Greifensee (Gewässer)

Us der alemannische Wikipedia, der freie Dialäkt-Enzyklopedy

Technische Yschränkung:
Dr koräkt Titel wär: »Gryfäsee«

Gryfäsee

Datä
Lag:	Kanton Züri
BFS-Nr.:	9040
Flächi	8,4 km²
maximali Tüfi:	34 m
Zuäflüss:	Aabach
Abfluss:	Glatt
Höchi über NN:	435 m
Grössäri Stedt am Ufer:	Ustär
Chartä

Dä Gryfäsee lit im Kanton Züri zirka 20 km östlich vo Züri und dur d Pfanästiilchetti vom Zürisee trännt. Er isch mit 6 km Längi und ärä maximalä Breiti vo 1.6 km dä zweitgröschti See im Kanton Züri.

[ändere] Laag und Gschicht

Där Gryfäsee liit inärä vom Rhy-Linthgletschär gformtä Landschaft, im Weschtä erhebt sich d Pfanästiilchetti, im Ostä fangt s Züri Oberland a. S Wassär vom Gryfäsee chunnt us äm Züri Oberland und glangt haupsächlich dur dä Aabach in Gryfäsee und verlaat än dur d Glatt widär. Bis im 12. Jahrhundärt hät dä Gryfäsee drum au Glattsee geheisä. Früänär isch dä Gryfäsee von Grüänigä bis uf Dübädorf gangä, ersch sitt am kanalisierä vo dä Glatt 1890/91 hät er sini hüttig Form.

Bereits 8000 vor Christus händ sich di erstä Mänschä i dä Mittälsteizyt a dä Ufer vom Gryfäsee niderglaa. Am östlichä und nördlichä Ufär hät mär einigi Pfahlbausidligä gfundä.

Im 12. Jahrhundärt hät mär z Gryfässe am Ufer vom Gryfäsee s Schloss Gryfässe baut und am 24. April 1944 isch än abgschossänä B-17-Bomber vo dä United States Air Force in See gschtürzt.

Sit 1941 staat d Uferzonä vom Gryfäsee under Schutz. Diräkt am Ufer vom Gryfäsee lit s Stedtli Gryfäsee, dur d Uferzonä vom See abgränzt lägäd Niederuster, Schwärzäbach, Muur und Fällandä am Gryfäsee. Au Uster und Mönchaltorf ligäd i dr nöchi vom Gryfäsee.

[ändere] Nutzig

Dr Gryfäsee wird voralläm als Naherholigszonä gnutzt. Rund um dä See häts Wander- und Velowäg und uf äm See vili Böötli, wobi privati Motorboot uf äm Gryfäsee verbotä sind. Es git jedoch d "Schifffahrtsgesellschaft Greifensee" wo mit ämänä Motorschiff Rundfahrtä und Kursverchehr zwüschät Maur und Niederuster aabütät. Es hät au divärsi Badeaastaltä am See.

Jedäs Jahr findät im Härbst dä Gryfäseelauf um dä See statt.

[ändere] Naturschutz

Di ganz Ufärzonä vom Gryfäsee staht undär Naturschutz. Dur di starch besidälig vo dä Region und d Landwirtschaft isch dr See aber zimlich starch mit Phosphat belaschtät, wodur natürli d Algen starch wachsäd. Sit 1970 hät mär das Problem hablwägs im Griff, dä Phosphatghalt isch aber immär no über äm Gränzwärt und der Suurstoff-Ghalt voraläm im Summer z tüf. Mär überleit sich drum, öb mär dä See wiä dä Pfäffikersee im Summer sött belüftä.