Vociaru d'una talavesa
From Wikipedia
U vociaru d'una talavesa (o voceru d'una talavese) hè un vociaru di Corsica. Issu vociaru hè mintuvatu in i Canti populari di Corsica di Niculò Tommaseo è in i Canti populari corsi di Salvatore Viale. Una donna di a pievi di Talavu piegni u sa maritu, chì era vaccaghju (ma era dinò picuraghju, postu chì si faci ancu minzioni di i pecuri) ed hè statu tombu in piaghja da una di i so bestii.
[edit] U vociaru
- Fù la piaghja la so morti
- Duva stani li currachji
- Oh crudeli, oh iniqua sorti
- Par Francescu di li vacchi !
- La corcia comu faraghju
- À stà sola in quisti machji ?
- Isfurcà vogliu lu palu
- Quiddu di setti furcona
- Ch'ùn ci s'appendi più zaniu
- Nè cappucciu nè pilona ;
- È taglià vogliu la coda
- À Cimoscu ed à Falconi.
- Dì dì dih ! par mè sò lutti
- Fati un gridu univirsali
- Frateddi è sureddi tutti;
- Ùn hè statu pocu mali.
- Mortu hè u capu di a famiglia
- Oh la me sorti fatali !
U defuntu sipidditu, a veduva volta à a so capanna è discrivi l'intarramentu à a famiglia ed à i vicini:
- Quandu lu posini in bara
- È u cuddoni à li Prunelli
- Piensini par doglia amara
- Li pecuri cù l'agneddi;
- È l'eghji di lu sarconu
- Bè bè bè faciani anch'eddi.
- Ripustò in Santa Maria
- In a ghjesgia paruchjali
- Lu piuvanu, anima mia !
- Comu capi principali
- Cantaia cù l'altri preta
- Li cosi di lu missali.
- Finiti li finzioni
- Tutti pronti ad ubidì ni
- Una folla di parsoni
- Incumincioni à scrupì ni
- Alzendu sopra una teghja
- Par vulè lu sipiddì ni.
- La corcia, da mè pinsaia
- Chì ni farani avà d'eddu ?
- Drentu à l'arca mi pinsaia
- Ci fussi calchì purteddu
- Ma vidì ch'è lu lamponi
- Ind'u tafunacciu nieddu.
