San Chorche
De Biquipedia
San Chorche u Chorche de Capadozia ye o patrón d'Aragón. A penar de que a esistencia de san Chorche no s'ha puesto contrimostrar, a tradizión dize que estió un soldado román de Capadozia (en l'autual Turquía), mártir y dimpués santo cristián. Aberba bibito en o 275/280 - 23 d'abril de 303).
A suya festibidá ye zelebrata o 23 d'abril.
A suya popularidá en a Edá Meya li ha lebato a estar un d'os santos más beneratos en as diferens creyenzias cristianas y encluso —en un fenomén de sincretismo— en o mundo musulmán.
[Editar] San Chorche y Aragón
En 1096, en Alcoraz, amán de Uesca, as tropas d'o rei Sancho Remíriz d'Aragón yeran sitiando a ziudá. Os musulmans que yeran en Uesca rezibieron aduya de más tropas que i plegoron dende Zaragoza y consiguioron matar á lo rei, pero perdioron a baralla d'Alcoraz, seguntes a falordia, grazias á l'aparixión de San Chorche. Más tardi o rei Pietro I d'Aragón conquistó Uesca imbocando l'aduya d'o santo.
Sobre tot dende o sieglo XIII surten numerosas falordias y aparixions en o reino. Asinas Chaime I lo Conqueridor cuenta que en a conquista de Balenzia aparexió o santo: «S'aparexió san Chorche con muitos caballers d'o paradiso, que aduyoron á benzer en a baralla, en a que no morió dengún cristián». Más tardi, o rei Chaime cuenta d'a conquista de Mallorca que «seguntes li contoron os Sarradíns, istos beyoron dentrar primero á caballo á un caballero blanco con armas blancas», que er identifica con san Chorche.
O patrozinio de san Chorche sobre os reis d'Aragón y sobre toda a Corona d'Aragón se reconoxe ofizialmén en o sieglo XV con la creyazión d'una festibidá.
