生日
出自維基百科，自由嘅百科全書
生日 (又叫牛一)，就係一個人出世嘅日子，而出世嘅時間，一般嚟講係指個嬰兒離開個阿媽個子宮嗰陣。另外，好多人每逢生日一周年嘅日子就會慶祝自己大一歲，一般人都叫呢日做「生日」。
目錄 |
[編輯] 慶祝
有啲人慶祝生日嘅方法係同屋企人或者情人食餐飯，有啲可能會請晒啲親朋戚友開party，或者用其他方法慶祝。
慶祝生日好多時都會食生日蛋糕，好多時幫某人慶祝嘅人會買或者整一個咁嘅蛋糕，同埋係上面點蠟燭 (個壽星仔/女幾多歲就擺幾多枝上去)。 喺party入面，啲人就會唱生日歌，然後叫個壽星仔吹熄佢，跟住眯埋眼去許願。之後，大家就會切蛋糕食。有啲人仲會送埋生日禮物俾佢。
香港人同西方人多數係跟西曆嚟慶祝生日，但大陸就有好多人都係跟農曆。但無論跟邊個，一般都係正日或之前慶祝，好少會遲過嗰日慶祝。另外，一個人每19年就好有機會西曆同農曆生日都喺同一日，即係19歲、38歲、57歲、76歲等等。
[編輯] 生日同占星術
對一啲人黎講，生日同占星術係好大關係嘅。
好多人會就咁睇個出生日期，嚟睇番個人係屬於12星座入面嘅邊一個，然後估計佢有咩性格；有啲人又會再細分48個小星座。但係呢啲方法都太過概括。
其實根據正統嘅占星術，正確嘅做法應該係憑佢嘅出生日期、時間、地點，整一幅命盤(或叫「星圖」、「出生圖」)(手畫或者用電腦軟件嚟畫)，然後去分析佢出世嗰一刻，個太陽、上升星座、月亮、水星同金星等其他行星所位於嘅星座同埋宮位，去分析佢嘅性格同命運。就咁用12星座嚟分析嘅話，就變左淨係睇太陽嘅星座位置，而冇睇佢嘅宮位、其他星體嘅位置，同埋星體之間嘅連繫；而且出生嘅日期、地點(例如邊個城市)同準確嘅時間都好緊要。如果要睇兩個人係咪「合襯」，亦都係要咁樣睇。
不過，呢門學問雖然已經有好奈歷史，但佢始終唔係一門科學，所以可以話係冇得證實。亦有好多人認為信占星術 (或者話信星座) 係迷信。
