新加坡
出自維基百科，自由嘅百科全書
新加坡共和國(英語：Republic of Singapore，馬來語：Republik Singapura，淡米爾語：சிங்கப்பூர் குடியரச，Cingkappūr Kudiyarasu）係東南亞嘅一個城市島國，由新加坡島同埋側邊幾個島嶼組成，位於馬來半島南端，馬六甲海峽南口，南面有星加坡海峽同印尼隔海相望，北同馬來西亞相隔柔佛海峽，有長堤相連。
1819年英國東印度公司嘅史丹福·萊佛士同柔佛蘇丹簽訂條約，被獲准新加坡建立交易站同殖民地。由於特殊嘅地理位置，新加坡二次世界大戰之前一直係大英帝國邂東南亞最重要嘅据點，逐漸發展成為一個繁榮嘅轉口港。1965年獨立後，邂總理李光耀嘅領導之下，新加坡邂一代人嘅時間內從一個第三世界國家轉變為一個富裕嘅已開發國家，人均國民生產總值居世界前茅。新加坡以廉潔嘅政府、清潔嘅都市、高效率同袂完善嘅法制聞名於世，但同時又以政府嚴格嘅管制著稱。
目錄 |
[編輯] 歷史
新加坡早期主要有馬來人居住，其最早嘅文獻記載源自中國公元3世紀。14世紀中國明朝時將新加坡叫作「淡馬錫」。1819年1月29日英國不列顛東印度公司僱員史丹福·萊佛士登陸新加坡，並開始管轄該地區，1824年新加坡正式成為英國殖民地，最初隸屬於英屬印度殖民當局管轄，1867年升格為海峽殖民地，受英國直接統治。
1941年太平洋戰爭時期，新加坡被日本佔領達3年6個月，並改稱「昭南特別市」（Syonan）。1945年8月英國重新管轄新加坡並恢復舊稱。1959年取得自治地位，1963年新加坡、馬來亞聯邦、砂勞越同北婆羅州（現沙巴）成立馬來西亞聯邦，完全脫離英國統治。1965年8月9日新加坡宣佈退出聯邦，成為獨立嘅主權國家。
獨立後嘅新加坡，喺1970年之後，雖然政治上嘅自由空間逐漸被壓制，但經濟上就取得高速發展，很快就成為東南亞重要嘅金融和轉口貿易中心，成為「亞洲四小龍」之一。同時新加坡人民嘅生活水平亦得到大幅度提高，住房、教育、交通等問題都得到解決，到1990年李光耀卸任總理時，新加坡已經成為區內乃至整個亞洲經濟發展嘅楷模。喺第二任總理吳作棟嘅帶領下，呢個東南亞小國又平穩咁度過咗1997年亞洲金融危機。但到21世紀初第三任總理李顯龍接任嗰陣，新加坡又再度面臨點樣面對區內其他經濟體系崛起嘅新難題。
[編輯] 政治
根據新加坡嘅憲法，新加坡實行嘅係議會制政府。國家機構三權分立，總統由直接民選產生，為國家元首。國會議員亦都係選舉產生，總理喺國會多數黨中產生，佢領導嘅內閣擁有行政權，並由獨立嘅公共服務委員會管理公務員嘅聘用同埋處分。總理喺議員中選出內閣部長。
自1965年起，人民行動黨一直係唯一嘅執政黨，在議會中亦好少有能夠形成監督力量嘅反對黨。外界普遍認為，人民行動黨對反對黨同埋異見分子嘅打擊係毫不留情嘅，包括喺選舉前重新劃分選區、運用行政資源同訴諸法律行動等。但同時不容否認嘅，人民行動黨確實喺新加坡民眾中擁有好高威望，喺建國後嘅歷次選舉中該黨嘅總得票率從未低過 65%。
有啲西方國家指責人民行動黨主宰咗新加坡主要嘅政治舞臺，因為國會成員絕大多數都係該黨黨員，三任總理李光耀，吳作棟同李顯龍亦都係人民行動黨黨員。不過，由於國會嘅構成嚟自選舉結果，呢啲指責並無太大嘅說服力。不過，新加坡即便亦都係實行選舉制度，亦有啲人認為新加坡政府體制似乎更接近專政統治而唔係民主政治。
一般認為，新加坡言論自由嘅空間喺1965年獨立之後就一直受到壓制，雖然近年佢為咗鼓勵創意產業嘅發展同展現更開明嘅政府態度，已經喺呢方面有所放鬆。有啲人認為，人民行動黨政府通過政府持股嘅方式間接控制咗該國兩大媒體集團，反對聲音亦因為種種限制好難通過其他私人出版機構出版佢哋嘅著作或者發表言論。外國媒體對新加坡政府嘅批評往往會導致誹謗官司，或者被限制喺新加坡嘅發行量。此外，個人或民間組織亦被禁止自行安裝衛星天線接收器，所有外國電視節目都可被審查。政府亦對網絡進行管制，具體管制情況不詳，不過封鎖嘅網站好多都係色情網站。
人民嘅行動自由並沒有受到太大限制，但當局對一切集會活動都非常關注。只要達到一定數量嘅戶外集會，都必須同警方備案。新加坡嘅內部安全局擁有非常大嘅許可權，被殖民地時期留低嘅內部安全法授權可以喺必要時無限期拘留任何被懷疑可能對種族和諧同社會穩定造成威脅嘅人士，並可以喺不經審訊嘅情況下扣押多年。有啲人認為，呢部法律喺人民行動黨政府對付共產黨嘅時候被濫用。
此外新加坡嘅高壓管制重表現喺對日常行為嘅監督上：香口膠被禁止喺新加坡境內銷售（醫療用香口膠除外）；隨地丟垃圾、用完廁所後唔沖水、喺地鐵飲水或者食嘢都會導致高額罰款或強制勞役，好似罰喺公眾地方掃街示眾。呢個國家重擁有可能係全世界最嚴格嘅禁毒法律，攜帶毒品入境或藏毒作販賣用途嘅主要刑罰係絞刑。另外對於成年男性犯罪者仲可以使用笞刑處罰。不過雖然大多數外國人無法理解呢啲嚴厲嘅刑法，大多數新加坡人都認同可以用重罰嚟遏制犯罪或破壞性行為。
[編輯] 地理
新加坡一共有大小島嶼50幾個，地勢起伏和緩，主島新加坡嘅面積佔90%以上。新加坡好多地區都係填海產生，1950年到依家大約有20%嘅國土面積係由填海產生。
新加坡地處熱帶，四季如夏，氣溫變化較細，年平均溫度喺24攝氏度至32攝氏度之間，濕度較高，每日平均濕度係84%。降雨充足，年均降雨量喺2,400毫米左右，每年11月到1月係雨季，雨水較多。
新加坡早期嘅移民多數聚集喺中南部新加坡河出海口一帶，其他地區好多係熱帶雨林或農業用地，但係除咗少數嘅自然保護區外，今日基本上都已經城市化。新加坡綠地面積非常大，除了美化城市外仲有降暑嘅功用。
由於無淡水河，新加坡嘅主要水源就係降雨，因此修建咗多個蓄水池。雖然降雨量大，呢啲雨水仲係無法滿足新加坡嘅用水需要，目前50%嘅水源依靠進口，大部分嘅水係喺馬來西亞進口。新加坡亦都積極開發其他水源，包括海水淡化同埋再生水。
[編輯] 人口及語言
新加坡係世界上除咗澳門以外人口密度最高嘅地區，宜家常住人口超過400萬，其中25%以上係外國公民。本國公民中，四分之三嘅人口係華人，亦係世界上除兩岸四地以外，唯一華人人口佔大多數嘅國家。馬來人佔14%左右，印度族為8%，仲有少部分歐亞混血人口。
係住房方面，84%嘅新加坡人口居住係由政府建造嘅組屋中，價格非常低廉，仲可以高價再轉售比無權購買新組屋嘅新加坡永久居民或外國人士。組屋之外最多人居住嘅係共管式公寓，屬於私人嘅公寓住宅，價格一般係政府組屋嘅四、五倍之多。此外仲有少部分嘅排屋（即聯體別墅）或獨棟別墅。
新加坡通用華語、英語、馬來語同埋泰米爾語四種官方語言，其中馬來語係國語，但政府機構等多通用英語。早期嘅新加坡華人大多習慣使用唔同嘅方言，但係經過幾次大規模政府主導嘅「說華語運動」後，絕大多數新一代嘅華人多數習慣講普通話；此外新加坡嘅電視、電台對於方言節目亦有非常嚴格嘅限制，例如好多臺灣進口嘅閩南語電視連續劇同香港進口嘅粵語電視劇就必須用華語重新配音後先至可以播出。
英語雖然係新加坡官方語言，但洋涇濱語情況十分普遍。因此，新加坡政府發起咗「講正確英語運動」，鼓勵國民學說、多說以英美英語為標準嘅規範英語。參閱新加坡英語。
[編輯] 宗教
新加坡係一個多元民族、多元文化嘅移民社會，亦因此彙集了世界上多種宗教。
86%嘅新加坡人有宗教信仰。
- 佛教：新加坡第一大宗教。約佔人口嘅30%，信徒基本上係華人。
- 伊斯蘭教：馬來血統同巴基斯坦血統嘅人基本上都係穆斯林，有34.8萬人，全國有約80座清真寺。著名嘅有花蒂瑪清真寺同蘇丹清真寺。
- 基督教同天主教：10歲以上信徒28.5萬人（佔12.6%），係新加坡唯一仲喺度增長嘅宗教。有186座教堂。新加坡最早嘅教堂是禧街嘅阿美利安教堂同聖安德烈路嘅聖安德烈教堂。
- 道教：佔人口嘅13％，信徒基本上係華人。
- 印度教：有教徒8萬幾人，基本上係印度裔。印度廟22座。
其他宗教人數較少，合計只有1.1萬余人。錫克教係19世紀喺印度傳入嘅，教徒主要係錫克族警察、看守人，有7間錫克廟。好似奎因街嘅中央錫克廟。猶太教喺新加坡有兩個會堂。拜火教沒有廟宇。新加坡雖然鼓吹宗教自由，但係對少數偏門宗系，好似耶和華見證人，仍然有所禁制。
[編輯] 經濟
1965年後新加坡經濟成長迅速，係新興嘅現代化工業國家。工業主要包括區內最大嘅煉油中心、化工、造船、電子同機械等。擁有著名嘅裕廊工業區。國際貿易同金融業喺新加坡經濟中扮演重要角色。新加坡目前是繼紐約，倫敦同東京之後國際上第四大外匯市場交易中心。運輸業發達，擁有全世界最繁忙嘅港口同機場。人民生活水平較高，人均國民生產總值超過三萬美元，居世界前列。旅遊業亦喺總體經濟結構中佔重要比重，遊客主要嚟自日本、中國、歐美同東南亞其他國家。
得益於呢個國家穩定嘅政局、廉潔高效嘅政府同較低嘅成本，早期嘅新加坡係眾多跨國公司在東南亞投資嘅首選地。但係隨住人力成本嘅提高，同埋東南亞其他國家嘅相繼發展，新加坡嘅呢啲優勢逐漸喪失，好多工業、製造業紛紛外遷。但係由於英語嘅普及同高素質嘅人才，新加坡依然係區內最重要嘅金融中心。
但係受限於自身環境同埋全球經濟蕭條影響，2001年新加坡經歷建國後經濟狀況最糟糕嘅一年，GDP負增長2.2%，迫使政府開始考慮其他嘅發展道路。目前該國政府開始鼓勵私人創業同埋依靠中國及印度嘅崛起調整經濟結構，鼓勵企業到新興工業國家進行投資，但仲未見成效。
旅遊業同樣係政府重點支持嘅產業，雖然近年來旅遊業頻頻受到打擊，歐美同日本旅客明顯減少，憑藉著良好嘅旅遊服務質量同豐富多元嘅文化，新加坡每年接待嘅外國遊客仲係超過600萬人次。其中中國遊客數量增長最為顯著，主要係由於政府放寬中國公民簽證程序同埋延長逗留時間所致。為咗進一步鼓勵旅遊業嘅發展，新加坡亦非常重視廉價航空嘅發展趨勢，除開兩家私營嘅廉價航空公司之外，亦鼓勵馬來西亞、泰國、印度尼西亞同澳大利亞等國嘅廉價航空公司將新加坡列為目的地之一，亦表示願意降低樟宜國際機場嘅使用費用。
[編輯] 交通
新加坡交通發達便利，交通產業佔全國GDP總產值嘅10%左右。新加坡港嘅年噸位吞吐量已經超過香港，居世界之冠，2004年全年達到10.4億噸，而以貨櫃數量嚟計算，就位居世界第2，達到2130萬個標準箱。
新加坡依家有5個機場，其中樟宜機場同實里達機場係國際民航機場；另外嘅巴耶利峇機場、三巴旺機場同登加機場等3個就用作軍事用途。
新加坡嘅樟宜機場亦係東南亞甚至全世界最繁忙嘅空港之一，亦係澳大利亞至歐洲航線嘅必停站。作為亞洲最繁忙嘅5個機場之一，樟宜機場嘅年旅客數已經突破3,000萬人次。樟宜機場雖然已經有超過20年嘅歷史，但依然被評為全世界最舒適嘅機場之一，目前擁有2個候機樓同兩條跑道，第三個候機樓就喺度起緊。估計到2008年，樟宜機場嘅年過境旅客人數就會達到6,670萬人次。
仲有，新加坡北部嘅實里達機場依家擁有一條長達1,620米嘅跑道，專門連接鄰近國家嘅旅遊景點嘅定期航班、團體包機或者接待私人飛機，喺2005年，有關當局計劃擴展跑道到2,000米，用嚟接待波音737級數嘅客機，佢係新加坡第一個國際民用機場。
巴耶利峇空軍基地，擁有一條長達3,760米嘅跑道，係俾外國空軍到訪時使用。據了解，美國空軍經常呢個空軍基地停留。新加坡另外仲有三巴旺空軍基地同登加空軍基地。
新加坡本島嘅公路完善，擁有10多條高速公路貫穿全島。仲有公共交通同樣發達，依家開通咗3條地鐵線路，仲有一條起緊；巴士路線有成百條，由兩間公交公司經營，分別係新捷運同SMRT巴士有限公司。
私家車普及率喺新加坡唔係好高，主要係由於政府嘅諸多限制措施。私人買車必須首先競標攞到數量有限嘅擁車證，一張擁車證嘅價格就已經相當於一輛普通進口轎車嘅價格。另外新加坡亦係全球第一個採用電子收費站嘅國家，喺入去市中心嘅道路上架設自動電子收費系統，喺高峰時段入去市中心嘅車輛就要自動付費。由於購買私家車嘅成本太高，再加上完善、方便嘅公共交通網絡，令到大多數新加坡人選擇唔買汽車，呢個現象有效咁解決咗其他都市普遍存在嘅交通堵塞問題。
[編輯] 教育
新加坡嘅教育制度同英國嘅制度好似，除咗語文科之外，其他科目都係用英文教嘅。一般讀完十到十一年嘅中小學之後，可以揀到初級學院、高中或者理工學院讀書，讀糿級學院或者高中嘅學生，半數以上能夠升上國內大學。新加坡有五所理工學院同埋三所大專學府，其中新加坡國立大學同南洋理工大學都係亞洲頗具名氣嘅學府。
每年新加坡都吸納唔少嚟自中國大陸同馬來西亞等地方嘅留學生升學，令新加坡成為亞洲嘅區域教育樞紐。
新加坡教育制度成日俾人批評過分依賴教材，扼殺咗有彈性嘅獨立思想空間。本土戲"小孩不笨"就針對哩個教育弊病拍成嘅。
[編輯] 其他主題
- 新加坡軍事
- 新加坡通訊
- 新加坡外交
- 新加坡國際貿易
- 新加坡榮譽制度
- 新加坡旅遊景點列表
- 新加坡嘅離岸島嶼
- 新加坡嘅貨幣制度
