Schwäbische Küche
Us der alemannische Wikipedia, der freie Dialäkt-Enzyklopedy
 |
Dialäkt: Schwäbisch |
D´Schwäbische Küch ischt e Regionale Küch wo em Südoschta vo Bade-Württeberg beheimatet isch.
Inhaltsverzeichnis |
[ändere] Doiggwara
[ändere] Spätzle/Knepfle
Spätzle senn voma Brett gschabte Nudla. Dr Doig isch im Regelfall halb Eier halb feins Woizamehl, und recht sterrig. Den Doig vermengt mer na vo Hand oder mit rer Maschee. Wenn ner na gar zu Sterrig wurd ka mer en na au mit a bisle Wasser verdenna. En jeden Fall muas er vor em Schaba gschlaga werra bis er kloine blosa schleht ond na ah weile standa glassa werda. Die Zeit brauchts, das der Kleber vom Woiza benda ka. Drnoch wird dr Doig, fürd Spätzle aufma Brett verdoildt ond mit em Schaber ens siedende Salzwasser gschabt, bei de Knepfle kommt der Doig in an Trichter mit rer Lochreibe dronter, der na hin und her über rem Salzwasser bewegt wird ond dia Knepfle ins Wasser falled.
[ändere] Leberspätzle/Knepfle
Leberspätzle/Knepfle gont genau glei wia dia normale nur duat mer in de Doig no guat ghackte Leber ond Kreiter.
[ändere] Flädle
Flädle send nix anderes wia en oifacher, denner, Pfannekuacha, je noch Rezept mit Kreiter, der nachem Brata in feine Stroifa gschnitta wird. Dia Stroifa kommed na oifach in a Supp als Eilag.
[ändere] Maultascha
Maultascha send gfüllte Doigdascha vergleichbar mit de Ravioli oder Tortellini. D´Gresse variiert allerdengs je noch em Eisatzzweck oder em Gschmack. D´kloine kommet em Regelfall end Supp als Eilag, dia grosse send a oigastendigs Gricht. Es geit au Onderschied wia se gmacht wend: die oine send grollt de andere send nurmehr zammaklappt - Gschmacksach. Gfüllt wend se normal mit rer Fülle aus Hackfloisch, Speck, Zwibla, Spinat, Kreiter, Weckmehl ond Oier, es geit jedoch au an haufa andere Rezept. Dia Kochte Maultascha wend na moischtens gschmälzt (mit Speckzwibla), als Omelette oder ea dr Briah gessa. Es geit aber au do no an haufa andere weag se zom essa.
[ändere] Kartoffelgricht
[ändere] Schupfnudla/Buabaspitzle
Aus ogfähr halbe Woizamehl ond d´andre hälfte durchdruckte, am Vordag kochte, Kartoffla ond Eier macht mer en feschte Doig. Vo dem Doig rollt mer je nochdeam Kloifinger bis Dommagrosse Würschtle, dia na em siadendenda Salzwasser kocht werradt. Drnoch schreckt mer de Schupfnudla ab ond lässt se abtrockna. Vor em Essa duat mer se no in Butter Schwenka.
[ändere] Kartoffelsalat
Kochte, feschtkochende, Erdepfel werded warm gschält ond au no warm grädelt. Drnoch kommet feighackte Zwiebla, bisle Senf ond en schuss Floisbrüah driberd. Na vermengt mer des ganze vorsichtig ond lässts a weile stau. Ghessa wird der Kartoffelsalat lauwarm, es geit au wele wos in der Briah wellet.
[ändere] Ällsmegliche
[ändere] Ofaschlupfer
Alde Brotscheiba werdet en Milch oigwoicht ond danoch en a Feuerfeschte Form gschichtet. A bisle von der Oiwoichmilch wird na so en Zenti hoch en dia Form neigfüllt. Des ganze kommt na für a halbe Stund in Ofa. Bevor mers isst Streut mer no kräftig Zucker ond Zimt drüberd.
