜，仲週不時發出噝噝聲。佢被視為係下等做法，因為喺食飯時用嘴啜筷子，本身就已經係一種冇禮貌嘅行為，再配上核突嘅聲音，更加令人討厭，仲會畀人覺得係冇家教。
- 【擊盞敲盅】：即係喺食飯時用筷子去敲擊啲碗碗碟碟，哩種行為就好似乞兒搵人要飯食咁。喺以前，啲行乞嘅人為咗想吸引人注意，就會一路敲住個碗砵一路依依哦哦咁哀求，希望路過嘅人可以施捨啖飯或者一個幾毫。所以食飯時敲碗碟係被視為下等唔要自尊嘅做法，俾人睇小。
- 【執箸巡城】：即係手拎著筷子，又唔理有冇人想食，就喺碟餸上面氹氹轉好似巡邏咁款，唔知想喺邊度落筷子夾嘢。哩種典型缺乏修養嘅表現，加上目中無人嘅態度，令人極之反感。
- 【迷箸刨墳】：意思即係拎著筷子係咁喺碟餸上面摷，想搵到自己嘅獵物，就好似啲盜墓者係咁用嘢刨人哋個山墳咁款；咁做實會畀人鬧：「咁樣翻亂哂點過哂，人哋仲駛食嘅？」，係比起執箸巡城更加缺乏修養、更乞人憎嘅行為。
- 【飛象過河】：即係夾嘢時，明明對住自己嘅一邊碟都有，但就係要喺碟餸嘅最遠嗰邊夾起。咁嘅行為同樣唔要得，會畀人覺得冇家教。
- 【淚箸遺珠】：有啲餸會有汁料湯水伴埋，夾嘅時候如果唔用個碗或者器冊兜住，啲汁好容易會喺運送嘅過程中滴到週圍都係；尤其是係隔住幾碟餸嘅時候，仲會將啲滴汁撈咗落去第二啲餸度，極之令人反感，屬於嚴重失禮嘅行為。
- 【顛倒乾坤】：即係話倒轉筷子嚟用都唔理，照夾可也。哩種做法係會畀人睇低，因為搞到好似餓狼搶食，連面都唔顧，連筷子倒轉都唔理最緊要食咗先咁款。
- 【定海神針】：意思係話喺食飯嘅時候用一隻筷子去插碟入面嘅食物餸菜，咁做被認為係對同檯食飯嘅人嘅一種侮辱，就好似用中指指人一樣，係極之唔要得嘅行為。
- 【當眾晉香】：有啲人出於一片好心諗住幫人裝飯，點知順手就將對筷子插落啲飯度遞俾人，哩樣亦都係極之侮辱同埋不敬；因為哩一吓同插香嘅款一樣，而只有死人先會食香，所以係絕對唔可以接受嘅做法。
