Bikschôte
From Wikipedia
Bikschôte es e landelyke dêelgemêente van Langemark-Poelkapelle en grenst an Nôordschote, Merkem, Langemark en Zuudschôte-Boezinge. Der es e gemêentelijke kleuter- en basisschoole en verschillige verênigingen. Tot 1970 wos et gemêente ip zin eign.
Inoud |
[bewerk'n] Etymologie
't Woapenschild van Bikschôte (of Bixschoote gelyk dat et vroeger werd geschreevn) tôogt een omheinige of een beschuttinge (vroeger: scho(o)te) nevenst e beke (bik). 't Suffix -scho(o)te vinden we were in Zuudschôote, Nôordschôote en Oendschôote en es e verwiezinge noar d' houtne beschuttingn da je tussen de verschillige landeryn kost werevindn.
[bewerk'n] Beist den Êeste Weireldoorloge
Bikschôte wos êen van de mêest bevochtn dorpsjes beist den êestn slag vo Yper (Êeste Weireldoorloge). De grotstn slag was ip 21 oktober 1914 toen dat de Duutsche ('t 26ste en 27ste Duutsche Reservekorps) te zessen 's nuchtens in 't oor noa Langemark trokk'n vo were e stik van 't Ieperleekanoal te bezettn. Zudder bestond'n voornamelyk uut ongetrainde studentn en ander jonge gasten en zin en masse afgeslacht gewist deur de Brittn. Ip 't Duutsche militair kerkhof in Langemark liggen der 3000 Duutsche slachtoffers.
Ip de grenze bie Zuudschôte ligt 't gehucht Stêenstroate woadat de Duutsche ip 22 april 1915 vo den êeste ki gifgas ein gebezigd.
[bewerk'n] Bezienswoardigheed'n
In Bikschôte es 't er e wandelroute Het Vredespad (6 of 10,5 km) die in 't têek'n van den Êeste Weireldoorloge stoat[1].
[bewerk'n] Sent-Andreaskerke
Beist de Êeste Weireldoorloge es d'ôorsproenkelyke kerke hêel vermassakreerd gewist. In de joaren achter den oorloge ein ze z' herbouwd: de Sent-Andreaskerke es gebouwd in de joarn 1922-1924 naar een ontwerp van den architect Marcel Hocepied. In 't brandglasroam oe de rechterkant kun je 't woapenschild van Bikschôte werevindn. De neogotische kerke es e driebeukige hallenkerke en is gebouwd in gelige bakstêenn. Rond de kerk ligt een typisch landelijk kerkhof met de Kapel Onze Lieve Vrouw van Rust en Vrede.
[bewerk'n] Beeuwsaertmeulne
De Beeuwsaertmeulne es ne houtne windmeulne in de Zuidschôtestroate. De meulne es gebombardeerd in den Êeste Weireldoorloge en es sedert ton nie mi gebruukt. Nu zin z' hem an 't restaureern: achter d' ontmantelinge goan z' hem hêel herbouwn.
[bewerk'n] Europees Kampioenschap Pompoenslingern
Sinds 2004 organiseert de Landelijke Gilde van Bikschôte alle joare in september 't Europees Kampioenschap Pompoenslingern. Bie diene sport (populair in 't zuuden van VS, woadat ze 't pumpkin chunkin noemn) es 't de bedoelinge van ne pompoen zo verre meuglyk weg te smittn me ne katapult of ne trebuchet. De ervoaringe lêert dat diepgevroren pompoenn 't verst weg te slingern zin omda ze nie direk hêel in frut volln.
[bewerk'n] Winnoars
- 2006: De KLJ-Langemark met under ne katapult KaLutJe met 277,10 meter.
- 2005: 't Team Ypes uut Yper met under ne katapult Excalibur met 302,23 meter (Europees record).
- 2004: 't Team Bisschop uut Bikschôte zelve met under ne katapult F16.
