Sìculi
Di Wikipedia, l'enciclopedìa lìbbira.
Li Sìculi èranu nu pòpulu chi agghicàu in Sicilia dû cuntinenti probabbirmenti versu lu 1400 a.C.. La Sicilia era già abbitata dî Sicani e cchiù a uccidenti di l'Elimi, e perciò li Sìculi àppiru a truvari n'accordu cu li Sicani. La fruntera tra li Sìculi e li Sicani fu lu ciumi Salsu. L'organizzazzioni dî Siculi era privalintimenti tribbali. Cu l'arrivu dî greci nta lu sèculu VIII a.C. e la prugrissiva culunizzazzioni, li Sìculi àppiru a ritiràrisi versu l'internu, unni funnaru diversi cità. La lingua dî Sìculi era sicuramenti indu-europea, ma nenti cchiù si sapi. Prima di l'arrivu dî greci nun usàvanu na scrittura, e ricintimenti foru truvati petri cu scrizzioni sìculi chi ùsanu l'alfabbetu grecu. La prugrissiva ellenizzazzioni dî Sìculi, purtau picca a picca â perdita di l'identità culturali. Ntô sèculu V a.C, li Sìculi, cu Ducèzziu agghicaru a urganizzàrisi di manera unitaria, cuntrappunènnusi ê greci, suprattuttu chiddi di Sarausa e di Catania. Lu statu unitariu sìculu durau picca, e ntô 450 a.C. li sarausani batteru l'esèrcitu sìculu e mannaru a Ducèzziu in esiliu a Corintu. Cu la prugrissiva culunizzazioni greca, li Sìculi pèrsiru accussì picca a picca l'influenza chi avèvunu avutu nzinu a ssu mumentu.
