Davâr
De Vichipedie, la enciclopedie libare dute in marilenghe.
| Davâr | |
 |
|
| Non ufiziâl par talian | Ovaro |
| Provincie | Udin |
| Part | Cjargne |
| Altitudin | 525 m s.n.m |
| Superficie | 57 km² |
| Popolazion | 2.218 ab. |
| Densitât | 39 ab/km² |
| Frazions | Negrons, Cele, Cjaline, Clavaiis, Cludini, Dentramp, Lenzon, Liariis, Luvincis, Luvint, Mion, Muine, Davaste |
| Comuns confinants | Dimpeç, Comelians, Lauc, Prât, Ravasclêt, Raviei, Sauris, Soclêf, Sudri |
| CAP | 33025 |
| Prefìs telefonic | 0433 |
| Patron | |
| Sît istituzionâl | |
| Cjale il Progjet comuns | |
Davâr al è un comun in Cjargne, che in dì di vuê al fâs part de provincie di Udin e al à 2.218 abitants.
Indis |
[cambie] Gjeografie
Il comun si cjate tal Cjanâl di Guart, in Cjargne. Al è logât intun cjadin tra il Col Zentîl (2.075 m) a bonât e il Narvenis (1.968 m)a jevât, cun la masse dal Colians che domine la valade. In plui che il cjaflûc, a fasin part dal comun ancje lis frazions di:
- Negrons m 523
- Cele m 494
- Cjaline m 532
- Clavaiis m 826
- Cludini m 720
- Dentramp m 541
- Lenzon m 614
- Liariis m 695
- Luvincis m 518
- Luvint m 621
- Mion m 710
- Muine m 526
- Davaste m 745
[cambie] Storie
Al somearès che il non Davâr al vegni di une peraule celtiche che ûl dî "lûc protet". Di fat il paîs al è logât in chê che e je simpri stade une impuartante zone di passaç fin de preistorie. Cuant che i romans a baterin i Gjai Cjargnei che a vivevin culì, il teritori di Davâr, come chel di dute la Cjargne, al jentrà a fâ part de X REGIO VENETIAE ET HISTRIAE. Te etât di mieç al fasè part dal Partiarcât di Aquilee fin al 1420, cuant che i venezians lu concuistarin. Cussì Davâr al restà sot Vignesie fin al 1797 cuant che, cul Tratât di Cjampfuarmit, al fo cedût al Imperi Austro-Ongjarês. Davâr al fo concuistât de Italie tal 1866, dopo da la tiarce vuere di indipendence. Te storie di Davâr si regjstraran però ancjemò dôs ocupazions: la prime tal 1917, cuant che dopo la rote di Cjaurêt dut il Friûl al fo invadût di bande dai austro-todescs. La seconde e fo tal 1944 cuant che i cosacs, clamâts culì di Hitler, a ocuparin la Cjargne; propite i cosacs, sul pont di ritirâsi, ai 2 di mai dal 1945 a Davâr coparin 22 omps, parcè che a jerin stâts tacâts dai partigjans
[cambie] Lenghe
A Davâr al ven fevelât il furlan te variant dal bas Cjanâl di Guart, caraterizzât de terminazion des peraulis femininis in -a (singolâr) e -as (plurâl). Un altri trat carateristic de zone di Davâr al è la conservazion dai ditoncs ei e ou là che tal furlan centrâl a si an î e û.
In ogni frazion dal comun, però, si à cualchi variazion; a Muine par esempli no si cjatin i ditoncs ei e ou, a Liariis, Mion e Cele invezit il plurâl des peraulis femininis al è in -es.
[cambie] Di viodi
- La Plêf di Guart, logade insomp un cuel fra Cele e Negrons, citade pe prime volte tal 1119, ma siguramentri ancjemò plui viere. In dì di vuè però la glesie, par vie dai varis teremots, e à un aspiet sietcentesc.
- Il Palaç Micoli Toscano a Mion, tirât sù de famee dai Toscjans. La costruzion da l'edifici e terminà tal 1836, e in dì di vuê al è cognossût come Il palaç dai cent barcons.
- La Cjase Di Cort a Davaste, dal XVIII secul, carateristic esempli di architeture cjargnele.
- Il Mulin, in localitât Baûs, fra Davâr e Comelians. Si trate di un vieri mulin ancjemò funzionant, che al permet di viodi cemût che une volte si masenave la blave.
