Magic: Die Zusammenkunft
Us der alemannische Wikipedia, der freie Dialäkt-Enzyklopedy
Magic D Zämäkumft (englisch Magic:The Gathering) isch es Sammelchartespiel wo 1993 erschiene isch. Erfunde hets de Richard Garfield und usege worde isch es vo de Firma Wizards, wo de Hasbro ghört.
Inhaltsverzeichnis |
[ändere] Sammelchartespiel
Bi Sammelchartespiel gats im Allgemeine drum, das es vili verschideni Charte git, wo me cha sammle, aber vor allem au demit spile. Jedes Jahr gits neui Editione, das heisst es werded neui Chartä erfunde und uf de Märt bracht. Im Fall vo Magic D Zämäkumft chauft mer chlini Päckli (die heissed Booster), wos 15 verschideni, zuefälligi Charte drin hät. Wenn mer denn emal gnueg Charte kauft hät, bastlet mer sich us dene es sogenannts Deck. Mit dem Deck spilt mer denn gege än andere Spieler. Im Fall vo Magic hät es Deck mindestens 60 Charte. Mer dörf dodebi Charte vo veschidene Editione mischä, aber vo jedere Chartä dörfed höchstens vier Exemplar im Deck si (Usser bi Standardländer, det dörfed beliebig vil im Deck si).
[ändere] Churzi Regelerchlärig
Bi Magic hät jede Spieler am Afang 20 Läbäspünkt. S Ziel vom Spiel isch es, d Läbäspünkt vom Gegner uf 0 z bringe. Dadezu cha mer zum Bispiel Kreature usspile und mit dene de Gegner agrifä. Es git aber au vili anderi Möglichkeitä. Die Goldig Regle vo Magic beseit, dass wenn e Chartä dä Regle widerspricht, dass denn d Chartä vorrang hät. Das macht s Spiel natürli interessanter, aber au komplizierter.
[ändere] Di verschidene Chartätype
Land I jedem vo dine Züg dörfsch du es Land usspile. Du bruchsch Länder zum anderi Sachä usspile chöne. Länder mached nämlich Mana. Das isch sozägä s Geld vo Magic, wo du bruchsch, zum die andere Arte vo Chartetype z zale. Es git 5 Standardlandtype: Ebeni, Inslä, Sumpf, Gebirge und Wald. Die mached verschideni Sorte Mana, nämlich wisses, blaus, schwarzes, rots bzw. grüens. Länder sind farblos. Aber die andere Chartätype händ jewils ä Farb, abhängig devo, was si für Manachöstä händ.
Kreatur Mit Kreature chasch du din Gegner agrife. Si füeged ihm denn Schade zue und so verlürt er sini Läbäspünkt. Du chasch Kreature aber au bruchä, zum di agrifende Kreature vo dim Gegner z blocke.
Verzauberig Verzauberige verändered meistens d Regle vom Spiel.
Artefakt Artefakt sind spezielli Chartä. Si händ nämli kei Farb. Es git au Artefaktkreaturä. Die sind denn beides: Artefakt und Kreatur.
Hexereie Hexereie chasch du nume eimal bruchä. Du spilsch si us, si mached öpis, und denn gönds uf din Friedhof. Im Gegesatz dezue chömed Länder, Kreature, Verzauberige und Artefakt is Spiel und du chasch si bruche, bis si s Spiel verlönd.
Spontanzauber Spontanzauber funktioniered wie Hexereie. Aber du chasch si au im Zug vo dim Gegner schpilä.
