Langemark
From Wikipedia
Langemark is e prochie in West-Vloandern. 't Bestoat ol siens ongeveer 450 n.C. 't Is altyd e klêen centrum in de Westoek gebleevn. In de dorpskerne weun der ongeveer 5000 inweuners. Bie Langemark hoorn der oke nog twee wiekn: Madône en Sint-Julies. In 1971 fusioneerde Langemark met Bikschôte en in 1977 met Poekapelle, en achter veel protest van de Poekapellenoaren werd de nieuwe gemeente uuteindelyk Langemark-Poelkapelle genoemd.
[bewerk'n] Algemêen
De 65 meiters oge torre van de Sint-Pauluskerke komt goed tot uitinge op het schone marktplinsche met oge platanenboomn, waarrond de stroatn nog ossa met kasitsesteen zijn angeleid. Idre woensdagvornoene is 't er ier nog markt.
Vroeger ad Langemark een buurtspoorweg verbindienge met Roeseloare en lag het op de spoorverbindinge tussen Ostende en Armentières, op spoorlijne 63 tussen Yper en Toeroet. De statie is tot op heden gebrukt als kazerne van de pompiers, mo achter de bouw van een nieuwe kazerne in 2006 kommet het waarschienlyk leeg te stoan.
Langemark is ook de Baeckelandt-prochie. Iddere drie joar viert men ier de Baeckelandtfjeesten. Historisch was Lodewijk Baekelandt bist de Fransche bezettienge de leider van een beruchte bandietebende, die loater geromantiseerd werd. Ne werd ontoofd up de markt van Brugge.
Langemark et ook een bekend jeugduus: De Flodder.
[bewerk'n] Oorlogsgeschiedenisse
Bie de meeste menschn stoat Langemark meest bekend voe zi Duutsche Militaire Begroafplekke, 't Studentenkerkof ut 'n Êeste Weireldoorloge. Ip 't soldatenfriedhof liggn der mêer of 44.000 Duutsche soldoatn.
In dien oorloge ad Langemark zwoar te lieden, 't lag namelijk pal op de frontlinne. 't Bleeft der nietn overynd stoan.
Oeder de schriefwieze Langemarck is 't dorp voorol gekend in de Fransche, Iengelsche e Duutsche krigsgeschiedenisse vanwege de veldslaagn in november 1914. In Duutsland ontstond een ware mythe roend 't woord Langemark achter volsche zegebulletins van het leger over heldhaftige gevichten van joenge Duutsche soldoatn. De gevichten adn eerder plekkegevondn tussen Nôordschote en Bikschôte mo Langemark was gekoozn omdat et zo Duuts kloenk. In de Duutsche schooln werdn de heldn van Langemark vereird, en er werdn gedinkdagen geoeden en monumentn opgericht. Hitler, die nog bie Yper gestationeerd gewist wos, nam deze heldenvereringe over en noemde zizelvn ook een Langemarck-stridder. Loater werd het Vlamsch Legioen als stormdevisie Langemarck an 't oostfroent ingezet.
Op 22 april 2005 wost precis 90 joar geleedn dat in die gemeente, en da voe d'iste kêe in de weereldgeschiednisse, op grote schale een chemikn aanvol wos uitgevoerd. De Duutschers gebruktn chloorgoaze dat met de wind mee gink in de richtinge van de geallieerde troepn. Verrast deur 't succes greepn de Duutschers echter nie de kansse om deure te stoten en zo Yper in te nimn.
