Sarrio
De Biquipedia
| Sarrio | ||||||||||||||||
|---|---|---|---|---|---|---|---|---|---|---|---|---|---|---|---|---|
 Sarrio á Bigorra |
||||||||||||||||
| Clasificazión zentifica | ||||||||||||||||
|
||||||||||||||||
| Nombre binomial | ||||||||||||||||
| Rupicapra pyrenaica (C.L.Bonaparte, 1845) |
 Esta fuella ye escrita en bergotés. |
O sarrio, chizardo u ixarzo/ixarso (Rupicapra rupicapra) ya un bobido de ra subfamilia Caprinae (a de ras crapas e ras guallas), que se troba á ros mondes Pirinés -por ixemplo en Ordesa e Monde Perdito- e á bels sarratos más d'Europa, como ros de ra Cornisa Cantabrica, os Alpes, os Carpatos u ro Caucaso. Bels autors clasifican os ixemplars pirinencos e cantabricos como una espezie aparti, Rupicapra pyrenaica, anque isto no ya adoptato por tota ra comunidá zientifica internazional.
Contenius |
[Editar] Nombre
O sarrio ya ro nombre más cheneral con que se conox en aragonés á iste animal, referindo-se sobre tot á la bariedá pirinenca. Tamián reziben o nombre de chizard(o), sisardo u ixarzo (ixarso en benasqués). Anque l'orichen de ro nombre no ya pas claro, parex que probián d'una radiz prerromana pirinenca -izarr, probablemén bascona. En catalán ya isard. O franzés isard u izard ya preso de ro gascón.
[Editar] Descripzión
A largaria de ro cuarpo en os ixemplars adultos ya d'entre 110 e 130 cm, más uns 3 cm de coda. L'altaria puede plegar dica 80 cm, e ro peso baría entre 20 e 30 kilos. O sarrio aragonés ya un poquet más chico que ro parién alpín. Es masclos son más grans que ras fembras, de colors más escuras e marcatas, e con uns cuarnos más largos que nunca no pierden. Son fins e capables de puyar por peñas e chelo sin guaires problemas.
A color de ro pelache muda seguntes a estazión. De berano ya royisco, con o morro, cuallo, pancha e glutios de color blanguiñosa, e una faxa de pelache negro dende ra boca dica ros guallos e por dezaga ra coda. D'ibierno, por contra, o pelo ya muito más preto e fusco. O lomo, as garras e ro cuallo por dezaga se tornan de color parda escura u griseta. O negro de ra cara e ra coda se fa más gran; una faxa negra bien marcata aparex por debán dende ra parti posterior de ras orellas ta ro rangadero de ro cuallo, e tamián en a parti alda de ras garras e en os costatos de ro cuarpo. A cara, o cuallo por debán, os piez, pancha e glutios son blangos.
Os sarrios son animals sozials que ban en grupez mirando tascas pa paxendar, pus son erbiboros. Os grupez son formatos nomás que por masclos (que tamián puede que campen solencos) u por fembras con as crías suyas, os cualos s'achundan que en os tiampos en os que son amarexederas.
Os suyos costumbres son diurnos. Bista, olfato e udito son más que buanos, o que premite-lis d'identificar rapedamén os suyos depredadors, sigan onsos, lupos u ombres. Un altro periclo ta ros sarrios son os lurtes, que pueden matar-ne rabaños enters en as mayengatas.
L'asperanza de bida de ros sarrios ya d'uns 20 años.
[Editar] Reproduzión
Os sarrios de ra peninsula Iberica son amarexeders entre otubre e nobiambre, mientres que ros d'Europa zentral en son en nobiambre e ras primeras semanas d'abiando. En ixe tiampo, es grupos de masclos siguen os de fembras e se i achundan, biyendo-sen alabez poderosas luitas entre masclos, que s'acapizan la un contra l'altro ta tener o dreito de reproduzir-se.
A chestazión dura unas 20 semanas, que remata en naxer una sola cría. O sarriet plega ta ra matureza secsual entre ros 2 e 4 años, fendo-lo andes as fembras que ros masclos.
Se son zitatos casos d'ibridos entre sarrios e crapas, siempre machorras, anque nunca no s'ha puesto prebar-ne ra esistenzia de trazas fefaziens.
[Editar] Enlazes esternos
O sarrio á ra peninsula Iberica (En anglés)
