香港賽馬
出自維基百科，自由嘅百科全書
賽馬喺香港歷史悠久，係香港最受歡迎嘅運動之一，香港人又會叫跑馬。
賽馬喺香港好多時比人同賭扣埋一齊。亞爸亞媽見到亞仔亞女揭開張馬經，慌死學壞，大鬧「仲乜學人賭馬！」。於是賽馬晌香港某啲人心目中極之唔好，甚至將賽馬同賭劃成等號。咁嘅賽馬文化晌世界都算得首屈一指兼夾寥寥無幾。
香港嘅賽馬由香港賽馬會搞同管，負責整個香港賽馬事業嘅運作。除咗香港賽馬會搞嘅賽馬博彩，其他博彩渠道都係犯法。
目錄 |
[編輯] 歷史
[編輯] 早期
早喺香港成為英國殖民地初期，英國人已經將賽馬帶嚟香港，喺當時叫黃泥涌谷嘅跑馬地搞賽馬。最早嘅賽馬喺1844年。照記載，1850年代已有唔同錦標賽事。1873年有第一次香港打吡大賽，1884年香港賽馬會成立，管理香港賽馬，喺快活谷馬場跑道側邊起咗嗰好廢嘅看台。早期賽馬每年一次，每次幾日，叫周年大賽。有份玩嘅馬主同馬迷多數都係英國人同其他鬼佬，包括啲官同洋行職員等。華人參與成份幾乎係無。
1918年2月26日，快活谷馬場跑周年大賽嗰陣發生火災。件事好大鑊，死咗超過500人。由於當時個看台只用竹搭，加上場地狹窄，環境擠迫，所以死傷慘重。
日治時期，賽馬並無因打仗而收檔。日本人繼續馬照跑，乘機搵油水，消磨市民心智。後尾唔夠真馬仲搞到跑木馬。
二次大戰後嘅香港，唔理鬼佬定華人都覺得賽馬越黎越過癮。1960年代，一到跑馬日子，快活谷馬場都人頭湧湧。馬會開始諗吓喺新界沙田起多個馬場。
[編輯] 戰後職業化
香港賽馬由開埠以嚟都係業餘，由好鍾意騎馬嘅人做騎師。隨住賽馬運動發展，業餘騎師制度開始唔夠駛，於是喺1971年正式行職業化，搵外國專業騎師嚟香港騎，又開埋見習騎師訓練班，訓練本地全職騎師。第一屆畢業嘅見習生有曾經出去幫世界大馬主之一阿加汗騎嘅多屆香港冠軍騎師告東尼。騎師訓練班去到而家一直都有搞，一路為香港馬圈補充新血，培訓一班本地薑。呢啲本地騎師晌港澳兩地從騎(家陣晌澳門策騎嘅有蔡鎮威，何華麟)，之後從練(例：葉楚航，陳柏鴻)，又或者投身評馬人行列(例：洪維德，王若舜)，令到馬圈發展更健全同平衡。
沙田馬場喺1978年10月落成，提供更掂更正嘅養馬同賽馬環境。去到1980年代，馬匹質素亦係咁提高，馬主願意買更貴嘅馬嚟香港跑。呢一期香港出現過祿怡、同德呢啲馬王。去到1990年代，香港賽馬發展到一個更高嘅水平，
[編輯] 國際化
隨住賽事同馬匹質素不斷提升，1980年代尾，香港的賽馬水平已經同賽馬發達國家睇齊。馬會喺1988年第一次搞香港邀請盃賽，邀請新加坡馬匹嚟跑，賽事漸漸發展成香港國際賽事，無論賽事水準同獎金都係世界頂級水平。
踏入1990年代，香港晌國際馬壇地位亦提高，馬匹去外國跑嘅情況越嚟越多，開始有收穫。1995年，有性格喺澳洲高智錦標跑第三係第一匹遠征入位嘅香港馬。而1999年靚蝦王贏日本安田記念係首匹遠征贏馬嘅香港馬。
[編輯] 賽事概況
[編輯] 賽馬日
賽馬日通常晌星期三、六同日舉行。星期三跑夜馬，多數跑快活谷，但間中都會跑沙田，編8場。週末會揀星期六或日是但一日跑日馬，多數跑沙田，但一季中總有三兩日係跑快活谷日馬，多數編10場。有時夾埋越洋轉播就會多一兩場，甚至擺星期二跑夜馬(例：轉播澳洲墨爾本杯)
[編輯] 馬場
香港地跑馬，最初係喺港島黃泥涌谷嘅快活谷馬場(又叫跑馬地)舉行。快活谷馬場歷史悠久，1844年經已搞第一次賽馬。快活谷係世界少有市區馬場，而且跑好多夜間馬，經已係世界知名嘅地標。快活谷現設一條草地跑道，但亦曾經有過沙地同安妥膠跑道，全部晌1990年代中期換哂做一條草地跑道。 1971年，政府拍板，比馬會喺沙田起馬場，並喺1973年尾開始起。又爆山又填海，終於沙田馬場喺1978年10月4日正式開幕。經過不斷擴建，起大個看台，換個超闊大銀幕，起個天幕同新沙圈，沙田馬場設施水平經已係世界一級。香港多數大賽都會擺喺呢個規模較大嘅馬場度跑。
[編輯] 評分制度
香港賽馬行評分制，多跑讓磅賽，同年紀馬賽事又或者年度大賽就跑隻隻馬孭同一個磅嘅平磅賽。每匹馬都有個評分。評分制度算係比較特別，除左港澳，全世界唔係好多地方用。晌早期，香港賽馬按評分劃出左好多班次，直到近年將所有馬劃作六班:
| 班次 |
精英班 |
第１班 | 第２班 | 第３班 | 第４班 | 第５班 |
|---|---|---|---|---|---|---|
| 評分區域 | 120或以上 | 95-120 | 80-100 | 60-80 | 40-60 |
0-40 |
每季賽事有唔少贊助杯賽，但係級際賽一直維持晌十幾場大賽，於是今季馬會編多一啲三級賽嚟增加賽事可觀情況。
[編輯] 馬
晌香港跑嘅馬，會標做四種：
國際拍賣會新馬：晌香港國際馬匹拍賣會買嘅馬。馬會搞呢個拍賣會，每年一次，由馬會啲人買廿幾三十隻未跑過嘅兩歲馬黎比合資格馬主選購。呢啲馬會晌新馬班起步，一季後按成績編班評分。而晌新馬班果季無跑過的話，呢啲會喺之後嗰季劃一編晌第四班五十二分。晌下年拍賣會嗰陣會有一百萬拍賣會狀元獎金，比之前一年拍賣會中成績最好嗰隻馬個馬主。
自購馬：馬主自己喺外國培育又跑過，又或者買一啲晌外國跑過嘅馬嚟香港跑。呢類馬嚟到香港，評磅員會按佢晌外國跑嗰陣嘅成績評分插班。由於一切係睇紙上賽績評分，有好多自購馬好似好勁，開波編到好高班，輸左好多場落到低班先識贏，咁係因為呢啲馬可能晌外國跑嗰陣經已用得太盡，搾到無乜得淨，又或者根本唔適應香港水土，無貨交。
自購新馬：同自購馬一樣，唔同嘅係呢啲馬未跑過，會晌新馬班起步，評分情況同上面拍賣會新馬一樣。馬王精英大師正正係第一季無跑，第二季五十二分起步嘅例子。
訪港馬：嚟香港跑個別國際賽事嘅馬，跑完即閃。當中都有啲係隻馬跑完比安排嚟留低喺香港跑，好似代表完澳門代表香港嘅電光火力同埋代表完澳洲代表香港嘅狂野之聲。
香港太細，無自己嘅配種業。家陣跑緊嘅馬全部喺晌外國養好晒買過嚟，通常嚟自澳洲，紐西蘭，英國，法國，愛爾蘭，美國呢啲賽馬同配種事業都好蓬勃嘅國家。近年又開始有南非，阿根廷等等冷門地方嘅馬引入香港。由於香港無配種，馬一旦退役，等同失去搵銀價值。所以多數香港馬都係閹咗嘅雄馬，即係騸馬，因為咁樣做可以令隻馬無咁燥。而香港馬中嘅雌馬更加係十隻手指數得哂咁少。只有好少部份叻嘅雄馬退役後會送去有配種業嘅地方打種。
[編輯] 騎師
香港賽馬嘅騎師有本地培訓同海外引入。家陣本地薑多數係由騎師訓練班入行，做到見習生就可以出賽，贏夠一定場數就會升為大師傅。洋將就由練馬師同馬會本身斟返嚟。現時晌香港騎緊嘅洋將不乏國際有名嘅騎師，好似巫斯義，冼毅力。間中馬會斟返黎晌季中客串或騎一段時間嘅騎師又係當時得令，好似蘇銘倫呢啲。 近年，華將騎師生存空間縮少。因為洋將當道，好多熱門馬明星馬都交晒比啲洋將騎，令到華將無乜實力座騎，經常騎一啲被認為無乜贏馬機會嘅冷門出賽。其實佢哋嘅騎功公認唔差過洋將，於是馬會除左行見習生減磅，仲優惠每位華籍大師傅，上陣可以減兩磅。自此，情況稍有好轉，賴維銘，鄭雨滇等贏馬數字都多番啲，但仲係晌掙扎期。
[編輯] 賽事途程
| 途程\場地 | 沙田草地跑道(田草) | 沙田全天候跑道(田泥) | 快活谷草地(谷草) |
|---|---|---|---|
| 1000米 | √ | X | √ |
| 1200米 | √ | √ | √ |
| 1400米 | √ | X | X |
| 1600米 | √ | X | X |
| 1650米 | X | √ | √ |
| 1800米 | √ | √ | √ |
| 2000米 | √ | √ | X |
| 2200米 | √ | X | √ |
| 2400米 | √ | √ | √ |
[編輯] 博彩
香港賽馬會係香港唯一合法接受賽馬投注嘅機構，提供多種投注方式。彩池及投注額排世界前頭。馬會晌彩池中抽佣做營運經費，仲抽取部份作為博彩稅繳納予香港政府，馬迷經常呻話比馬會係咁抽水。
除了在場內投注外，馬會亦接受場外、電話、網上投注、流動通訊投注及自助終端機投注，現有超過100家場外投注站，及超過100萬個電話投注戶口。
1990年代後期，面對經濟衰退，非法外圍投注，同埋澳門賽馬投注等等嘅問題，投注額每況愈下。近年馬會不斷大力宣傳賽馬，將重點集中喺自由行人士，仲將投注彩池推陳出新，吸引投注額。每逢國際賽就快到，都會搵明星做推廣大使，又會搞一連串活動吸引馬迷入場，但係投注額仲未止跌回升。投注額從96-97年度創下924億港紙新高之後一直跌，跌到05-06年度投注額得番600億5000萬，足足跌左超過三成半。晌06-07馬季，馬會開始對大客回水，每注買一萬就回一部份水，希望引多啲人嚟買馬賭馬。
[編輯] 投注方法
- 場內
- 場外投注站
- 電話投注
- 投注寶
- 互聯網投注
- 短訊投注
[編輯] 投注玩法
- 獨贏 (Win)：簡稱W(投注者叫「WIN」)，買中頭馬；可覆式同埋設過關；
- 位置 (Place)：簡稱P(投注者叫「披」或者「披士」)，買中跑入頭、二或三馬；可覆式同埋設過關；
- 連贏 (Quinella)：簡稱Q，買中頭二馬，唔駛順序；可覆式、配膽同埋設過關；
- ＊註：有術語叫做「鐵三角」，即係三隻馬互串成三注飛嘅買法；
- 而「鐵六角」(又有人叫「連贏四串六」，不過哩個叫法好易同過關飛混淆)，即係連四隻馬互串成六注飛嘅買法；
- 位置連贏 (Quinella Place)：簡稱QP（投注者會叫「位置Q」、「連贏位」或者「Q披士」），投注馬匹跑入頭、二或第三名；可覆式、配膽同埋設過關；
- 獨贏及位置 (Win Place)：簡稱贏位(投注者又叫「WIN 披士」)，即係獨贏加埋位置一齊買；
- 連贏及位置連贏 (Quinella & Quinella Place)：簡稱QQP（投注者會叫「連贏位置Q」或者「QQ披」），即係連贏加埋位置連贏一齊買；
- 三重彩 (Tierce)：選擇馬匹要跑入頭、二同三名，要順序；可以覆式同埋配膽，仲可以指定位置馬膽(即係所選擇嘅馬必須要按住投注者所指定嘅名次而入圍)；
- 四連環 (First Four)：投注嘅馬匹要跑入頭四名，無需順序；
- 單T (Trio)：一樣要係跑入頭同埋二三名，無需順序；可覆式、配膽同埋設過關；
- 孖T (Double Trio)：指定兩場賽事嘅馬匹要跑入頭同二三名，唔駛順序，夜馬通常開兩口，日馬家吓開三口；叫法係「第一／二／三口孖T」；
- 三T (Triple Trio)：指定3場賽事(通常係賽日嘅第3、4、6場)頭二三名，唔駛順序；
- 孖寶 (Double)：選擇兩場連續嘅賽事(用「孖」做單位)，頭關必須買中頭馬，而尾關買中頭馬派正獎，中二馬就派安慰獎。
- 六環彩 (Six-up)：指定6場賽事(通常最尾6場)嘅頭或二馬，如果中晒六環彩場次嘅頭馬仲可以得到「六環彩六寶獎」；
- 混合過關 (All-up Cross)：可自己揀用獨贏、連贏、位置、位置Q、贏位同埋連贏位置Q任何一款嚟互串過關，最少過兩場，最多六場；對於以上哩幾個彩池嘅過關嚟講，選擇同款(單項)或者唔同款(混合)都可以。(單T 都過得，不過齋比過單T 冇得混合，而且最多3關)
[編輯] 順便睇睇
- 香港賽馬會
- 香港賽馬博物館
- 香港馬王
- 造馬
- 香港打比大賽
- 香港賽馬資料庫
[編輯] 連出去
