Binisaya
Gikan sa Wikipedia, ang gawasnong ensayklopedya
Ang pulong Binisaya, sa pagkagamit sa mga Bisaya, nagpasabot sa bisan unsang mga butang nga lumad sa mga Bisaya, lakip na ang ilang pinulongan.
[usba] Mga pinulongang Binisaya
Ang mga pinulongang Binisaya sa Pilipinas, lakip na ang Tinagalog ug Bikolano, kabahin sa pamilya sa mga pinulongan sa tunga-tungang Pilipinas. Mayoriya sa mga Binisayang pinulongan gitabi sa Kabisay-an apan may pipila nga gitabi sa rehiyon sa Bikol (pananglitan sa Sorsogon ug Masbate), sa mga pulo habagatan sa Luzon (pananglitan sa mga pulo sa Romblon), sa amihanan ug kasadpang bahin sa Mindanao, ug sa lalawigan sa Sulu, habagatang-kasadpan sa Mindanao.
May dili momenus 30 ka mga pinulongan nga nagtibuok sa mga pinulongang Binisaya. Ang Binisaya nga may labing daghang gumagamit mao ang Sinugboanon, nga gitabi sa kapin 20 milyones ka mga tawo isip lumad nga pinulongan sa Tunga-tungang Kabisay-an, ug sa amihanan ug sidlakang bahin sa pulo sa Mindanao. Laing nailhang pinulongang Binisaya mao ang Hiligaynon, nga gitabi sa pito ka milyon ka mga tawo sa Kasadpang Kabisay-an, ug ang Winaray, nga gitabi sa tulo ka milyon sa Sidlakang Kabisay-an.
