H8000
From Wikipedia
H8000 es de noame voo de hardcorescène in West-Vloandern, die ipkwam middnt de joarn ’90. De noame wèr uitgesprookn als Hate Thousand. H stoa voe Hate, 8000 voo de West-Vlamsche postcodes.
Inoud |
[bewerk'n] Geschiedenisse
De hardcorescene in West-Vloandern kwam ip int midden van de joarn 90. Groepn lyk Liar en Congress shockeerdn de internationoale hardcorescene omda ze metal in under gelud brachtn. Ze noemdn under nieuwe genre ‘edgecore’. In dien tyd wa voorol old school hardcore en emo populair. Der kwam veel kritiek ut buutnland, mo in oeze streke wa de ‘metalcore’ vree populair.
Butn 't zwoare gelud a de edgecore wok een sterke straight-edge bôodschap. Veel bands kwoamn ip voo diernrechtn en veganisme en teegn drugs. Ondertussn kwam ôok in Amerika edgecore ip me bands lyk Earth Crisis. Azwo kostn sommigste H8000 bands toern deur Europa, Amerika, Japan,… en werdn ze vree populair.
Toen da veel edgecorebands lyk Blindfold, Spirit of Youth, Regression, Sektor, Solid, Spineless,… stoptehen, wa de rek der 'n bitje ut voo 'n poar joar.
Mo sinds kort es H8000 were bezig an e remonte. Jist en voorol kwoamn der mêer beatdown groepn ut Yper, lyk Retaliate en First Alliance. In plekke van rappe metal, singalongs en straight edge brachtn zudder lompe, zwoare beatdown, arte moshpits en violent dancing. Bovndien woarn ze nie straight-edge mo addn ze mêer een hiphop mentaliteit medanze under eign crews begostn te vormn.
Ôok andere genres kwoamn ip in de streke: old school hardcore, metalcore, deathcore, crossover,… 't Epicentrum van de scene verschoof van Kortryk na Brugge en Ipper.
In 2006 stoptehen Liar en Congress, de twêe belangrykste bands van de scène. Vôoral 't latste iptreedn van Congress wa geschift: mêer dan 850 fans ut West-Vloandern, jong en od, en de beste H8000 groepn broakn hêel 't kot af in Ipper. Ondanks da die 2 groepn stopten, es de H8000 vandoage populairder dan ôoit.
[bewerk'n] Bands
- Odde perjode: Liar, Congress, Blindfold, Spirit of Youth, Sektor, Shortsight, Regression, ODK Crew, Firestone, Solid, Spineless, Vitality,…
(vandoage bestoa aljin ODK Crew nogmoa).
- Nieuwe perjode: Morda, Core of Anger, Blood Redemption, Shredder, The Boss, First Alliance, Rafflesia, Your God Is Dead, No Recess,…
[bewerk'n] Labels
- Genet Records
- Goodlyfe Records (legendorisch over de hêle wereld)
- Eyespy Records
- Reality Records
[bewerk'n] Documentaire
In 2004 kwamter een DVD ut me interviews me belangryke gastn ut de H8000 scene.
[bewerk'n] Festivols
Joarlyks zinter een poar hardcorefestivols in oeze streke:
- Ieperfest (jin van de grôotste hardcorefestivols in Europa)
- Tieltfest
- Thoprock (Brugge)
- H8000-fest (Kortryk)
- Northseafest (Heist)
[bewerk'n] Scène
Belangrike platselyke scenes zin:
- Kortryk
- Yper (Vortn Vis)
- Brugge
- De kuste (Den Oane (Broedkasse), Heist (Ravelingen), Nieuwpôort, Brênienge, …)
- En in mindere moate Tielt en Roeseloare.
