Zeêuws
From Wikipedia
't Zeêuws is 'n streektaele die-a gesproken oort in 't zuudwesten van Nederland. Meêstal oort 't Zeêuws as 'n groep dialecten van 't Nederlands gezieë, maer omdan de dialekten afwieke in uutspraeke, grammatica en ier en daer in woordenschat bin ze slecht te verstaen mee 't Nederlands. Naer 't noorden toe gaet 't Zeêuws over in 't Ollands, naer 't zuden zieë me 't vloeiend overgaen in 't West-Vlaoms. Steês vaeker ore 't Zeêuws en 't West-Vlaoms saemen as eên taele genomen, soms ok wel as tweê taelen, bevòbeêld bie Ethnologue.
Zeêuws eit z'n tuus voraol in de Nederlandse provincie Zeêland, mae de grenzen van 't Zeêuws komme nie glad overeêne mee de grenzen van die provincie. Op Goeree, Flakkee en 'n stikje van Svore bin ok Zeêuwse dialecten te oren, awast ore die gebieden bie Zuud-Olland en nie bie Zeêland. In Zeêuws-Vlaonderen bin streektaelen tuus die-an aol vee van 't andere Zeêuws afwieke; de dialekten die om Ulst gesproken ore ore d'r zelfs glad nie bie: ze bin Oôst-Vlaoms. Dit gaet ok op vo de taele in 'n paer grensdurpjes uut 't Land van Axel. De rest van Zeeuws-Vlaonderen kent dialekten die-a langzaem naer 't West-Vlaoms toekrupe; soms leie ze de grenze van 't Zeêuws al bie de Onte en rekene ze aolle dialekten van Zeêuws-Vlaonderen tot 't West- of Oôst-Vlaoms.
