La Haye
Van Wikipedia
Dit artikel is gesjreve in 't Valkebergs. 't Weurt gewaardeerd óm in dit artikel 't Valkebergs aan te hauwe of aan te gaeve welk anger dialek gebroek is.
La Haye of La Haie ies 'n buurtsjap van Julémont in de gemeinte Herve in de provincie Luuk in Belsj. 't Ies gelege op 210 maeter huègde in 't heuvelland bove 't dal van de Asse. 't Landsjap tuint ziech mèt weie, grave en haol waeg. De hoezer liegke aan de drökke N 672, tösje Julémont en Saint-André.
In 1469 ies sjpraoke van Haga, de Latiense naam.
Vreuger loog 't in 't hertogdóm Limburg op de grens mèt 't graafsjap Dalhem. 't Gehuchske ies óntsjtange vanoet d'n haof La Haye, ('n allodiaal good). Wiejer liek d'r 'n aantal ouw u-vörmige boerderieje, woavan de binneplaats aafgesjlote weurt mèt 'n moer mèt 'n groate róndbaog-ingangspoort. De boew besjteit oet natuursjtein en baksjtein mèt helsjteine vènster- en deurlieste. Twiè helsjteine waegkruzer sjtoon tösje de beboewing.
Tot in de jaore 80 van de 20e ièw houw 't gehuchske nog 'n eige plaatsnaambord bove 't gemeintebord Julémont. Allewiel ies de naam in 't openbaar allein nog te vinge op 'n bushalte, gesjreve es La Haie.
Veur kèrk en sjoal ies Lahaye aangeweze op Julémont.
