吴语文学
来自 吴语维基百科
内容 |
[编辑] 概述
吴语文学包括吴歌、吴语小说搭仔吴语戏曲咾啥，渠是中国方言文学当中蛮有实力个一支。
[编辑] 源起搭仔发展
吴歌起源交关早，顾颉刚《吴歌小史》认为弗会比《诗经》晏。《诗经》里向虽然呒拨吴歌，但有人认为“吴歌实可与诗三百并驾齐驱”。明人王世贞讲：“虽俚字乡语，不能离俗，而得古风人遗意；其辞亦有可采者。如‘月子弯弯照九州，几家欢乐几家愁?几人夫妇同罗帐？几人飘流在他州?’又‘约郎约到月上时，只见月上东方不见渠。不知奴处山低月上早?又不知郎处山高月上迟?’ 即使子建太白降为俚谈，恐亦不能过也。”吴歌多数是恋歌，像《子夜歌》、《懊依歌》咾啥，明人冯梦龙编录个《桂枝儿》（官话作品，仿吴歌味道）搭仔《山歌》（吴语作品）也多数侪是“结识私情”之类，像《桂枝儿·牵挂》：“我好似水底色随波游戏，你好似钓鱼人巧弄心机。钓钩儿放着些甜滋味，一时间吞下了，到如今吐又迟。牵挂在心头也，放又放不下你。” 也有反映风情民俗、诉说疾苦或劝人为善个，像苏州个《十二月风俗山歌》、《江南百姓苦愁愁》、《长工谣》咾啥到今朝还勒许流传。
[编辑] 代表作
吴语小说起于宋元，盛于晚清，顶顶有代表性个是张南庄化名过路人写个《何典》。张南庄是清代乾隆、嘉庆年间个一位“高才不遇者”，《何典》是一部话本式个讽刺带滑稽个章回体小说，渠借鬼个世界展示“活的人间相”，鲁迅对渠有过相当高个评价：“作者便在死的鬼画符和鬼打墙中，展示了活的人间相……便是信口开河的地方，也常能令人仿佛有会于心，禁不住不很为难的苦笑。”《何典》全书用苏南吴语夹杂官话写成，成语、俗谚、歇后语、惯用语充斥其间。晚清个吴语小说还有韩邦庆个《海上花列传》、李伯元个《海天鸿雪记》、张春帆个《九尾龟》等。光绪年间成书个《海上花列传》叙事部分基本浪用官话，人物对话基本浪用苏白。譬如：
双玉近前，与淑人并坐床沿。双玉略略欠身，两手都搭着淑人左右肩膀，教淑人把右手勾着双玉脖项，把左手按着双玉心窝，脸对脸问道：“倪七月里来里一笠园，也像故歇概样式， 一淘坐来浪说个闲话，耐阿记得?”
胡适渠认为搿是文学语言革新个自觉行为，渠讲：“韩君认定《石头记》用京语是一大成功，故他也决计用苏州话作小说，这是有意的主张，有计划的文学革命。”“假如我们把双玉的话都改成官话：‘我们七月里一签园，也像现在这样子，坐在一块说的话，你记得吗?’—— 意思固然一毫不错，神气却减少得多了。”《海天鸿雪记》用个言话格局搭《海上花列传》差弗多。《九尾龟》稍有变化，人物对话用苏白只限于妓女，而且妓女只要一从良呢，对话也就弗再用苏白哉。五四以后，国语运动兴起，文学界一方面对方言文学理论进行探讨，一方面继续勒创作浪实践，有星吴地作家个作品常庄勒用普通言话创作个同时夹用一星比较通行或富有表现力个俚言俗语，比如朱瘦菊个《歇浦潮》、张恨水个《啼笑姻缘》、秦瘦鹃个《秋海棠》咾啥侪夹用仔交关吴语词。鲁迅、茅盾、叶圣陶等著名作家个作品也拿吴语词加进到普通话词汇，像“瘪三、尴尬、蹩脚”咾啥就是通过渠答个作品流传全国，拨普通言话所吸收个。
[编辑] 参考
郑张尚芳，《吴语在文学上的影响及方言文学》
