Partei der Arbeit

Us der alemannische Wikipedia, der freie Dialäkt-Enzyklopedy

Partei der Arbeit – churz PdA – isch e Partei, in dere sich Mänsche zämefinded, wo im Kapitalismus ä mänschenunwürdigi Gsellschaftsform gsehnd und in drum ablehned. Nu im Sozialismus – im Friede und in äre solidarische Gmeinschaft – händ i den Auge vo de PdA d'Mänsche längerfrischtig ä Chance, äs humans Läbe füere z'chönne. Äs Gsellschaftssystem, wo für und nöd gäge d'Mänschen isch, fallt aber nöd vom Himmel. Drum engagiert sich d'PdA nöd nu parlamentarisch, sondern au usserparlamentarisch bi Demos, Widerstandsaktione und i de soziale Bewegige.

D`PdA isch 1944 gründet worde, nochdem dass die Kommunistische Partei der Schweiz (KPS) 1940 vo de Behörde verbote worden isch (u.a. um Nazitütschland gfällig z'si). Noch Johre im Undergrund händ denn d'Schwizer Kommunischte noch Wäg gsuecht, wieder legal chönne z'schaffe und händ sich 1944 mit Sozialdemokrate, wo mit de Politik vo de SP nüme zfriede gsi sind, i dä PdA zämegschlosse. Die neu Partei hät denn i de erschte Nochchriegsziit sensationelli Erfolg gha. Mit em Ufcho vom chalte Chrieg hät sie aber starch under dä antikommunischte Stimmig und dä Usgränzig, won er erzügt hät, glitte. Vor allem i de Tütschschwiz hät d'PdA denn starch a Bode verlore. I de Wälschschwiz isch si resistänter gsi. Dört spillt sie, vor allem i de Kantön Genf, Waadt, Neueburg und Jura, aber au im Tessin, kommunal und kantonal immer no ä wichtigi Rolle. Au ihri Nationalröt chömed vo dört. I jüngster Zit isch es de PdA aber glunge, au i de Tütschschwiz Sektione wieder neu z'gründe. D`PdA isch Mitglied vo de Europäische Linkspartei.