Biagio Marin

Da Wikipedia, ła ençiclopedia libara.

Sto articolo 'l xè scrito in dialeto graisan

Biagio Marin xè un poeta graisàn nato ‘ntel 1891 e morto ‘ntel 1985.

[modifica] Vita

‘L hà studiao prima a Gorisia a le scuole in lingua tedesca - soto l’Inpero d' i Asburgo -, e dopo a Pisin in Istria. In sto piriodo, Marin ‘l ha inscuminsiao a scrive poesie in tedesco.

‘Ntel 1911 ‘l se trasferise a Firense ‘ndola che ‘l entra in contato co’ i ambinti culturali più inportanti de ‘l epoca, comò al circolo de la “Voce”. ‘L ano dopo ‘l va a studià filosofia a Viena, ‘ndola che ‘l se ferma per dò ani prima de tornà a Firense.

‘Ntel 1915 ‘l se sposa co’ Pina Marini: i varà cuatro figi, tra cui Falco che ‘l murirà durante la guera.

Durante la Prima Guera Mondial al varave de combate co’ i austriaci, ma al diserta e ‘l se aruola comò volontario ‘ntel esercito taliàn.

Dopo la guera, al se laurea in filosofia co’ Giovani Gentile a Roma, ‘ndola che ‘l insegna per do ani. Dopo, ‘l fa al profesor e al dirigente scolastico a Gorisia. De ‘l 1923 a ‘l 1937 ‘l fa ‘l diretor de la spiagìa de Gravo. Dopo, ‘l và a Trieste a insegnà e a curà la biblioteca de le Asicurasiuni Generali. Durante la Resistensa ‘l fa parte de ‘l CNL de Trieste.

‘Ntel 1963 ‘l torna a Gravo, ‘ndola che ‘l starà fin a la morte ‘ntel 1985.

[modifica] Opere

La produsiòn de Biagio Marin la xè principalmente in dialeto graisàn.

Le principali racolte de poisie xè:

”Fiuri de tapo” (1912)
"Le litànie de la Madona" (1949)
”I canti de l'isola” (1951 che la contien dute le poisie giovanili)
”Dopo la longa istae” (1951)
"Solitàe" (1961)
"Elegie istriane" (1963)
"In non tempo del mare" (1965)
"El mar de l’eterno" (1967)
"I canti de l’isola" (1970) che la contien dute le poisie publicae fin ‘l 1969
"La vita xe fiama" (1972)
"A sol calao" (1974)
”Pan de pura farina” (1976)
"El critoleo del corpo fracasao" (1976, dedicagìa a Pasolini)
”Stele cagiúe” (1977)
"In memoria" (1978)
"Nel silenzio più teso" (1980)
"Poesie" (1981)
"La vose de la sera" (1985)

Marin ‘l hà scrito anche per taliàn (“Acquamarina” ‘ntel 1973).

‘L valor de la produsion leteraria de Marin ‘l xè stao ricogniusuo de i ani Setanta de ‘nteletuali de livelo nasional comò Claudio Magris, Pier Paolo Pasolini e Carlo Bo.