Karaburun Tragödie
Us der alemannische Wikipedia, der freie Dialäkt-Enzyklopedy
D'Karaburun Tragödie isch e Boot-Unfall z'Albanie im Januar 2004 gsi, wo zunere politische Krise gführt het.
Am 9te Januar 2004 isch e Schnällbot wo zum Mänscheschmuggle bnutzt worre ,7 km vo dr Halbinsel Karaburun entfernt kentert. D'nüünezwanzig Isasse hen noo versuecht mit ihri Handys d'Polizei un s'Fernsehe z'informiire. Am näggschte Morge hen 8 Lüüt grettet werre chönne; 21 sin ertruncke. D'Opfer sin vorallem us dr nordalbanischi Städt Shkodra un em Hochlandbezirk Malesi ë Madhe cho. Spöter isch entdeggt worre dass d'zwei Schlepper Verwandte vo Polizeibeamte z'Shkodra un Vlorës gsi sin.
D'Tragödie isch schnäll zumene politischi Skandal worre, zum eine wäge denne zwee Beamte, zum andre wyl dr albanischi Premierminischter Fatos Nano, wo grad im Urlaub gsi isch, erscht drüü Daag spöter zruggcho isch. Dr Fatos Nano het zwei Joor vorher d'Mänscheschmuggel eigetlich für beendet erklehrt un jetzt isch ihm vorgworfe worre nüt gnueg z'unterno z'ha. D'Opposition het im Parlament e Mistrauensvotum aazettelt; het sich aber gäge d'Mehrheit vo dr Regiirig nüt chönne durchsetze.
I ganz Albanie isch gäge de Fatos Nano demonschtrirt worre. Mehreri Organisatione, wie zum Byschpil Mjaft! hen Aktione durchgführt. Mjaft! het vorem Büro vum Fatos Nano e öffentlichi Trauer abghalte. Vorem Büro isch e Schild ufgstellt worre mit dr Ufschrift Kujdes! Lart nuk punohet (Ufpasse, doo obe wird nüt gschafft; e Allusion zu Schilder wo uf Baustelle stönn: Kujdes! Lart punohet, Ufpasse doo obe wird gschafft). Usserdäm isch überall i dr Stadt dr Slogan Nano ik (Nano verschwind) ufgsprüht worre.
D'EU isch allerdings au i d'Kritik groote, vorallem wege de scharfe Visa Vorschrifte wo's de meischte Albaner praktisch unmöglich macht z'Land z'verloo. Dr Fatos Nano isch bis 2005 im Amt blybe.
