Sky du Mont
Us der alemannische Wikipedia, der freie Dialäkt-Enzyklopedy
Sky du Mont (* 20. Mai 1947 in Buenos Aires) isch ä argentinischr Schauspieler. Siner richtig Nôme isch Caetano Bremme Neven Dumont. Er isch mitm Verleger Alfred Neven DuMont vowôndt.
In nem Interview mit de Welt het 2001 gschildert, wie 'ra zuem Nôme kumme isch: „Min dütsch-russischr Vatr un mine änglisch Muetter sin im Krieg vor de Nazis noch Argentinie glfohe. Ich hab ä schponische Nôme bkumme miesse – des war untrm Perón Gsetz. Eigentlich heiss i Caetano Bremme Neven Dumont. D Abkyrzung vun Caetano isch Cae. Wue mine Muetter mich als Bündl noch Hous troge het, het miener Brueder gfrogt: ‚Who’s that?‘ – ‚It’s Cae.‘ Der het abr nuer ‚Sky‘ vostonde. Des isch gsi.“
Er het siene Schulzyt in Änglond un de Schwiiz vobrocht. Sine ärschte Rolle om Theater un biem Fernseh het er 1970 gliech noch sinre Schauspielusbildung gkiregt. Nebe viele Gastuftritt in dütsche Fernsehserie wiä zuem Beispiel Derrick het de Sky Dumont ä durchgehendi Houptroll (Guido von Trenz) in de 52-teylig WDR-Fernsehserie Losberg vun Michael Arnal un Xao Seffcheque gschpielt. Sitdem macht er au international Karriere; so het er bispielswies in Stanley Kubrick Eyes Wide Shut gschpielt, unter ôndrem het er in 59 Folge vun de US-Soap General Hospital mitgschpielt. Sin dütsches Spielfilmdebut het er im Kinoerfolg Das Boot vum Wolfgang Peterson ghet. Mit sine Rolle in Otto – Der Film (als Ernesto), De Schueh vum Manitu (als Santa Maria) un (T)Raumschiff Surprise – Periode 1 (William de Lätzcht/Santa Maria) war 'r bie bsunders erfolgriche dütsche Comedyfilme votrete. Usserdem isch er de Erzähler vun de Kinderserie Thomas die kleine Lokomotive.
Knapp zwey Jôht het er s VIP-Journal Sky Lights modariert. Sin schriftstellerischs Talent het de Sky du Mont entdeckt, wue 'ra ôgfonge het, fyr sin klei Tochter Gschichte zue schriebe. Prinz & Paparazzi isch sin ärschter Roman, wue 2004 mit ihm in de Houptroll un untr Ôndrem Antoine Monot Jr. fyrs ZDF vofilmt worre isch. Sin zweyter Roman heisst Fürsten & Fälscher (2005).
Bies 2000 war er mit de Schauspielerin Cosima von Borsody voheiratet. Im Septembar 2000 het er s Model un Ex-Playmate Mirja Becker gheiratet, mit der 'ra ä Tochter nômens Tara un a Sohn Fayn het; Sky Du Mont lebt mit sinre Familie in Hamburg.
[ändere] Ekschterni Syte
- Offiziell Webpräsenz
- Sky du Mont in de Internet Movie Database
- Bibliographie aller Titel
- Literatuur vo und über Sky du Mont im Kataloog vor DDB
- Filmportal.de-Itrag zue Sky Dumont
| Persoonedaate | |
|---|---|
| NAME: | Du Mont, Sky |
| ALTERNATIVNAMEN: | Sky Dumont, Cayetano du Mont |
| KURZBESCHREIBUNG: | Argentinischr Schauspieler |
| GEBURTSDATUM: | 20. Mai 1947 |
| GEBURTSORT: | Buenos Aires, Argentinie |
| STERBEDATUM: | |
| STERBEORT: | |
