Plêf di Guart
De Vichipedie, la enciclopedie libare dute in marilenghe.
La Plêf di Sante Marie di Guart e je logade su un piçul cuel tra lis frazions di Cele (loc. Cela) e Negrons, tal comun di Davâr, in Cjargne. Di lì in sù la val dal flum Dean e cjape il non di Cjanâl di Guart. Il lûc al corispuint a chel dulà che si cjatave un fortilizi (clamât daspò cjiscjel di Negrons) che al è lât distrut tal 1300; si pense che il tor dal fortilizi a sedi l'atuâl cjampanili de glesie, cussì di spiegâ l'orientament insolit che lui al à rispiet al cuarp de plêf.
[cambie] La storie
La esistence de plêf e je citade za in documents de fin dal XI secul e inizi XII secul, come leade ae Abazie di Mueç, ma i storics pensin a une origjin une vore plui antighe. Da lis 11 plêfs inmaneadis in Cjargne sot dal Patriarcjât di Aquilee, cheste e je la plui grande, includint dute la Val Dean fin a Sapade, il Cjanâl Pedarç, il Cjanâl di Monai e oltri, fin a Çurçuvint, rapresentant un notevul lûc di incuintri (ca si celebravin ducj i batisims prime de creazion de parochiis, in gjenar inte sere prin de Assunte, ai 14 di Avost, e la plêf e je ancje citade difat come prin lûc di cult de Madone in Cjargne) sei religjôs che economic e sociâl. L'edifici che si viôt cumò al fo costruît tal 1431, par sostituî chel precedent, sdrumât dal fûc; impuartantis modifichis a vegnin fatis ae fin dal XVII secul. Il devastant taramot dai 28 di Lui dal 1700 al provoche un grum di dams, e inte ristruturazion la plêf e cjape l'aspiet atuâl. Altris ristruturazions a son stadis fatis daspò dal taramot dal 1976, che àn puartât fûr ancje elements des glesiis precedentis.
[cambie] L'edifici
La plêf e à une struture retangolâr cun trê navadis, e cuntun grum di barcons par fâ lûs tal interni. Dentri, sîs pilastris cuadrâts in tof a separin la navade centrâl di chês laterâls. A çampe e in somp al altâr maiôr dal Sietcent a si viodin rescj di sorprendents afrescs dal inizi dal '200, vignûts fûr inte ristruturazion dopo dal taramot dal 1976. A diestre dal altâr si cjate il coro in len intaiât e intarsiât (fin '600).
Dilunc la navade di diestre a son visibii une vascje in piere rose, doprade come font batisimâl (forsit par imersion) o come dipuesit di aghe benedete, un forzîr dal '400, l'altâr de Madone dal Rosari cuntune statue ('800).
Dilunc la navade di çampe a son il Batisteri di marmul e len (1556), i puescj in len pal coro, l'altâr dai sants Elene e Michêl e il pulpit dal Sietcent, restaurât di pôc timp.
Parsore dal ingrès, suntun sopalc, si cjate un preziôs orghin, costruît di Zuan Batiste De Corte di Davaste (1788); par finî, ai lâts dal ingrès a son une cubie di confessionâi di fin Sîscent e dôs aghesantieris.
Di segnalâ a çampe dal Presbiteri, intune salute, il piçul ma ric museu, cun preseabii tocs religjôs e ancje reperts plui vielis.
