Steiamårk
Aus Wikipedia
 |
Der Artikl is im Dialekt „Mitlschtaerisch“ gschriem worn. | |
As Lound Schtaeamoak (slowejnisch Štajerska) is ãã Taal von da Republik Östaraech und as zwaetgrejste Bundeslound, wåmma nåch da Flächn gehd. Ãõgrejnzend san Ouwaöstaraech, Niidaöstaraech, Solzbuag, Buaŋlound und Keantn, und im Südn is Slowejnien. Dii Loundeshaoptschtot von da Staeamoak is Graz, dii zwaetgrejste Schtot in Östaraech. Historisch is die Schtaeamoak Taal von da Regjoun Schtaeamoak in dii zwa EU-Lejnda Östaraech und Slowejnien.
Zua Schtaeamoak sog ma aa "Griana Moak" oda as "Griane Heaz von Östaraech", wal ungefähr 61 Prozejnt von iira Flächŋ Wold is und ãã Fiatl Wiisn, Woadn, Oubst- und Wãẽgoatn is. Dii Mua is da grejste Flus.
Dii kulinarischn Bsondahaetn von da Schtaeamoak, wia in Schülcha und as schtaerische Keanöyl, leant ma am bejstn in am Buschnschounk mit Jaosn und Moust kejnan. Waetare bekounte schtaerische Schpezjalitejtn san da Schtaerische Junka, dii südschtaerischn Waeswaen und as Gössa Biia.
As Ejnstool mit saene schroufm Fölsn, vom Dochstãã bis zan Nationalpaak Gsaese, hot dii Schtaeamoak aa als olpines Bundeslound bekount gmoscht. Dii Ouwaschtaeamoak und dii oustschtaerische Teamenregjoun san dii wichtigstn Tuarismusgebiite.
[dro wärkln] Regionále Gliedarung
Die Schtaeamoak hot meerare Regjounen. Noch da Flächŋ am grestn is dii Ouwaschtaeamoak, dej von dii nöadliŋ Loundesgrejnzn bis zan Schtaerischn Roundgebiage im Südn von da Mua-Müaz-Fuachŋ raecht.
Dii Westschtaeamoak is im Süden dafãõ und im Westn von da Mua. Die Oustschtaeamoak is im Oustn fon da Mua und im Südn vom Weksl und dii Fischbocha Olpm. Zwischn Oust- und Westschtaeamoak is dii Loundeshaoptschtot Graz.
Duach dii Aentaaluŋ von da Schtaeamoak isas sou, das a grousa Taal von da Ouwaschtaeamoak waeta im Westn als dii Westschtaeamoak is. Des is sou, wal die historische Regjoun Schtaeamoak in ãã Ouwa-, Mitl- und Untaschtaeamoak ãẽtaalt is. Wal hiaz dii Untaschtaeamoak awa in Slowenien is, wal ma duat Slowenisch rejt, hot ma die Mitlschtaeamoak in ãã West-, Oust- und Südschtaeamoak ãẽtaalt.
