Saure Kutteln
Us der alemannische Wikipedia, der freie Dialäkt-Enzyklopedy
 |
Dialäkt: Schwäbisch |
Saure Kuttla senn a sowohl em schwäbischa als au em badischa Teil von Baden-Württemberg beliebts Gricht.
Dr Begriff Kuttla hot sein Ursprong em lateinischa calduna (Eingeweide), woraus em Deitscha die Kaldaunen worda senn. Die Schwaba henn no eifach ihre Kuttla draus gmacht. Des Gricht isch au en andere Landstrich onder andre Bezeichnonga (z.B. Flecksuppe en Eschtreich) bekannt. S war frihr a typischs Arme-Leute-Essen. Kuttla mog zwar no net jeder Schwob, für manche ischs allerdengs a ausgschprochene Leibspeis.
Kuttla werdet aus m greinichta on gebrühta Vormaga von de Render gmachd. S Fleisch wird en Schtreifa gschnitta on en ra Mehlschwitze ogfähr a Stond lang weichkocht. Als Gwürz werdet a Lorbeerblatt, Wacholderbeera sowie a bissle Pfeffer dazuageba. Dr saure Gschmack wird durch die Zugab von Essich odr Wei erreicht.
Am beschta schmecket Kuttla zu Bratkartoffla, aber mr ko au a Brot drzua essa.
