香港濕地公園
出自維基百科，自由嘅百科全書
香港濕地公園（Hong Kong Wetland Park）位於香港元朗天水圍北部，有61公頃，包括60公頃嘅戶外保護區同埋1萬平方呎嘅室內展館。作為米埔濕地保護區 嘅緩衝區，香港特區政府希望憑住興建呢個濕地公園嚟保育濕地、教育市民同埋吸引遊客。
目錄 |
[編輯] 歷史
香港濕地公園所在嗰塊地原本計劃做生態緩解區，用嚟補償返因為興建天水圍新市鎮而失去咗嘅具生態價值土地。1998年，前漁農署（依家已經改名做漁農自然護理署）同前香港旅遊協會（依家已經改名做香港旅遊發展局）展開咗一項叫做「國際濕地公園及訪客中心可行性研究」嘅計劃，睇吓可唔可以將嗰個生態緩解區擴展成為一個濕地生態旅遊景點。研究結論係可以喺嗰度發展一個濕地公園，同時又唔削弱佢嘅生態緩解功能。香港濕地公園嘅發展更可以將嗰個生態緩解區提昇成為一個集自然護理、教育同旅遊用途於一身嘅世界級景點。香港特區政府之後亦都將香港濕地公園計劃列做其中一個千禧年發展項目。
香港濕地公園喺1999年動工興建，係香港第一個生態環境旅遊項目，用咗大概五億港元。公園分開兩期發展，總共佔地61公頃。第一期展覽館已經喺2000年12月落成開放，而第二期展覽館亦已經喺2006年5月20日啟用。
[編輯] 設施簡介
公園主要分「室內展覽區」同「戶外展覽區」兩種。室內展覽區裏面由 3 個大型展館(分別係「濕地知多少」，「濕地世界」同「人類文化」)同埋一個戶外公園所組成。除咗展出天然濕地生態之外，公園亦都引入咗多種活生生，濕地可以見到嘅動植物嚟展覽，好似馬來長吻鱷、小鼷鹿、三線閉殼龜（俗名金錢龜）、香港獨有嘅香港鬥魚、香港湍蛙等等。
訪客中心有三個大型展館，包括影音劇場、電腦互動遊戲區，同埋展示唔同濕地生態環境嘅「濕地世界」。
「戶外展覽區」主要有多間觀鳥屋，紅樹林浮橋，濕地探索中心等。濕地公園嘅標誌：黑臉琵鷺，冬季時就可以響觀鳥屋外見到。
公園第一期工程曾經獲得香港建築師學會2000年周年大獎會長獎，第二期亦都獲得該個學會2006年全年建築大獎。
[編輯] 貝貝之家
2004年6月喺元朗山貝河捉到嘅小灣鱷貝貝亦喺2006年8月搬咗入去公園入面嘅「貝貝之家」。
貝貝之家簡介：
[編輯] 戶外設施
- 水池：最深一米，水面有突出嚟嘅石台，畀鱷魚遮陰同哩埋。
- 紅外線暖爐：藏在石簷底嘅紅外線暖爐，響凍嘅日子畀啲溫暖貝貝（溫度係 25 度 C）
- 電熱板：陸上嘅電熱板，響凍嘅日子畀貝貝優息取暖。
- 電子磅：巧妙咁收埋身石簷之下，簷底有紅外線暖爐。每當鱷魚攤喺度取暖嗰陣，工作人員可以響室內嘅嘅儀器紀錄重量，完全唔駛騷擾貝貝。
- 濾水系統：池水唔停循環過濾，確保水質良好。先進嘅過濾系統包括過濾沙缸同紫外光消毒。
- 戶外植物：戶外展區種嘅植物除點綴之外也為鱷魚提供蔭蔽地方，品種包括蒲葵、風車草、海芋、大薸
[編輯] 室內設施
室內屋企同戶外範圍由一活動門分開，畀鱷魚自由出入。內室方便獸醫做健康檢查，亦可畀貝貝舒舒服服過寒冬。
- 通風系統同自然光：室內個窗特大，風扇同抽風系統，保持空氣流通。自然光由窗射入嚟，對鱷魚有益。
- 暖管：室內通風系統重有暖管，可以響冬天提供暖氣。溫度太低嗰陣重可以加紅外線暖爐。
- 暖水：好凍嘅冬天時可提供暖水，等室內池水保持 20 度以上。
- 閉路電視：室外戶內都有閉路電視，24 小時睇著條鱷魚嘅活動。來旅遊嘅人可以響戶外隔著塊玻璃睇吓貝貝嘅起居生活……
[編輯] 入場費
公園嘅入場費係大人港幣30蚊，小童、全日制學生同埋老人家港幣15蚊，三歲或以下嘅小童免費。另外亦都可以申請「家庭年票」。
[編輯] 新聞同埋消息
2006年5月20日，濕地公園正式開幕。2006年8月16日，貝貝成功運往「貝貝之家」。
2005年1月，漁農自然護理署喺香港濕地公園發現大量懷疑係紅火蟻嘅昆蟲同埋幾十個佢哋嘅巢穴。
喺2005年10月1日起生效嘅《香港濕地公園（特別地區）令》令到香港濕地公園成為香港最新嘅特別地區，授權郊野公園及海岸公園管理局總監（即係漁農自然護理署署長）管理濕地公園，令到佢得到更加好嘅保護同埋管理。
[編輯] 交通
[編輯] 其他香港主題公園
- 香港海洋公園
- 香港迪士尼樂園
