Gû

Wikipedia (chū-iû ê pek-kho-choân-su) beh kā lí kóng...

Gû
Pó-chûn chêng-hêng: ū lo̍h-sèng

Holstein gû

Seng-bu̍t-ha̍k ê hun-lūi

Kài:	Animalia
Mn̂g:	Chordata
Kong:	Mammalia
Ba̍k:	Artiodactyla
Kho:	Bovidae
A-kho:	Bovinae

Sio̍k

Bos
Bubalus
Syncerus
Bison

Gû, 1 chióng lo̍h-sèng ê ū tê ê tōng-bu̍t, sio̍k-tī Bovinae chit ê a-kho. Lâng chhī lâi ēng i ê bah, gû-leng, phoê, mā ē-tàng thoa lê, giú chhia, téng-téng. Tī chi̍t-koá kok-ka, phì-jû Ìn-tō͘, ū chong-kàu ì-gī.

Gû sī kan-nā chia̍h-chháu, chia̍h-chúi kè seng-oa̍h ê tōng-bu̍t. Gû ê kha-toê sī pit-khui chò nn̄g-pêng kah bé toaⁿ-toê sī bô sio-siâng. Ū chi̍t-ki chiok-tn̂g ê boé, bóe-liu hoat tn̂g-tn̂g--ê mn̂g thang sut-chêng sut-āu koáⁿ hō͘-sîn, báng-á. Gû ê téng chhùi-khí-chô thâu-chêng bô hoat chhùi-khí kan-nā chhun tēng-tēng-ê chhùi-khí-hoāⁿ niā. I teh chia̍h-chháu sī ēng chi̍h tī chháu sa--lâi, ē-chô-khí khoè-chháu, téng-chô khí-hoāⁿ ná-boē-su lán teh-ēng--ê to-tiam án-ne, lâi-chò chih-la̍t ê kong-iōng niā-niā. Chia̍h-pá teh-khùn, teh-tuh-ku ê sî oē hoan-chháu. Khoàⁿ i ba̍k-chiu pàng-khoeh-khoeh chhùi tāng-boē-thêng teh pō͘ , ti i chá-chêng chia̍h-lo̍h pak-lāi ê chháu pō͘ hō͘-i koh-kha iù.

Gû ê chéng-lūi chiok-choē. Nā chiū iōng-tô͘ lâi-kóng, oe-tàng hun-chò: chò-sit, bah-ēng kah chhú-leng iōng. Chāi chò-sit-lâng sù-siông chiap-chhiok-tio̍h ê chióng-lūi sī "chhiah-gû" kah "súi-gû".

Gû m̄-sī chhut-sì boh lâi hō͘ lâng ēng--ê. Chi̍t-chiah-gû boh kà-kàu lo̍h-choā, kà-kàu oē-tàng hō͘-lâng ēng-kah sūn-chhiú, ài ēng chin-choē sî-kan, cheng-sîn kah iàu-léng. Gû 2-hè liáu-āu tio̍h thang-hó kǹg-phīⁿ, m̄-chiah hō͘ chhin-chhái toā-siò, lâm-lú lóng oē-tàng hoah-tang-hoah-sai lâi chhe-khián sú-iōng, tìⁿ-loê, thoa-chhia. Ūi-tio̍h boh hō͘ gû-káng ū ún-tēng ê sèng-sò͘, tī i khí-chhio chìn-chêng tio̍h ài kā-i iam-tiāu. Chit-má i-ha̍k hoat-ta̍t chù-siā tō oē-tàng oân-sêng. M̄-koh, chāi-goân-chá sī iōng kòng-hu̍t--ê. Ti gû khan khì toā-tiâⁿ. Boh hō͘ gû tó--lo̍h hit-pêng seng pho͘ kāu-kāu--ê chháu, lâi phiah-bián gû tó--lo̍h siong-tio̍h loē-chōng. Gû ê pak-tó͘ ē-té chhng kǹg-á(hí-sū kng siāⁿ, song-sū kng siū, kng koan-bo̍k, liūⁿ ti chhng-koè toā-liūⁿ ê hīⁿ-á hit-ki ke-si) hō͘-i tó--lo̍h tāng-chhiú-su̍t ê sî peh boē khí--lâi, boē tô-cháu. Kha pa̍k chhia-liāu-soh chêng-āu giú chi̍t-ē gû tō tó--lo̍h. Iōng chhâ-pó͘-thâu gēⁿ-gēⁿ tī gû-lān-hu̍t kah gû-sin-khu chi-kan thé-lāi ê kin lóng chām-tn̄g. Gêng-hiuh chhiat-khui pàng-hiuh. Iōng o͘-ian-thûn(í-chêng chú-chia̍h ēng toā-chàu, hiâⁿ-chháu tiáⁿ-toé oē khâⁿ chi̍t-têng o͘-ian-thûn) kiáu thô͘-tāu-iû boah piáu-bīn. Chhêng-á-kin choaⁿ-chúi hō͘ gû chia̍h lâi thè-hông. Chi̍t lé-pài chó-iū gû to ho̍k-goân.

chhiah-gû ham-i siong-koan-ê phoè-kiān.

Gû-kǹg-á pa̍k gû-soh hō͘ lâng théng-hó sái-gû lâi thoa-loê, thoa-chhia. Chit-tiâu soh-á sī lâng khan-gû, chiáng-ap gû, hān-chè, kò͘-tēng gû chia̍h-chháu oa̍h-tāng hoān-ûi(liāu-gû), kái-piàn î-soá gû-ê chia̍h-chháu só̄͘-chāi(soá-liāu), kài-hó-ê ke-si. Siat-sú soh-á lâi khì hō͘-i thu̍t-khì(thu̍t-liāu), khì hō͘-i tn̄g-khì(tn̄g-liāu), gû nā-sī un-sûn lán koh tī gû-phīⁿ khan-lâi têng pa̍k tio̍h-hó. Gû nā-sī iâu-koh siàu-liân, ah-sī iá-sèng tài-tāng, i lân-tit chū-iû sī oē cháu hō͘-lí jiok, sì-kè sńg-lâng chhân-hn̂g ngó͘-kok. Li tō hoah-hiu loh. Lán nā sian kā-i koà "gû-hâm", chit chiah gû khoàⁿ--khí-lâi mā khah-súi, khah ū-pān, koh ū-ūi thang kat lin-long-á. Tú-tio̍h thu̍t-liāu, tn̄g-liāu ê sî kài-bô pit gû-phīⁿ ke chi̍t-ūi gû-hâm, thang hō͘-lán khah-hó thang "lia̍h-liāu".

Chò-sit-gû tī sió-lông keng-chok, bô ki-hâi-hoà ê lông-choan, sī ū i-ê bô-hoat-tō͘ tāi-toè ê hong-piān kap si̍t-iōng. M̄-koh tè-tio̍h sî-tāi khoân-kéng ê piàn-chhian, chò-sit-gû kap ham-i siong-koan ê bûn-hoà khó-lêng oē sian ti lán kì-tî-tiong lâi siau-sit.

[siu-kái] Hun-lūi

Au-chiu gû (un-tài gû), n̂g-gû (Bos taurus)
- Liû-gû (瘤牛) (Bos taurus indicus, kū miâ Bos indicus)
Banteng gû/Java gû (Bos banteng)
Lî-gû (犛牛, yak) (Bos grunniens)
A-chiu chúi-gû (Bubalus arnee)
Hui-chiu chúi-gû (Syncerus caffer)
Kî-thaⁿ