Storia dâ lingua siciliana
Di Wikipedia, l'enciclopedìa lìbbira.
 |
«Nun si pò truvari na lingua ca po diri tuttu senza aviri accattatu di l’àutri lingui.»
|
Comu l'italianu, la lingua siciliana è dirivata dû latinu. Tutti dui sunnu lingui cumpricati e variamenti articulati. La lingua taliana è unu di li tanti dialetti parrati nta la pinìsula, sunnu tutti dui liggìttimi pi nàscita e pi sviluppu, e chi funziònanu lu stissu nnâ manera di usàrili. Comu l’italianu, chiddu chi quarchi vota è chimatu dialettu sicilianu rifretti li tradizzioni e culturi nòbbili; pussèdinu un lèssicu e na granmmàtica, ma cci sunnu sempri certi diffirenzi. Giniralmenti lu dialettu è usatu nta na zona cchiù nica rispettu a la lingua, ca pari mmeci di èssiri canusciuta nta na aria cchiù granni.
[cancia] Na storia pi certi versi parallela a chidda di l'italianu
La spanzioni di na lingua parrata supra na certa aria geogràfica cchiù larga havi sti cunziguenzi: lu fattu ca sta lingua addivintata lu menzu di cumunicazzioni di la parti duminanti, pò èssiri scritta di li littirati, di l’òrgani di l’amministrazzioni di la pirifirìa e di lu putiri cintrali; la circustanza ca cerca di èssiri rigulata dànnusi na “liggi” stabbiluta di li grammàtici e èssiri nzignata nta li scoli; tutti sti cosi nun fannu àutru chi diffirinziari la lingua di lu dialettu. Lu tèrmini dialettu, di lu grecu dialectos (lingua) di lu verbu dialegomein (parrari) fa vidiri dui rialità diffirenti:
- Un sistema linguìsticu autònomu rispettu a la lingua nazziunali, pirciò un sistema ca havi caràttiri strutturali e na storia distanti di chiddi di la lingua nazziunali;
- Na variità parrata di la lingua nazziunali, vol diri na variità di lu stissu sistema e di caràttiri strutturali di la lingua nazziunali.
Lu dialettu addiventa menzu di ntirpritazzioni e di sprissioni identificànnusi cu la lingua di l'affettu e di lu sintimentu, ca nun si metti pi nenti contra â lingua taliana, ma nni fa, mmeci unu di l’aspetti chi cuntribbuisci a fari la lingua nazziunali. Lu dialettu è sprissioni di l’arma di lu pòpulu e comu tali havi a èssiri riscupertu, rivalutatu e valurizzatu, supratuttu ora ca stamu assistennu a na mudirnazzazzioni di la lingua, a causa di cui si stannu pirdennu assai sprissioni dialittali, veru tìpici e carattarìstichi chi na vota èranu sempri usati. Lu studiu di lu dialettu sicilianu nni porta a circari l’òriggini di la lingua e di l’influssi chi suppurtò nta lu tempu. Na ricerca stòrica brevi rivela la sò singularità e la sò natura di tanti culturi.
[cancia] La parrata siciliana attraversu li sèculi
Li pòpuli diffirenti ca nna l’ùrtimi 2500 anni hannu passatu di la Sicilia, lassaru un marcu ncancillàbbili nta la lingua e la cultura siciliana. La parrata siciliana nun havi a èssiri cunziddirata comu un dialettu, ma comu lingua a tìtulu chinu, pi dui raggiuni: nascìu cu lu pòpulu sicilianu, e arristò ntatta nta li sò carattirìstichi duranti li sèculi e havi la sò grammàtica e lu so vucabbulariu. La lingua siciliana, ca puru oggi si scrivi e si parra, in rialità è la lingua di l’aborìggini siciliani. Sti aborìggini sunnu li Sìculi ca vìnniru di lu Lazziu e li Sicani ca vìnniru di la pinìsula Ibèrica e di l’Africa, ca ncuntrànnusi ‘n Sicilia, mmiscaru li dui modi di vita e di lingua. Nun nn’âmu a scurdari l’Elimi, un pòpulu pacìficu di pastura di ncerta pruvinenza. Accuminzannu di l’VIII sèculu a.C., la Sicilia fu suttamisa di na fudda di migranti cu lingui diffirenti: greci, finici, cartagginisi, rumani, unni, vandali girmànici, goti di la Svezzia, àrabi, nurmanni, svevi, e poi l’angiuini, l’aragunisi, li spagnoli, li savoia, l’austriachi, li burbuna e li ngrisi. Avissi a èssiri fàcili capiri nta quali misura, cu tutti sti nflussi, la lingua siciliana avissi pututu sviluppàrisi arrivannu a èssiri chidda chi si parra e si scrivi oi. Lu latinu s’infilò assai supra li variazzioni di li parrati siciliani, anchi si lu grecu era cchiù diffusu di dui sèculi prima di la cunchista rumana. Cu li diffirenti accupazzioni l’usi e li custumi di li siciliani canciaru, ma la lingua nun canciò nta la sò nterità, anzi s’arricchìu pi l’assimilazzioni di na nfinità di vucàbbuli dirivati di tanti lingui europei, orientali e africani ca traseru nta l’idioma sicilianu. Di lingua simplicimenti parrata, lu sicilianu accuminzò a èssiri scrittu e a tràsiri nta l’atti nutarili e nta li ducumenti ufficiali versu l’annu 1090. Fidiricu II di Hohenstaufen, niputi di Varbarussa, vinni acclamatu re di Sicilia ancora picciutteddu. Siccomu fu struitu chiossai nta la Sicilia, stintivamenti pigghiò lu sicilianu comu lingua nazziunali. Anchi si iddu parrava na lingua francu-nurmanna (e puru lu tudiscu di sò patri), vosi ca la littiratura scritta e la lingua puètica fùssiru rapprisintati ‘n sicilianu, picchì ancora nun asistìanu òpiri littirari e trattati di scenza scritti supra carta. Nta ddu piriudu li siciliani fìciru maravigghiari usannu la carta mmeci di la pergamena e puru tannu la lingua parrata o scritta nun era tantu diffirenti di chidda di oggi. Nta stu ambienti littirariamenti vivu, versu l’annu 1230 nascìu la lìrica puètica taliana vulgari. L’autura, attaccati a la liggi giurìdica e amminastrativa di lu regnu miridiunali, trapiantaru ntô sicilianu vulgari li mudelli di la lìrica puètica pruvinzali, a lu scopu di fari nàsciri na lingua littiraria capaci di pruittari, lu pristiggiu di la curti firidiciana. Accussì sta lingua accuminzò a mpunìrisi, cu la grammàtica, la sò sintassi e la ricchizza di li sò vucàbbuli putenti nta la sprissioni, a l’attinzioni di lu munnu culturali. A partiri di lu 1250, cu la morti di Fidiricu II e lu sfasciamentu di la curti, la redità di la scola siciliana fu pigghiata di l’Italia di lu sittintrioni, spiciarmenti di la Tuscana, unni si furmò na currenti di pueti, li “sìculu-tuscani”, ca n sècutu dèttiru orìggini a la scola di lu “dolce stil nuovo” e a la lingua taliana ca si affirmò comu lingua di lu pòpulu talianu, a lu cuntrariu di lu sicilianu ca vinni digradatu a lu rolu di sìmplici dialettu riggiunali. Li pueti nun eranu cchiù origginarî di l’ìsula e la Tuscana ariditò di la Sicilia lu tìtulu di centru criativu di la littiratura taliana. Cu tuttu chissu, puru Petrarca e Dante Alighieri ammìsiru la discinnenza di la lingua populari siciliana comu prima lingua littiraria taliana. Un fattu assai mpurtanti di pricisari è ca mentri la lingua e la littiratura taliana si stàvanu furmannu, lu sicilianu appi un veru granni nflussu nta dda lingua.
