阿媽

阿媽，媽，媽媽，老母、老媽子、媽子、老媽媽，而古時嘅中國就叫娘或者娘親，文言寫做母親或者母。英文阿媽叫mother，所以有人就叫媽打，而英文變體mummy，mammy或者mommy 就變成媽咪呢個叫法。

[編輯] 來源

唔理係媽定係母(古代媽同母都係ma)，都好可能係蘇蝦學出聲嘅頭嗰幾種聲。因為咁就畀大人當係叫阿媽嘅。爸(pa)，爹(te)都係有異曲同工之妙。所以有啲話同廣東話唔同，阿爸阿媽會掉轉來叫。

媽媽通常係雌性，係仔女對由肚裡面生佢哋出嚟嘅人嘅稱呼。不過有時候，就算唔係由哩個人親自生出嚟，但係哩個人獻出咗養育之恩，咁被佢養育嘅人都可以叫佢做媽媽。

如果親生媽媽離咗世或者離咗婚而唔再同爸爸一齊，但係爸爸就娶咗另一個女人，咁哩個女人就會成為啲仔女嘅「繼母」(俗稱「後母」或者「後底乸」)。

母愛係指阿媽對子女嘅愛。所以話阿媽係最偉大嘅人亦絕大部份嘅人都會贊同，因為除咗以上講嘅之外，有啲媽媽為咗仔女，仲會不惜犧牲自己，甚至獻出性命嚟作出保護；以上哩啲行為就稱之為「母愛」。

有好多電視或者電影都會用母愛嚟做橋段，就好似香港有一套同系列嘅電影，佢哋分別係喺1985年出品嘅《法外情》、1988年嘅《法內情》同埋1989年嘅《法內情大結局》，哩系列嘅戲充份咁刻劃出媽媽對個仔無私嘅愛，係十分之感人肺腑嘅經典電影。套戲係由葉德嫻飾演阿媽，而劉德華就飾演做律師嘅仔。

另外，美國人安娜查維斯兩母女，一直咁推崇阿媽對仔女嘅母愛，要定下母親節。個女響阿媽死咗之後兩年，就將1907年5月12號佢阿媽死忌做母親節。最後美國1914年開始將每年5月第二個星期日定為「母親節」。而呢個習俗就推而廣之到世界各地。

人類對於一個有感情嘅地方或者有感情嘅事物，甚至敬拜嘅神靈等等，都可以用母親嘅名號嚟稱呼，好似：

母地：　即係家鄉（英文係 Motherland），存在咗孕育之恩嘅情感。
聖母瑪莉亞：　天主教及基督教嘅聖經入面講，經聖靈欽點而生出神之子耶穌（Jesus Christ）嘅女人。因為聖經典藉話佢係由古到今唯一完全冇原罪嘅人，於是成為咗世人之母。
皇母娘娘：　又叫天后娘娘，道教裡面嘅神靈，係喺天界上面玉皇大帝身邊嘅皇后。
母校：　即係曾經就讀過嘅學校。
母會：　通常係用嚟講運動員出身嘅屬會。
外母：　話係另類係因為佢唔屬於一個人本身直系親屬列表裡面嘅人，亦都冇養育之恩，但係又好有親戚關係；佢就係一個男人對佢老婆嘅阿媽嘅稱呼。至於一個男人對佢嘅外母有冇感情則係好個別，冇得深入討論；但係跟據「愛屋及烏」嘅道理，唯有計佢係有感情嘅對象。

至於水母（又叫「白蚱」），佢並唔屬於阿媽哩個欄目嘅嘢，而係一種無脊椎嘅水中軟體生物嘅名稱，千奇唔好誤會而搞錯。

做錯嘢或者見到啲嘢而驚嘆、或者感嘆話覺得唔抵、唔忿氣，好多時會搬阿媽出嚟作為感嘆。例如中國北方人好興喺感嘆時大叫：「我的媽呀！」或者「媽的！」。

各種語言嘅粗口，包括粵語粗口，都好興搬人哋阿媽出嚟鬧同侮辱。