粵字
出自維基百科，自由嘅百科全書
粵字，即係粵語字，通常又叫做「廣東字」或「香港字」，用於書寫粵語或港澳地區嘅特有漢字。寫粵語經常要用倒，而漢語普通話嘅書面語基本上冇呢啲字出現（或者因為粵語係方言，唔「正統」，唔准用）。好似【啲】、【喺】、【乜】、【嘢】、【佢】、【邨】、【攰】呢啲，都係粵字。
目錄 |
[編輯] 種類
粵字有幾種：
[編輯] 造字
根據粵語詞嘅發音同埋意思，遵守造字法創造出嚟嘅新字，為粵語特有。例如：粵語表示『升降機』嘅詞音 lip1，音譯自英文 “lift”。為咗寫出呢個音，就用會意呢種造字方法，用「車」字做部首，加個「立」字創造出【𨋢】字，意思係上下直立行駛嘅車。
[編輯] 借音字
借用同音漢字嚟寫某個發音。被借用嘅字增加咗一個同原義唔同嘅解釋。例如：【響】，借音之後增加咗「在、喺」噉樣一個表示處所嘅解釋。又例如：聽日嘅「聽」字亦係借音字，【聽】原意係用耳仔去感受聲音，而新嘅意思係「遞時、之後」。
[編輯] 古字
又叫本字，係古漢字，喺而家書面語已經唔再用。例如：表示「疲倦」、「累」嘅【攰】字。
[編輯] 香港增補字
粵字喺最初中文字電腦化嘅時候，無加入編碼裏面。響 1999年9月香港特別行政區政府將 4,702 個香港通用嘅中文字造成《香港增補字符集》。Unicode 出 3.1 板嘅時候（2001年05月1號），《香港增補字符集》亦加入埋。
