E40
From Wikipedia
Den E40 is een otostrade die over het West-Vlams grondgebied lôopt. De 'E' in de noame wist ip het feit dat het om een otostrade goat die ipgenomen is in het Europese systeim van otostraden. Vôor 1986 werd ie de E5 genoamd, na de rationalisaotie van noamn van Europeese otostrades E40. T'is êen van de belangrykste West-Vlamse verkêersassn, tegoare met den E17 en den E403. J'is angeleid in verschillende faasn: 't stik tussen Luuk en Jabbeke is angeleid tussn '37 en '40 en tussn '50 en 56', 't stik tussn Veurne en Jabbeke is't er vele loater gekoomn: tussn '73 en '85 ein ze't angeleid. De E40 is de oedste otostrade van Belgje.
De E40 is een lange otostrade, wel 8000km lang. In Belgje volt ie tôpe met de Oôst-West asse, die Luuk, Brussel en de Vlamse Kust verbindt. T'es een hêel drukke otostrade, in de weeke zit ie vul me pendelairs noa Brussel toe (de files tussn Afliggem en Ternat zien structureel, wa wil zegg'n dat ze bykans iedern dag vôorkoomn), ip warme doagn zit de E40 vul in de richtienge van de kust omda ol de menschen van't binnland noa de zêe willn. Dad is logisch, omdat ie deur z'n liggienge (hêelegans parallel an de kust) een ideole maniere is om de mêeste kuststeed'n te beriek'n.
Inoud |
[bewerk'n] West-Vlams traject
De E40 komt de provincie van West-Vloandern binn'n in Beirnem (vanut Brussel gezien), lôopt hêelegans via Brugge noar de Franse grenze in Oadinkerke (De Panne). Ie volgt grôtendêels het traject van de A10 en de A18. De belangrykste gemêentn langst z'n (West-Vlams) traject zien:
- Beirnem (1 ofrit)
- Ôostkamp (1 ofrit)
- Brugge (4 ofritten)
- Jabbeke (1 ofrit)
- Zandvôorde (Ostende) (1 ofrit)
- Ostende (1 ofrit)
- Gistel (1 ofrit)
- Middelkerke (1 ofrit)
- Nieuwpôort (1 ofrit)
- Ôostduunkerke (Koksyde) (1 ofrit)
- Veurne (1 ofrit)
- Oadinkerke (De Panne) (1 ofrit)
- Franske grenze
Der wordt dikkers gepeisd dat de E40 d'autostrade van Oostende noa Brussel is, mo da's nie 100 procent juuste. Gelyk da'j ierboovn ku zien, buugt de E40 uut binneland ter ôogte van Jabbeke of noa 't zuud'n noa Vrankryk. 't Stikske autostrade da in 't verlengde in Jabbeke deurelopt nor Ostende zelve, is gin E40 mig, moar èt allêene 't Belgische nummer A10.
[bewerk'n] Europees traject
Zoals gezeid es de E40 êen van de langere Europese otostrad'n. Ie lôopt hêelegans van't Oôsten van Europa (Leninogorsk in Oezbekistan) en lôopt ozwo via Kazachstan, Rusland, Oekraïne, Pooln, Duutsland via Belgje noa Vrankryk (eindpunt Calais). T'es een typische Oôst-West verbindienge.
[bewerk'n] Varia
De winkelkeetn E5-mode eit zinne noame gekreegn van de E5 otostrade.
